12 mamyr kúni M.Áýezov atyndaǵy Qazaq Memlekettik akademıalyq drama teatrynda kórnekti akter, rejıser, Qazaqstan jáne KSRO halyq artısi, Memlekettik syılyqtardyń laýreaty Asanáli Áshimovtiń 80 jasqa tolýyna oraı saltanatty kesh ótedi dep habarlaıdy Qamshy aqparattyq agenttigi M.Áýezov atyndaǵy Qazaq Memlekettik akademıalyq drama teatrynyń baspasóz qyzmetine silteme jasap.
Asanáli Áshimov 1937 jyly 8 mamyrda Jambyl oblysy, Sarysý aýdany, Saýdakent (burynǵy Baıqadam) aýylynda dúnıege kelgen. 1956-1961 jj. Qazaq Memlekettik Qurmanǵazy Ulttyq konservatorıasynyń teatr fakúltetin akter mamandyǵy boıynsha oqyp-bitirip, «Qazaqfılm» kınostýdıasyna akterlik shtatqa qabyldanady. Al, 1964 j. beri M.Áýezov atyndaǵy Qazaq Memlekettik akademıalyq drama teatrynda úzilissiz eńbek etip keledi.
Teatrda negizinen basty rolderdi somdaǵan akter M.Áýezovtiń «Abaıynda» Aıdar, Kerim, «Eńlik-Kebeginde» Kebek, «Qaraqypshaq Qobylandysynda» Aıshýaq, «Tańǵy jaryǵynda» Jarasbaı, Ǵ.Músirepovtiń «Qozy Kórpesh –Baıan sulýynda» Qodar, N.Hıkmettiń «Eleýsiz qalǵan esil erinde» Asıstent, Q.Muhamedjanovtyń «Jat elde» dramasynda Asan aqyn, T.Ahtanovtyń «Boranynda» Qasbolat, Sh.Aıtmatov pen Q.Muhamedjanovtyń «Kóktóbedegi kezdesýinde» Iosıf Tataevıch, Á.Nurpeıisovtiń «Qan men terinde» Elaman, Á.Tarazıdiń «Kúlmeıtin komedıasynda» Sánjan, I.Vovnánkonyń «Apatynda» Asan qart, Shekspırdiń «Iýlıı Sezarinde» Iýlıı Sezar, M.Frıshtiń «Don Jýannyń dýmanynda» Don Jýan, G.Gaýptmannyń «Ymyrttaǵy mahabbatynda» doktor Klaýzen jáne t.b. kóptegen rolderimen ulttyq akterlik mekteptiń damýyna ólsheýsiz úles qosty.
Ol qazaq kıno ónerin jańa belesterge kóterý úshin kóp eńbek sińirdi. Otyzdan asa fılmge túsken akterdiń esimin, ulttyq kınonyń tólqujatyndaı bolǵan «Qyz Jibektegi» Bekejan, «Atamannyń aqyry» men «Transsibir júrdek poıyzyndaǵy» Qasymhan Shadıarov beıneleri shetelderde tanymal etti.
A.Áshimov teatr men kıno salasynda rejıserlik qyzmet etýimen qatar, óner qaıratkeri retinde elimizdegi jáne shetelderdegi mádenı sharalarǵa belsendi at salysady. Sonymen qatar, T.Júrgenov atyndaǵy Qazaq Ulttyq óner akademıasynda dáris berip, teatr óneriniń damýyna ózindik úles qosyp júrgen kóptegen shákirtterdi tárbıelegen ulaǵatty ustaz.
Sýretker talantynyń taǵy bir qyry – jazýshylyq. Onyń «Maıranyń áni» (1995), 5 tomdyq shyǵarmalar jınaǵy (2007), «S lúbovú, Vash Asanalı Ashımov» (2008), «Ǵumyr-darıa» (2012) jınaqtary qalyń oqyrmannyń súıikti shyǵarmalaryna aınalǵan týyndylar.
A.Áshimov búgingi tańda M.Áýezov atyndaǵy Qazaq Memlekettik akademıalyq drama teatrynyń kórkemdik jetekshisi jáne Qazaqstan Teatrlar asosıasıasynyń tóraǵasy retinde ulttyq sahna óneriniń órkendeýine mol tájirıbesimen, abyroı-bedelimen eleýli úles qosyp júr.
Asanáli Áshimovtiń ulttyq ónerge qosqan orasan zor eńbegi memleket tarapynan joǵary baǵalandy. Ol Qazaqstannyń halyq artısi (1976), KSRO halyq artısi (1980), Táýelsiz «Tarlan» syılyǵymen (2000), «Otan» (2001), «Qurmet» (2007), «Parasat» (2007), QR Mádenıet jáne aqparat mınıstrliginiń «Mádenıet úzdigi» tósbelgisimen (2012), jáne «Dostyq» (2014) Reseı Federasıasynyń M.Lomonosov atyndaǵy (2007) jáne IýNESKO -nyń «Altyn qyran» ordenderimen marapattalǵan.
Ótetin orny: M.Áýezov atyndaǵy Qazaq Memlekettik akademıalyq drama teatry (Úlken zal)
Ótý ýaqyty: 12 mamyr, 2017 jyl.
Bastalýy: 17.00
