Búgin qazaqtyń jeztańdaı ánshisi Ramazan Stamǵazıev erdiń jasy elýge toldy. Ramazan Stamǵazıevtiń ózi qandaı bıikke jetse de, qazaqy qarapaıym qalpynan aınyǵan emes. Onyń qońyr daýysy qazaq dalasynyń túkpir-túkpirine jetip, óner súıer qaýymnyń júregine jattalyp qalǵan. Ramazan Stamǵazıev dombyrasyn jaı ǵana sabalap júrgen ónerpaz emes, qazaqtyń qaı aýylyna barsa da tórin usynatyn búginniń sal-serisi. Qazaq án óneriniń qaı mektebiniń bolsa da ánin naqyshyna keltirip shyrqap júrgen Ramazan Stamǵazıev úlgili ustaz, nemerelerine súıikti ata, 30 jyldan beri qazaqtyń halyq ánderi men dástúrli ánderin keńinen nasıhattap júrgen Qazaqstannyń eńbek sińirgen ártisi. 

Ramazan Ómiráliuly  1967 Almaty oblysy Raıymbek aýdany Kókpıaz aýylynda dúnıege kelgen. Ónerge bala kezinen qushtar bolǵan. 1989 j. Almaty estrada-sırk ýchılıshesin (Q.Baıbosynov klasy boıynsha) bitirgen. 1989 jyldan "Qazaqkonsert" birlestigi quramynda óner kórsetip júr. 1989 - 2005 jyldary Qazaqkonsert óner birlestiginde ánshi. 2006 - 2009 jyldary Qurmanǵazy atyndaǵy Qazaq ulttyq konservatorıasynda oqytýshy. 2009 - 2012 jyldary Respýblıkalyq estrada - sırk kolejinde oqytýshy. 2012 jyldan Qazaq ulttyq óner akademıasynyń "dástúrli án mýzykasy" kafedrasynda oqytýshy, aǵa oqytýshy, kafedra meńgerýshisi laýazymyn atqarady. 

Stamǵazıev shyrqaǵan «Qapezdiń áni», «Eki jıren», «Kókshetaý», «Temirtas» sıaqty Alash arystarynyń ánderi halyqtyń qulaǵyna onyń daýysymen sińgen. «Qamshy» aqparattyq agenttigi ujymy búgingi týǵan kúnine oraı ánshige uzaq ómir, shyǵarmashylyq tabys, shańyraǵyna shattyq, otbasyna baqyt tileıdi.