Qazirgi qys maýsymy – ańshylarǵa qolaıly mezgil. Degenmen ár janýardyń óz suraýy, izdeýi bar ekenin umytpaý kerek dep jazady zamana.kz. 

Myna bir oqıǵany bir ańshy aǵam aıtyp bergen edi, oqyrmandarmen bóliskim keldi.

«Sol kúngi saparym óte sátti bastal­ǵan edi, – dep bastady sózin aǵam. – Tańerteń-aq qasqyrdyń apanyn ońaı taýyp aldym. Eki bóltirigin oınatyp júrgen qas­qyrǵa birden kózim tústi. Kóp oılanbastan ony atyp saldym. Al bóltirikterin ıtim jaıratyp tastady.

Úıge kelgesin áıelime esh qınalmaı alǵan oljamdy aıtyp, maqtanyp otyrǵanmyn. Bir kezde alystan qasqyrdyń ulyǵan daýysy estildi. Oǵan asa mán bermegenmin.

Erteńine daladan qatty shyqqan daýys estidim. Syrt­qa júgire shyqqanmyn. Sóıtsem dál esiktiń aldynda úlken qasqyr tur. Onyń janynda kishkentaı qyzym alańsyz oınap júr. Zárem qalmady. Itimdi aıtaqtasam, ol qansha umtylsa da baılaýly shynjyrynan bosaı almady. Ne isterimdi bilmeı qatty sastym.

Ómirimde birinshi ret qasqyrmen betpe-bet turmyn. Onyń kózderi qyp-qyzyl eken. Maǵan qadala qarap tur. Keshegi atyp tastaǵan qasqyrdyń arlany eken-aý dep oıladym ishteı. Endi tipti qoryqtym, tipti  únim shyqpaı qaldy. Qyzymdy jaryp tastaıdy-aý dep úreıim ushyp barady, kózimnen jas shyǵyp ketti. Bar kúshimdi jıyp: «Balama tıispe, odan da meni óltir!»  – dedim. Únim sybyrlaǵandaı bolyp ázer shyqty. Qyzymnyń bolsa oıynda tipti de qaýip joq, meni kóre sala janyma keldi.

Qasqyr artynan umtyla ma dep edim, joq, ol maǵan birtúrli kinálaǵandaı qarady da, jalt burylyp, jónimen kete bardy.

Qysqasy, álgi arlan maǵan da, qyzyma da esh zıanyn tıgizbeı ketti. Denemniń dirilin basa almaı, jerge otyra kettim.

Negizi qasqyr menen kek aldy-aý dep oılaımyn. Qatty qorqytty. Qatty oılandyrdy. Ol óziniń meıirimi adamdikinen artyq ekenin kórsetti. Qyzymdy talap óltirip ketse ne ister edim? Osyny oılaýdyń ózi qorqynyshty.

Osy oqıǵa meniń esimnen ketpeıdi. Sodan beri ańǵa shyqqanda qasqyr ataýlyǵa tımeıtin boldym».

Aǵamnyń bul áńgimesi maǵan qatty áser etti. «Torǵaı ekesh torǵaı da balapanyn qorǵaıdy» demeı me, adam da, jan-janýar da óz urpaǵyn qorǵaıdy ǵoı. Biraq qazirgi kezde keı adamdardyń balasyn qorǵamaı, kim-kóringenge jáýteńdetip tastap ketip jatqany ótirik emes. Sondaı adamdarǵa aǵamnyń myna áńgimesi oı salsa eken deımin.

R. ÓMİRJANQYZY