Qazaqstan bıligindegi shendilerdiń ishinde Qaırat Qojamjarovtyń orny bólek. Qurylý tarıhy sonaý 90-jyldardyń aıaǵynan bastalatyn Memlekettik qyzmet isteri jáne sybaılas jemqorlyqqa qarsy is-qımyl jónindegi Agenttikte kúni keshege deıin birneshe basshy aýysyp qana qoıǵan joq, memlekettik qurylymnyń ózi de birneshe ret ózgeriske ushyrady. Bir kezderi Memlekettik qyzmet isteri men jemqorlyqpen kúres (qarjy polısıasy) agenttikteri óz aldyna jeke vedomstvo da boldy.
Sońǵy ret 2016 jylǵy 13 qyrkúıekte Prezıdent Jarlyǵymen QR Memlekettik qyzmet isteri jáne sybaılas jemqorlyqqa qarsy is-qımyl agenttigi qaıta quryldy. Agenttik basshylyǵyna osy vedomstvony 2014 jyldyń 6 tamyzy men 2015 jyldyń 11 jeltoqsany arasynda basqarǵan Qaırat Qojamjarov taǵaıyndalǵan bolatyn. Antıkorrýpsıalyq salada Qaırat Perneshulynyń esimi kópke tanys. Atalǵan vedomstvo sybaılastyq sıpaty bar talaı shýly isterdi tergep, sotqa jetkizgen. Eks-premer Serik Ahmetov, «Astana EKSPO-2017» ulttyq kompanıasynyń burynǵy basshysy Talǵat Ermegıaev isin eshkim umyta qoımady. Byltyrǵy aty-shýly prosesterden Qazaqstan Jýrnalıser odaǵynyń tóraǵasy Seıitqazy Mataev pen jýrnalıs Bıgeldi Ǵabdýllın isin de Q. Qojamjarov basqarǵan Jemqorlyqqa qarsy is-qımyl jónindegi Ulttyq búro júrgizgenin bilesiz.
Zor qoǵamdyq rezonans týǵyzatyn shýly istermen tanymal agenttiktiń basshysy Q. Qojamjarov kópten beri el nazarynan joǵalyp ketti. Sońǵy ret ol aqparat quraldaryna jyl basynda ǵana shyǵyp, «Báıterek» Ulttyq holdıńindegi qarjy jymqyrý oqıǵasyna qatysty pikir bildirgen bolatyn. Odan keıin Perneshulyn basylym betterinen baıqamadyq. Agenttik ótkizgen nemese sybaılas jemqorlyq, memlekettik qyzmetke qatysty sharalarda kóbinese orynbasary Alık Shpekbaev tóbe kórsetip júr. Aqparat quraldary da bul salaǵa qatysty materıaldarynda A. Shpekbaevtyń sózderine silteme jasaýda.
Basshynyń barlyǵy tań atqannan kún batqanǵa deıin eldiń kóz aldynda júrýge nemese gazet betinen, kógildir ekrannan túspeýge mindetti emes, árıne. Biraq, eger ol basshy jýrnalıserden jaltarmaıtyn, óz jumysyna qatysty BAQ-pen tyǵyz baılanys ustaıtyn sheneýnik bolsa, kópshiliktiń «Bul nege kórinbeı ketti?» – deýi zańdy. Onyń ústine áne-mine jaz da aıaqtalyp, qońyr kúzben birge jańa saıası maýsym bastalady. Jańa maýsymnan jurtshylyq kóp jańalyq kútedi.
Osy jerde Q. Qojamjarovtyń jurt nazarynan joǵalyp ketýimen tikeleı baılanysy bolmasa da, ol basqaratyn agenttik qyzmetine qatysty myna bir jaıtty atap ótken jón. Shildeniń basynda Almatyda Talǵat Mahatov esimdi azamat Medet Jamashev degen kedenshiniń ólimine qatysy bar degen kúdikpen qamaýǵa alyndy. T.Mahatov osydan 5-6 jyl burynǵy ataqty «Qorǵas isinde» basty kýáger bolǵanyn búginde bireý bilse, bireý umytyp úlgerdi. Atyshýly is týraly az-maz málimet biletinderdiń boljaýynsha, qazirgi tańda «Qorǵas» daýyna qatysty jańa jaǵdaılar paıda bolyp, tergeý jandanǵan kórinedi. Jyl basynda birqatar zańnamalarǵa engen ózgeristerge saı, jemqorlyqqa qarsy qyzmet ókilderiniń qatysy bar qylmystar boıynsha tergeý, izdestirý jumystaryn júrgizý Ulttyq qaýipsizdik komıtetine júktelgen bolatyn. Bul oqıǵa jaı ǵana kezdeısoqtyq pa, álde qos kúshtik qurylym arasynda shynymen shıelenis týǵanynyń kórinisi me, ol jaǵyn jaqynda biletin bolamyz.
Jeńis SABYRJANULY
