Kisi qaıtys bolǵan úıdegi aınanyń betin jaýyp qoıý – sonaý kóne slaván halqynda oryn alǵan dep jazady Qamshy.kz aqparat agenttigi ihsan.kz-ke silteme jasap.

Onyń mánisin ártúrli etip túsindiredi. Sonyń birinde, aına eki jaqtylyq nyshany bop tabylady-mys. Iaǵnı, aına o dúnıe men bu dúnıe arasyndaǵy jáne tylsym álem men materıaldyq dúnıe arasyndaǵy baılanys quraly, kópir ispetti. Sondyqtan máıit shyqqan úıdegi aınalardyń betin úsh kún boıy jaýyp qoıatyn bolǵan. Óıtkeni, marqumnyń rýhy úsh kún ishinde denege oralýy múmkin eken. Eger osy sátte rýhtyń beınesi aınada kórinse, onda ol denesine qaıta orala almaı, arǵy ómirde máńgige qalyp qalady-mys.

Álgindeı yrym Islamda negizsiz bolyp tabylady. Soǵan senip, arnaıy sol úshin qaıtys bolǵan úıdegi aına betin jabý durys emes. Eshqandaı  zat (atalmysh maǵynada) o dúnıe men bu dúnıe arasynda kópir bola almaq emes. Jáne ólgen kisiniń rýhy o dúnıege attanǵannan keıin osy dúnıege qaıta oralmaıdy. Buny Quranda bylaısha baıan etken:

«Eger olardyń áldebireýine ólim kelse: «Qudaıym! Meni dúnıege qaıtara gór! Múmkin men qaldyrǵan dúnıede izgi amal istermin», – dep (jalbarynady). Áste (olaı bolmaıdy)! Shynynda bul bosqa aıtylǵan sóz (tilekteri júzege aspaıdy). Olardyń artynda qaıta tiriletin kúnge deıin bóget bar». [Mú’mınýn súresi, 99-100 aıat].

Abdýsamat Qasym