Astanada 3-4 mamyr kúnderi Sırıadaǵy jaǵdaı boıynsha halyqaralyq kezdesýdiń kezekti otyrysy ótedi. Astanada ótetin kelissózderge sırıalyq qarýly opozısıanyń qatysatynyn Qazaqstannyń Syrtqy ister mınıstrligi rastady. Qarýly toptar delegasıasynyń múshesi Fateh Hassýnnyń málimdeýinshe, sharaǵa shaqyrtý reseılik delegasıadan kelip túsken.
«Sırıa máselesi boıynsha Astanada ótetin halyqaralyq kezdesýdiń barlyq qatysýshylary, onyń ishinde Mohammed Allýsh bastaǵan sırıalyq qarýly opozısıa ókilderi kezdesýge qatysatyndaryn rastady», - dep habarlady QR SİM baspasóz qyzmetiniń basshysy Ánýar Jaınaqov. Onyń aıtýynsha, ázirge Astanaǵa BUU sarapshylary men kepil memleketterden delegasıalar kelip jatyr. BUU bas hatshysynyń Sırıa boıynsha arnaıy ókili Staffan de Mıstýra da kelissózderge qatysatynyn rastady. Ol búgin keshke Astanaǵa keledi. AQSH baqylaýshy retinde qatysady.
Búgin kepil memleketterden kelgen sarapshylar arasynda tehnıkalyq kezdesý ótedi, joǵary deńgeıdegi kelissózder 3-4 mamyr kúnderine josparlanǵan.
Astana prosesiniń aıasynda 2017 jylǵy 23-24 qańtarda jáne 15-16 aqpanda Astanada Sırıa boıynsha joǵary deńgeıdegi halyqaralyq kezdesýdiń eki raýndy, sondaı-aq 6 aqpanda sarapshylardyń tehnıkalyq kezdesýi ótken bolatyn. 14-15 naýryz kúnderi ótken úshinshi kelissózde jaýyngerlik is-qımyldardy toqtatý rejımine kepil memleketter - Reseı, Túrkıa, Iran delegasıalary qatysty. Sondaı-aq, kezdesýge AQSH, Iordanıa, Sırıa úkimeti jáne BUU ókilderi keldi. Aıta keterligi, kepilger elderdiń birlesken málimdemesinde Astana prosesi Sırıadaǵy turaqtylyqty qamtamasyz etýde tıimdi jumys istep jatqandyǵy atalyp ótilgen. Degenmen, mańyzdy ilgerileýshilik bolmaǵanymen Astana jáne Jeneva prosesteri Sırıadaǵy soǵysty jáne atys qımyldaryn toqtatý rejıminiń júzege asyrylýyna septigin tıgizgendigi basa atap ótilgen. Jeneva prosesiniń ajyramas bóligi bolyp tabylatyn bul kelissózder 6 jyl boıy qarýly qaqtyǵys zardabyn tartyp kele jatqan Sırıa halqynyń beıbit ómirge degen úmitin qaıta oıatqan.
Bul kezdesýlerdiń negizgi nátıjesi BUU Qaýipsizdik Keńesiniń 2254-qararyna (2015) sáıkes taraptarǵa Jeneva prosesiniń aıasynda kún tártibiniń saıası máselelerin talqylaýǵa kóshý múmkindigin bergen – Sırıadaǵy soǵys amaldaryn toqtatý rejimin baqylaý boıynsha birlesken jedel top týraly erejeni kelisý bolyp tabyldy.
«Sırıadaǵy qaqtyǵystardyń aıaqtalýy jaıynda aıtýǵa áli erte. Degenmen, bizdiń aldymyzda kúrdeli jol jatyr. Biraq, biz kúsh-jigerimizdi biriktirý arqyly terorızmmen jáne ekstremızmmen kúrese alamyz. Bizdiń Astana prosesi óziniń tájirıbelik úlesin qosatyndyǵyna senimimiz mol», - delingen qatysýshylardyń birlesken málimdemesinde.
Aldyńǵy úsh raýnd kezdesýden Sırıadaǵy jaǵdaı ońalyp ketpese de, AQSH pen Reseı nátıjeli dep baǵalady. «Biz BUU-nyń Jenevadaǵy kelissózderin jańǵyrtý úshin jol salýǵa baǵyttalǵan Astanadaǵy kezdesýdiń úlesin moıyndaımyz», delingen AQSH-tyń Memlekettik departamentiniń baspasóz qyzmeti taratqan aqparattarda. Pýtınniń ózi de Sırıa boıynsha Astanadaǵy kelissózderge oń baǵasyn berdi.
Jaqynda ǵana Sırıada hımıalyq qarý qoldanylyp, júzdegen adamnyń jan berip, balalardyń jantúrshigerlik qınalysta jatqany týraly vıdeo álemdi dúr silkindirdi. Áleýmettik jelide Álemniń túkpir-túkpirinen soǵysty synaǵan, Sırıadaǵy shıelenistiń toqtatylýyna múddeli posttar jazyldy. Sarapshylar da Eýropadaǵy bosqyndar daǵdarysyna sebep bolǵan, Taıaý Shyǵysty órt oshaǵyna aınaldyrǵan, ondaǵan mıllıon adamnyń taǵdyry tarazylanǵan Sırıadaǵy shıelenistiń biter ýaqyty jetti dep sanaıdy. Al, bul turǵyda Astana prosesiniń oń nátıje berýine taraptardyń barlyǵy tilektes bolyp otyr.
Derekter boıynsha, Sırıadaǵy azamattyq soǵystan 320 myńnan astam qaza tapty. Onyń 15 myńnan astamy balalar. Al, Reuters shynaıy sannyń 450 myńǵa jaqyndap qalǵanyn habarlaǵan.
