«Biz shaı iship otyrǵanda, eńgezerdeı bir qara kisi sálem berip kirip keldi. Basynda tysy jyrtylǵan eltiri tymaǵy bar, ústine jyrtyq qoı júni shekpen, aıaǵynda kıizden syrǵan bashmaq, alqam-salqam tońǵan kisi syqyldy. Abaı álgi kelgenge tesireıip qarady da, Áıgerimge: - Mynaý kim? - dedi. 
Áıgerim: - Bul meniń qoıshym, ózi Kókshe, qystaı qoı jaıýǵa jaldap alyp edim, - dedi. 
Abaı: - Áı, Áıgerim, sen qoıdy jaqsy kóresiń, qoı baqqan kisini jalańash qoıasyń. Tońǵan, ashyqqan adamda aqyl, qaırat bola ma, bul da ózińdeı adam emes pe? Men osynda úsh qonyp, Semeıge júremin, men júrgende myna qoıshynyń kıimin bútinde, - dedi. 
Áıgerim qatty qysylyp: - Jaraıdy, ózim de kıim tikkizip jatyr edim, tez bitireıin endi, - dedi. ...

Qoıshy shaıǵa toıyp, terlep, keıin baryp otyrǵan soń Abaı: - Eı, Kókshe, endi ertegi aıtshy? - dedi. 
Qoıshy: - Abaı aǵa, kedeıde ertegi bola ma? Ne aıtamyn? 
Abaı: - Seni kim kedeı qyldy? 
Qoıshy: - Meni kedeı qylǵan Qudaı-daǵy. 
Abaı: - Ne, Qudaımen burynnan arazdyq, óshtigiń bar ma edi? 
Qoıshy: - Joq. 
Abaı: - Endeshe nege Qudaıdan kóresiń? 
Qoıshy: - Mal bermegen soń, aıtqanym ǵoı. 
Abaı: - Qudaıdyń elge úlestirip jatqan maly bar ma edi? 
Qoıshy úndemedi. 
Abaı qoıshyǵa qaraǵan kózin aýdaryp, biz jaqqa qarady da: - Mine, bizdiń qazaqtyń kóbiniń sózi osylaı keledi. Bul – zor adasqandyq. Jas shaǵynan jalqaýlyqqa salynyp alady da, talap qylyp, talpynyp, alysqa baryp eńbek qylyp mal tappaıdy. Mundaı adamdar ishse tamaqqa, kıse kıimge jarymaıdy, joqshylyqtan arylmaıdy. Ol joqshylyqty, kedeılikti Qudaıdan kóredi. Qudaı oǵan eńbek qyp, mal tappa dep pe? Osy ýaqytta úlken qalalarda, zaýytta jumys isteýshi jumysshylar bastaryn qosyp, baıǵa aqymyzdy jegizbeımiz desip jatqandar bar. Olar Qudaıdan mal suramaıdy. Aıanbaı eńbek qylyp, ony kúsh qosyp birigip joqtap alady. Eńbek etseń erinbeı, toıady qarnyń tilenbeı, - dedi».

Dáýletıar Bitimbaıuly – Abaıdyń úlken balasy Aqylbaımen kórshi turǵan, osy áńgimeni tyńdap, jazyp alǵan adam.