Aqqanda,
Sorǵalaǵan iz qaldyryp,
Juldyzdy kim jiberdi aǵyzdyryp?
Qara jer qabyldaıdy qushaq ashyp,
Juldyzǵa kerek emes,
Kór qazdyryp...
Jymyńdap,
Keshe túnde qara aspanda,
Tur edi,
Jol kórsetip,
Adasqanǵa.
Qara nıet qaısy eken,
Qyzǵanyshtan
Jandyryp jiberdi me,
Talasqanda?
Juldyzym,
Qara aspanda sáýle shashqan,
Seıiltip,
Qaıǵy bultyn,
Kóńil ashqan.
Men seni izdeýshi edim,
Janarymmen
Mazasyz túnderimde uıqy qashqan.
Táńirdiń ózi qalap,
Gúl ekkenin –
Oıladym,
Aspanda dep el-mekeniń.
Juldyzym,
Bilmeppin-aý,
Sóner kezde
Seniń de turaǵyńdy jer ekenin...
Táńirim!
Juldyzdardaı men de –
Balań,
Muńlyqpyn ár nársege kóńili alań.
Tabynyp júrýshi edim,
Saǵan balap,
Sóndirdiń juldyzymdy,
Qaıda baram?..
Qýanysh MUQTAI
aqyn, qoǵam qaıratkeri
Pikir qaldyrý