Astana qalasyndaǵy «Qazaqstan» sport kesheninde «Astana Arlandary» men «Kýba Domadores» komandalary arasyndaǵy jekpe-jekte besinshi bolyp alańǵa 75 keli salmaqta Ábilhan Amanqul men Aren Lopes shyqty. Ókinishke oraı Ábilhan Amanqul 47:48 47:48 47:48 upaı aıyrmashylyǵymen jeńisti qoldan berdi
Aıta ketsek buǵan deıin, 56 keli salmaqtaǵy Ilás Súleımenov qarsylasy Haver Ibanesti 48:47. 48:47. 48:47 upaı sanymen jeńse, Básekeniń alǵashqy oınynda Iohanýs Argılagospen qolǵap túıistirgen Temirtas Júsýpov 5 raýndtyq básekede upaı sanymen qarsylasynan basym túsken bolatyn. Alaıda 91 keli aýyr salmaqta Anton Pınchýk – Erıslandı Savonmen sharshy alańǵa shyǵyp, qarsylasyna ese jiberse , tórtinshi bolyp alańǵa 64 keli salmaqta Endı Krýzǵa qarsy Dilmurat Mıjıtov shyqty. Ol da qarsylasyna 47:48:48:47:48 upaımen ese jibergen edi.
Esterińizge salaıyq, sport dodasy Búkil álemdik boks serıasy WSB jobasynyń VII maýsymnyń fınaldyq jekpe-jegi bolyp tabylady. Birneshe kún buryn Qamshy.kz aqparat agenttigi «Astana Arlandarynyń» bas bapkeri Nurlan Aqúrpekov myrzanyń «Kýba qabylandary bizdiń Arlandar úshin qubyjyq emes» atty suhbatyn jarıalaǵan edi.
Onda, Prezıdent kýbogynda Ábilhan Amanqul bir qolynan jaraqat alǵany, jýyqta daıyndyq ústinde ekinshi qolyn da jaralap alǵany, sondyqtan fınaldyq kezdesýde ornyna Saparbaı Aıdarov shyǵatyny aıtylǵan bolatyn. Keıinnen jaraqatyna baılanysty alańǵa shyǵar-shyqpasy belgisiz qalǵan Ábilhan Amanqulǵa dárigerlerdiń tekserýinen soń ruqsat etilgen bolatyn.
Ol týraly bapkeri Aqúrpekov «Ábilhannyń jaraqaty aýyrlaý bolǵany ras. Onyń ústine ol tamyz aıynda Germanıanyń Gambýrg qalasynda ótetin Álem chempıonatyna qatysýy kerek. Ol dodaǵa baılanysty oqý-jattyǵý jumystary 12-shi shildede bastalady», - degen edi.
Bir aıta keterligi kýbalyqtar bul fınalǵa kileń Olımpıada, Álem chempıondaryn, tek qana birinshi nomerli boksshylaryn ákelgen. Al «Astana Arlandary» komandasy ekinshi, úshinshi, tórtinshi nomerli boksshylardan quralsa da Ózbekstan, Reseı, Ázirbaıjan, Qytaı, Anglıa sıaqty elderdiń tek qana birinshi nomerli boksshylaryn jeńip, fınalǵa jetken.
Kásipqoı boksta qazaqtyń týyn jedbiretip júrgen jigitter Meıirim Nursultanov, Madıar Áshkeev jáne Asqat Ýalıhanov Búkilálemdik boks serıasynyń WSB jobasy boıynsha fınalǵa shyqqan «Astana Arlans» boksshylaryna sáttilik tilegen edi.
