Kúni keshe ǵana, 2017-07-10 kúni tańerteń kóńilimiz baıaǵydaı, alyp ushyp tapqan-taıanǵanymyzdy taksıge berip, oblystyq kóshi-qon mekemesine dokýment qaǵazdarymyzdy suraıyq dep barǵanbyz. Bara sala esikten ary óte almaı, kóńilimiz sý sepkendeı basyldy.
Denesi áljýazdaý kelgen, juqaltań shúńirek kózdi kúzet formasyn kıgen jigit «Jumystaryń bolsa, barlyq suraqtaryńyz boıynsha Taldyqorǵanǵa baryńdar, endi olar bul jerde joq. Myna habarlandyrýdy oqyńdar»,-dep zirkiredi, bulttanyp kúrkiredi.
Esikke sıyrdyń tilindeı «Habarlandyrý» orys tilinde jazylyp japsyrýly tur. Onda ne jazylǵanyn túsine almaı dal boldyq. Bul sonda bizdi ǵana emes, qasıetti ana tilimizdi de kózge ilmeıtin mekeme eken ǵoı. Shetten kelgen aǵaıyn ózge tildi qaıdan bilsin...
Ońtútik astanaǵa jaqyn ornalasqan segiz aýdanǵa kóship kelgen qandastarymyzdyń qatpary qalyń qaıǵysy men tońy jibimegen qujat máselesin kim qaraıdy? Quzyrly mekeme ózderi kóship-qonyp sarsańǵa túsip júr.
Yńǵaılary men jaǵdaılaryna qarap, halyqqa eskertpesten bir kúnde Almaty qalasynan kabınetterin kóshirip, izim-ǵaıym bolǵan kóshi-qondy qandaı túlen túrtti eken. Oǵan ázirge jaýap taba almadyq.
Tuspaldaýymyzsha qapyryq aptap ystyqta, tórt qabatty ǵımarat pana bolmaǵan sekildi. Jumystary aýyr ǵoı, túsinýge bolar...
Ózderi biraýzdan aqyldasyp, nede bolsa qalanyń shýylynan alys oblys ortalyǵy Taldyqorǵanǵa kóship ketý jón dep sheshken sekildi. Onda oblysqa qarasty segiz aýdanǵa kelgen qandastarymyzdyń baryp-qaıtýyna birshama qındyqtar týǵyzbaı qalmasy anyq. Jolaqy, jatyn-oryn, iship-jemnen qınalýy degendeı. Sebebi arǵy betten ázer at arytyp jetkende, bir japyraq qaǵazdyń kók móri úshin, alashapqyn bolyp arly berli júrýge kimniń jaǵdaıy jar bere qoısyn.
Tańnan keshke deıin Almaty oblysy kóshi-qon polısıasynyń kóshken ornyn sıpaǵan jurt, kenezeleri keýip, dyǵdyry quryǵanda tarqasty. Báriniń ańsaǵany sol sıyr quımyshaqtanǵan qujattyń máselesin tez sheshimin tabýy ǵoı.
Mekeme qyzmetkerleriniń bir kúnde astylarynan sý shyqqandaı, Almaty oblysynan taıyp turýy «Ash qulaqtan, tysh qulaq, Aıdaǵanym eshki laq» dep dańǵazasy kóp, shýyly basym ortadan birjola ketip, shalǵaı jatqan Taldyqorǵanǵa taban tirep arqalaryn keńge salý ma, eshkimniń aty jetip kúnde baryp mazalamaıtyny anyq.
Atajurtyna at artyp ázer jetken qandastarymyzdyń bir japyraq qaǵaz úshin tentirep, tabanynan taýsylyp júrse, azamattyq alýdy olarǵa uly arman etip, kúrmeýi kóp másele jasap záýrenin sarǵaıtyp, qańyryǵyn tútetip qoıý quzyrly mekemeniń orden taqqan azamattarynyń «Hobbıy» sekildi.
Olar ne durystap jaýap bermeıdi, qulaqasyp sózińdi tyńdamaıdy. Sonda bularǵa etıka, mádenıet týraly aıtpaǵan kúnniń ózine, Elbasy Nursultan Nazarbaevtyń joldaǵan joldaýy, júrgizip otyrǵan salıhaly saıasaty, kúnige aıtyp jatqan sózi áser etpeı me.
Dúnıejúzi qazaqtarynyń besinshi quryltaıynda kóshi-qondaǵy qordalanǵan túıtkildi máselelerdiń seńi buzylyp, kedergi qamaldardyń alynatyny týraly aqjoltaı habar aıtylyp bir qýantqan edi. İle -shala araǵa kún salmaı jatyp, qýanysh uzaqqa barmaı qyzýynyń sap basylyp jatqany bizdi qatty alańdatady.
Qalı Orynbaı, Shelek aýdany
