AQSH-qa «Irma» daýylynyń jaqyndap kele jatqany habarlanǵan bolatyn. BUU  atalmysh daýylǵa qatysty pikir bildirdi. BUU-nyń baǵalaýy boıynsha, «Irma» daýylynan 37 mıllıon adam zardap shegýi múmkin. Bul týraly BUU baspasóz hatshysy Stefan Dújarrık málimdedi dep jazady Qamshy.kz aqparat agenttigi.  

BUU Barbados aralynda tótenshe jaǵdaıǵa daıyndyqtyn jasalyp jatqanyn málimdedi.

Dúleı jel eń joǵarǵy kórsetkishten, ıaǵnı bes baldan da asyp túsken. Mamandardyń aıtýynsha, ol Atlantıkadaǵy sońǵy onjyldyqta soqqan eń surapyl daýyl bolady.

Karıb aımaǵyn jer men jeksen etken daýyl basqa da jerlerdi joıýda. Barbýda araly men Fransıa bóligindegi Sen-Marten aralynyń biraz bóligin sý shaıyp ketken.  Barbýda aralyndaǵy múliktiń 95 paıyzyna zaqym kelgen, onyń 30 paıyzy bútindeı joıylyp ketken. Sońǵy málimetter boıynsha, alapat daýyldan qaza bolǵandar sany 7 adamdy qurap otyr. Búgingi tańda daýyldyń saldarynan aýyz sý toqtaltylyp, elektr toǵy ajyratylǵan.

Meteorolgtardyń aıtýynsha, 7 qyrkúıek kúni «Irma» daýyly Domınıkan Respýblıkasy, Gaıtı jáne Kýbanyń ústinen ótip, AQSH-tyń Florıda shtatyna jetedi.  Kýbanyń 7 aýdanynda tótenshe jaǵdaı jarıalanyp úlgergen.  Al Maıamıde adamdar dúkenderden qajetti zattaryn satyp alyp, tótenshe jaǵdaıǵa daıyndalyp jatyr.

Aıta ketsek, Atlantıkada «Irma» daýylynan bólek taǵy 2 daýyl óz kúshine enip jatyr. Olar: Hose men Katá daýyldary.