Atyraýda belgili aqyn, dramatýrg Iran-Ǵaıyptyń 70 jyldyq mereıtoıyna oraı “Máńgilik eldiń altyn adamy” halyqaralyq teatrlar festıvali bastaldy.
24 mamyrǵa deıin jalǵasatyn sharaǵa 6 teatr qatysyp jatyr. Olar: Muhtar Áýezov atyndaǵy qazaq memlekettik akademıalyq drama teatry, Músirepov atyndaǵy memlekettik akademıalyq balalar men jasóspirimder teatry, Taldyqorǵan oblysy Bıken Rımova atyndaǵy qazaq drama teatry, Batys Qazaqstan oblystyq Hadısha Bókeeva atyndaǵy qazaq drama teatry, Shyǵys Qazaqstan oblystyq Semeıdiń Memlekettik Abaı atyndaǵy qazaq mýzykalyq drama teatry, Atyraý oblystyq Mahambet atyndaǵy qazaq drama.
Festıváldiń ashylý saltanatynda sóılegen oblys ákimi Nurlan Noǵaev ótkizilip otyrǵan festıváldiń mańyzyn túsindirdi:
“Bunyń barlyǵy Elbasymyzdyń “Bolashaqqa baǵdar: Rýhanı jańǵyrý” atty maqalasynda kórsetilgen tapsyrmalardy oryndaý úshin, ıaǵnı elimizdiń rýhanı jańǵyryp, sanasynyń ózgerip, jahandaný prosesinde rýhanı básekelestikke de saı bolýy úshin istelip jatyr. El azamattary bul kópten kútken isimiz edi, Elbasyǵa rahmet dep qulshynyp otyr. Muny iske asyrmasaq ózimizge syn degen baǵytpen qyzmet atqaryp kele jatyrmyz”, – dedi ol.
Oblys ákimi Mádenıet jáne sport mınıstri Arystanbek Muhamedıulyna jáne festıválge qonaq bolyp kelgen osy organnyń vıse-mınıstri Aqtoty Rahmetollaqyzyna mádenı sharalardy ótkizýdegi qoldaýy úshin erekshe rızashylyǵyn bildirdi. Aqtoty Rahmetollaqyzy Mádenıet jáne sport mınıstriniń mereıtoı ıesine quttyqtaýyn oqyp, festıvaldiń uıymdastyrylý sapasyn joǵary baǵalady.
Ashylý saltanatynda sóılegen teatr qaıratkeri Esmuhan Obaev Atyraý oblysynda óner men mádenıetke degen yqylastyń erekshe ekenin aıtty:
- Atyraý eli búginde ónerdiń mekkesine aınaldy. Osy men bilgeli beri jeti kollektıv gastróldik saparmen kelip, festıválder ótkizdi. Bir dramatýrgtiń festıvalin ótkizý bul – úlken jomarttyq, bul – úlken táýekel. Bul – úlken maqtanysh. Jyl saıyn ótedi dep aıttyńyz. Bul tarıhta bolmaǵan nárse. Jyl saıyn bul jerde festıvál ótkizý degen... Budan bylaı osy jurt festıválsiz kún kóre almaıtyn bolady», – dedi ol.
Mereıtoıyn toılap otyrǵan aqyn Iran-Ǵaıyp festıváldi uıymdastyrýshylar men óner súıer qaýymǵa alǵys aıtty:
“Men sizderge basymdy ıemin. Atyraýym, abyz alybym, aınymas altyn qalybym, táý ettim senen. Isataı-Mahambetińnen aınaldym. Osy turǵan barlyǵyńyzdan aınaldym. Mynaý jetpiske kelgen adam aınalǵysh bolady eken. Tabys tileımin. Qudaı árýaqyt qoldap, myna sahna sizderge unasyn dep tileımin”, – dedi ol.
Aıta ketelik, KSRO memlekettik syılyǵynyń laýreaty, lıtvalyq rejıser Ionas Vaıtkýs tóraǵalyq etetin qazylar alqasynyń quramynda Qyrǵyz Respýblıkasynyń eńbek sińirgen artısi Odýrakaev Býsýrman; ónertanýshy Ahmedıarova Nurbıke; jazýshy-jýrnalıst, «Aıqyn» gazetiniń bas redaktory Nurtóre Júsip; jazýshy-jýrnalıst, Halyqaralyq «Alash» ádebı syılyǵynyń laýreaty, «Qazaq ádebıeti» gazetiniń bas redaktory Jumabaı Shashtaıuly; ónertaný magıstri, teatrtanýshy Ábýǵazıeva Saltanat bar.
Festıvál aıaqtalǵan soń Atyraý qalasynda Iran-Ǵaıyptyń shyǵarmashylyq keshi ótedi dep josparlanǵan.
