Aldaǵy kele jatqan 7 mamyr merekesiniń úlken máni bar. Ár halyq úshin eń qymbaty – Otany. Ol jumyr jerdegi seniń táý eter bólshegiń. Qazaq baqytty halyq. Óz eli, óz jeri, óziniń aıbyndy, muhıt asyp, jer-jahan tanyǵan, abyroıy asqaq Elbasy bar. Sol elin súıgen, eli súıgen arda uly – Ult kóshbasshysynyń bastamasymen jyldan jylǵa álemdik sahnada bedeli bıiktep bara jatqan jasampaz orny bar. Biz, táýbáshil halyqpyz, táýbá deımiz. Máńgilikke bet burǵan maqsatymyz baıandy bolǵaı.
Ottan ystyq Otanymyz úshin eń basty qundylyq ol qaýipsizdik. Bereke basy da birlik pen bereke bolǵan jerge uıalaıdy. Baıaǵyda bireý tynyshtyqtyń qadirin tynyshsyzdyq ornaǵan jerde júrip bilersiń depti. Shyn sóz. Jany bar sóz. Álemniń ár túpkirinen kúnsaıyn birin biriniń janyn alyp, shaıpaý tirlik keship jatqan jurt az emes. Olardyń bolashaǵy, eldik máselesi bulyńǵyr. Soǵan qarap, baqyttyń mekenine aınalǵan Qazaq elindegi kópultty memlekettik saıasattyń durystyǵyna jáne Elbasynyń kóregendigine taǵy bir márte bas ızeısiń.
Otan qorǵaýshylar kúniniń máni joǵary ekendigin osy jerden qaıtara toqtalyp ótkim keledi. Otan eń áýelgi qundylyǵymyz desek, Otan qorǵaýshy onyń kúzetshisi, onyń qorǵany, onyń aıbyny. Sondyqtan da olarǵa bizdiń eń asylymyzdy senip tapsyrylǵan. Eń joǵarǵy senim Otan qorǵaýshylarǵa júktelgen. Basqa basqa, Otandy qorǵaý ol janmen, boıdaǵy baryńmen elge, jerge qyzmet etý degen sóz. Búgingi maqalamyzǵa arqaý bolyp otyrǵan azamatymyzda osy sózderdi júregimen tereń sezinip, túısikken.
Jasyratyny joq, ár adamnyń mańdaıyna jazǵan qysqa ǵumyrynda óziniń búkil jan-dúnıesimen, bolmys bitimimen tańdaǵan súıikti mamandyǵy bolady. Bizdiń keıipkerimiz Qazaqstan Respýblıkasy Ulttyq ulanynyń «Ońtústik» óńirlik qolbasshylyǵynyń jedel basqarma bastyǵynyń orynbasary podpolkovnık Batyrbek Músirepov áskerı qyzmetti jastaıynan-aq janyndaı jaqsy kórip, qalap alǵan joly.
Ol Almatynyń irgesindegi Qaskeleń aýylynda 1980 jyly dúnıege keldi. Ákesi Seısen men anasy Erenkúldiń otbasynda baqyttyń bal shekerin iship, úıelmeli-súıelmeli jetilgen on balanyń segizinshisi. Ákesi marqum «Bireýdiń ala jibin attamańdar. Adalynan eńbek etip, elge, jurtqa jaqsylyq jasaýdan tartynbańdar. Sonda ǵana naǵyz azamat atanasyńdar», degen tárbıesin kórip ósken Batyrbek áke amanatyna sál qylaý túsirip kórgen emes. Ońynan júrip, shamasy kelse jaqsylyq jasaýǵa jan ushyryp turǵany.
