Astana qalasyndaǵy «Qazaqstan» sport kesheninde «Astana Arlandary» men «Kýba Domadores» komandalary arasyndaǵy jekpe-jekte tórtinshi bolyp alańǵa 64 keli salmaqta Endı Krýzǵa qarsy Dilmurat Mıjıtov shyqty. Ol da qarsylasyna 47:48:48:47:48 upaımen ese jiberdi.
Aıta ketsek buǵan deıin, 56 keli salmaqtaǵy Ilás Súleımenov qarsylasy Haver Ibanesti 48:47. 48:47. 48:47 upaı sanymen jeńse, Básekeniń alǵashqy oınynda Iohanýs Argılagospen qolǵap túıistirgen Temirtas Júsýpov 5 raýndtyq básekede upaı sanymen qarsylasynan basym túsken bolatyn. Alaıda 91 keli aýyr salmaqta Anton Pınchýk – Erıslandı Savonmen sharshy alańǵa shyǵyp, qarsylasyna ese jiberip edi.
Esterińizge salaıyq, sport dodasy Búkil álemdik boks serıasy WSB jobasynyń VII maýsymnyń fınaldyq jekpe-jegi bolyp tabylady. Dodaǵa deıin Qamshy.kz tilshisi jattyǵý zalyna jıi baryp, «Astana arlandarynyń» tartysty jekpe-jekke daıyndyǵyn baqylaǵan bolatyn. Sondaı-aq, «Astana Arlandarynyń» bas bapkeri Nurlan Aqúrpekovtiń aqtyq aıqasqa daıyndyǵy týraly suhbat jarıalanǵan edi.
Qazaq jurty kóz tikken aıtýly dodada endi el namysyn qorǵaıtyn boksshylar mynalar:
52 keli, Oljas Sáttibaev – Iosbanı Veıtıa
60 keli, Zákır Safıýllın – Lazaro Alvares
69 keli, Aslanbek Shymbergenov – Ronel Iglesıas
75 keli, Ábilhan Amanqul – Aren Lopes
81 keli, Arman Rysbek – Hýlıo La Krýs
91 keliden joǵary, Oljas Buqaev – Ioandrı Toırak
Nursultan Amanjolv rezervte shyǵady.
Bir aıta keterligi kýbalyqtar bul fınalǵa kileń Olımpıada, Álem chempıondaryn, tek qana birinshi nomerli boksshylaryn ákelgen. Al «Astana Arlandary» komandasy ekinshi, úshinshi, tórtinshi nomerli boksshylardan quralsa da Ózbekstan, Reseı, Ázirbaıjan, Qytaı, Anglıa sıaqty elderdiń tek qana birinshi nomerli boksshylaryn jeńip, fınalǵa jetken.
Kásipqoı boksta qazaqtyń týyn jedbiretip júrgen jigitter Meıirim Nursultanov, Madıar Áshkeev jáne Asqat Ýalıhanov Búkilálemdik boks serıasynyń WSB jobasy boıynsha fınalǵa shyqqan «Astana Arlans» boksshylaryna sáttilik tilegen edi.
