Kórkem fılm túsirýge bólingen 69 mıllıon teńge qarajatty qymqyrdy degen kúdikpen jarty jyl buryn ustalǵan Jamanqulovtyń aqtyq soty bolyp jatyr dep habarlaıdy Qamshy aqparattyq agenttigi.
№2 Medeý aýdandyq sotynda prokýror Tuńǵyshbaı Jamanqulovty 7 jyl 6 aıǵa sottaýdy, biraq Qazaqstan táýelsizdiginiń 25 jyldyǵyna oraı jarıalanǵan raqymshylyq boıynsha jaza merzimin 3 jyl 7 aıǵa azaıtýdy jáne jasy jetkenin eskerip shartty jaza kesýdi surady. Prokýror fılmge rejıser bolǵan Talǵat Jánibekovti alty jyl shartty merzimge sottaýdy suraǵan.
Tuńǵyshbaı Jamanqulov sottaǵy sońǵy sózi retinde: «Ómirimniń osy shaǵynda mundaı jaǵdaıǵa túsemin dep oılamappyn. Bar oıym tek jaqsy fılm túsirý ǵana boldy. Men aqsha jumsaýmen múlde aınalyspadym. Men prodúser boldym. Prodúser degenimiz ıdeıalyq jaǵynan jumyldyrýshy adam. Osy jerde otyrǵan meniń tobymda Iýdınadan basqa eshkim meni aqsha aldy degen joq. Men - aqpyn. Ony sizdiń aldyńyzda, qudaıdyń aldynda aıta alamyn», - degen.
Oqyrman nazaryna sala ketsek, Tuńǵyshbaı Jamanqulovtyń qazaq ónerine sińirgen eńbek joly:
Jamanqulov Tuńǵyshbaı Qadyruly, Ál-Tarazı 1948 jyly 2 qazanda Jambyl oblysy, Baızaq aýdany, Abaı aýlynda dúnıege kelgen. 1973 jyly Almaty óner ınstıtýtynyń (qazirgi Qazaq ulttyq óner akademıasy) akterlik fakúltetin bitirgen. Akterlik óner jolyn stýdenttik kezinen Qazaq drama teatrynda bastady. 1993 — 2001 jyldary osy teatrdyń dırektory ári kórkemdik keńestiń tóraǵasy boldy. Jamanqulov Qazaq drama teatry sahnasynda baǵyn synap, daryndy akter ekendigin tanytty.
Jamanqulov Tuńǵyshbaı Qadyruly, Ál-Tarazı degen tekpen de tanymaly akter, rejıser, Qazaqstannyń halyq ártisi. (1992; 1982 jyldan Qazaqstannyń eńbek sińirgen ártisi), profesor (1979). KSRO Kınematografıster odaǵynyń múshesi (1983).
Qazaq drama teatry sahnasynda Beısenbaı (Q.Muqashev "Dala dastany"), Arystan (Q.Muhamedjanov "Bóltirik bórik astynda"), Baqtyǵul (Q.Ysqaqov "Tańǵy jańǵyryq"), Myrzahmet (T.Ahtanov "Joǵalǵan dos"), Demesin (D.Isabekov "Kishkentaı aýyl"), Kótibar, Syrym (M.Áýezov "Aıman — Sholpan" men "Qaragóz"), Jalmuhan (u.Músirepov "Aqan seri — Aqtoqty"), Abylaı han (Á.Kekilbaev "Abylaı han", M.Baıserkenov "Abylaıdyń aqyrǵy kúnderi"), Ábýtálip (Sh.Aıtmatov "Ǵasyrdan da uzaq kún"), t.b. rólderdi somdady. Bul rólderde Jamanqulov ulttyq jáne álemdik teatr mektepteriniń dástúrin tereń meńgergen, dıapazony keń akter ekenin tanytty.
Jamanqulov elimizdiń kıno óneriniń damýyna da eleýli úles qosyp, Chekıs ("Otqa oranǵan Oral"), Táńirbergen ("Qan men ter"), Ábilqaıyr ("Jaýshy"), Orazmergen ("Aqyrǵy amanat"), Bolat ("Tarǵyl qaýyn"), Ázimhan ("Qaraly sulý"), Qaıyrhan ("Otyrardyń kúıreýi"), Qunanbaı ("Jas Abaı") beınelerin ózine tán erekshe sheberlikpen somdap shyqty.
"Otyrardyń kúıreýi" fılmindegi Qaıyrhan róli úshin Qazaqstan Respýblıkasy Memlekettik syılyǵynyń laýreaty atandy (1992). Ál-Tarazı rejıser retinde K. Gossıdiń "Týrandot hanshaıym", M. Ǵaparovtyń "Tuzdy shól", Q. Shahımardannyń "Tomırıs" pesalaryn sahnaǵa shyǵaryp, búgingi zamanǵy otandyq teatr óneriniń deńgeıin kóterýge úles qosty.
Jamanqulov - konserttik ujym "Tamashany" alǵashqy uıymdastyrýshylardyń biri. Ol 1974 jyldan pedagogıkalyq qyzmetpen shuǵyldanyp, Qazaq drama teatry janyndaǵy stýdıada, Almaty memlekettik ýnıversıtetinde dáris oqydy. 1979 jyldan Qazaq ulttyq óner akademıasynda akterlik sheberlik boıynsha sabaq berip, jeke kýrs júrgizedi. Tuńǵyshbaıdyń tolǵamdarymen myna jerden tanysa alasyz.
Jamanqulov rol somdaǵan kınofılmder:
1974 jyly – «Dala daýysy»
1976 jyly – «Ferdınand Lústiń ómiri men ólimi»
1978 jyly – «Qan men ter»
1980 jyly – «Jaýshy»
1980 jyly – «Múmkin emes balalar»
1981 jyly – «Eshbir sebepsiz»
1981 jyly – «Aqyrǵy ótkel»
1982 jyly – «Qaýyn»
1982 jyly – «Qaraly sulý»
1983 jyly – «Onyń dombyrasynyń ásem syńǵyry»
1983 jyly – «Kúzgi ıreleń jol»
1985 jyly – «Qaqtyǵys»
1985 jyly – «Meniń ápkem Lúsá»
1986 jyly – «Jotadan óterde»
1986 jyly – «Jábirlenýshilerde shaǵym joq»
1987 jyly – «Túkpirden kelgen kúıeý»
1987 jyly – «Sulý Aısulý týraly ertegi»
1987 jyly – «Qar jolbarysy»
1989 jyly – «Úlken soǵystaǵy kishkentaı adam»
1991 jyly – «Otyrardyń kúıreýi»
1991 jyly – «Apıyn»
1993 jyly – «Ábilhaıyr han»
1993 jyly – «O, taǵdyr, baqytsyz balalar»
1994 jyly – «Namys»
1995 jyly – «Abaı»
1997 jyly – «Saǵynysh»
2003 jyly- «Sardar (Qazaqstan, Qytaı)»
2006 jyly – «Kóshpendiler»
2008 jyly – «Aleksandr. Nevsk soǵysy»
2009 jyly – «Adasqandar»
2010 jyly – «Múmkin emes mahabbat»