2000 jyly arnaı áskerı bilim alyp, qyzmet jolyn Ulttyq ulannyń Qarakemer kentindegi oqý ortalyǵynda vzvod komandıri bolyp bastady. Keıin Petropavldaǵy Áskerı ınstıtýtta qyzmet atqardy. Osy jerden Astanadaǵy Elbasy atyndaǵy Ulttyq qorǵanys ýnıversıtine oqýǵa tústi. Oqýǵa túsip qana qoımaı, ony úzdik bitirdi. Keıin osy biregeı oqý ornynyń doktorantýrasyn da oıdaǵydaı támamdady. Sol áskerı bilimniń ordasynda ustazdyq etti. Árıne, bunyń barlyǵy da birer sózdi hatqa túsirip, jazǵanǵa ǵana ońaı bolar. Onyń artynda Batyrbektiń eń áýelgi bilimge degen, bilýge degen qulash ashqan qushtarlyǵy jatsa, ekinshiden eńbekti súıe bilgen yntazarlyǵy jatqany ras. Biraq ol qaı áskerı qurylymda qyzmet atqaryp, qandaı laýazymynyń tutqasyn ustamasyn, Áskerı Antqa adaldyǵyn únemi isimen, kásibı sheberligimen dáleldep kele jatqan azamat. Qaramaǵyndaǵy qyzmetkerlerge degen aǵalyq janashyrlyǵy men bilgenin úıretýge tyrysatyn baýyrmaldyǵynyń arqasynda áriptesteriniń arasynda zor syı-qurmetke bólengen. Minsiz áskerı qyzmeti jolynda talaı marapat pen maqtaýlarǵa ıe boldy da. Olardyń qatarynda «Minsiz qyzmeti úshin» keýde belgisiniń úsh birdeı dárejesin ıelengenin, «Qarýly Kúshterge – 10 jyl», «Armıa generaly Saǵadat Nurmaǵanbetov» atyndaǵy, «Jeńistiń 70 jyldyǵyna» arnalǵan medeldarmen marapattalǵan.
Qarý ustap el qorǵap júrgen ár azamat úshin eń bastysy jedeldigi jáne jeke basynyń jaýyngerlik daıarlyǵy. Ózderińizge kórip, bilip júrgenderińizdeı álemniń túpkir-túpkirinde nebir qymǵýyt oqıǵalardy kórýge bolady. Tapa-tal túste qyryp-joıyp, birin birine qarý alyp shabýyldap, lańkestiktiń oıranyn salyp júrgen jaǵdaılar tańsyq bolmaı barady. Sondyqtan da biz bundaı oqıǵalarǵa, osylarmen ymyrasyz kúresýge saqadaı saı bolýǵa, halqymyzǵa tıtteı de qaýip-qater týdyratyn jaǵdaılardy boldyrmaýǵa biz jedel turǵyda daıyn bolýymyz kerek. Bul kezekte bizdiń basqarmanyń jetekshiligimen óńirlik qolbasshylyqtyń tiıisti qyzmetteri udaıy daıyndyqtaryn pysyqtyp otyrady, - deıdi podpolkovnık B.Músirepov bizben áńgimeleskende.
Asqaraly azamattyń jan-jary Zýhra da erine tireý bolǵan jan. Ekeýi Shahsenem, Baqyt, Sulatanaı esimdi qyzdaryn ónegeli tárbıelep ósirip otyr. Endi áke jolyn qýar uldary bolsa degen armandary da joq emes.
Isi qazaqqa tanymal, sanańa oı salar «Ne paıda» atty talǵamdy ánniń mátininde: «Bul ómirden ne paıda, halqyńa qyzmet etpeseń» degen joldar bar. Iá, shyndyǵynda da Otanyń, halqyńa, týǵan jerińe ıile qyzmet etpeseń, qur súldeni kóterip jer basyp júrgennen ne paıda, ne ǵarip. Qaıtara aıtqanda, týǵan elge qyzmet etýdiń eń asqaraly shyńy, qadirlisi de qurmettisi ony kóz alartqan jaýdan qorǵaý, tynyshtyǵyn kúzetý ekeni ras.
Ulttyq qaýipsizdigimizdiń birden bir temirqazyǵy bolyp sanalatyn memlekettiń ishki tynyshtyǵynyń senimdi kúzetilýine úlesin qosyp júrgen maqalamyzdyń bas keıipkeriniń eńbegi de paryqty hám abyroıly. Armandaryńa jete ber alǵadaı azamat. Otan qorǵaýshylar kúni men Uly Jeńis merekesi qutty bolsyn!
Maıor Arman Áýbákirov, Almaty qalasy
