29 qyrkúıek. Keshqurym shaq. Astana qalasy. Meıramhana. Ákimdikten kelgen jigit meıramhana dırektoryna sóıledi:

– Merekelerdiń bári ótti. Endigi josparda – jańa jyl merekesi. Jańa jyl merekesine oraı meıramhanalar ishki-syrtqy bezendirýlerin bastaý kerek. Sizderge 2 apta ýaqyt beremiz.

Meıramhana dırektory:

– Aınalaıyn, baýyrym! Endi ǵana qyrkúıektiń aıaǵy boldy. Jańa jylǵa deıin tolyq 3 aı bar. Daıyndyqty erte bastap ketken joqsyzdar ma?

Ákimdik ókili:

– Joq!

Meıramhana dırektory:

– Jańa jylǵa eshqandaı daıyndyq bastamaımyn.

Ákimdik:

– Bul – ákimdiktiń sheshimi. Oǵan qarsy kelseńiz, iri kólemde aıyppul tóleýge májbúr bolasyz.

Meıramhana dırektory:

– Báribir daıyndyqty erte bastamaımyn. Sebebi, jańa jylǵa deıin alda qundylyǵy joǵary meniń qos merekem tur. Ol – Respýblıka kúni men Táýelsizdik kúni. Meniń ata-babamyn qanymen, janymen kelgen Táýelsizdiktiń quny jańa jyldan qashan da bıik.

Joǵarydaǵy dıalog Astana qalasynyń sol jaǵalaýyndaǵy «Saya Sushi» meıramhanasynyń dırektory Nurbolat Ábilhan men Esil aýdany ákimdiginiń qyzmetkeri arasynda órbigen. Bálkim, kóptegen mekemelerdiń basshylyǵyna tańsyq bolmas. Baıqaǵanymyzdaı, elimizde jańa jylǵa daıyndyq 3 aı buryn bastalyp ketti. Oqıǵanyń mán-jaıyn tolyǵyraq bilý maqsatynda Qamshy.kz aqparat agenttiginiń tilshisi meıramhana dırektory Nurbolat Ábilhannan suhbat aldy.

– Mundaı jaǵdaı birinshi ret boldy ma? Buǵan deıin de ákimdik osylaı 2-3 aı buryn keletin be edi?

– Iá, byltyr da kelgen, biraq qarashada. Al osy jyly qyrkúıek bitpeı jatyp jańa jyldyq bezendirýdi talap etip otyr.

– Ótken jyly qalaı bolyp edi? Daıyndyqty qarashada bastap kettińizder me?

– Jo-joq, 16 jeltoqsandy ótkizip, 20-syna qaraı meıramhanany bezendirdik. Bizdiń meıramhana buryn Astananyń oń jaǵalaýynda bolatyn. Ol ýaqytta ákimdik meıramhanamyzdy jıi teksermeıtin.  Endi sol jaǵalaýǵa, Báıterek mańyna kóship kelgeli tekseris jıiledi. Ákimidikten qyzmetkerler ár aı saıyn keletin, osy joly da jaı ǵana tekserýge kelgen bolar dep oıladym. Biraq jaǵdaı basqasha boldy.

– Al sizdiń meıramhanańyzdyń ujymy jańa jylǵa daıyndyqty qashan bastaıdy? Jáne qansha qarjy bólesizder?

– Artymda biraz elim tur, qoldaıtyndar da kóp. Soǵan súıenip osy joly jańa jyldyq bezendirýdi Táýelsizdikti ótkizip alǵannan keıin bastaımyn. Jańa jylǵa daıyndyqqqa artyq shyǵyndanbaımyz. Kishigirim shyrsha men gırlánda úshin ary ketse 15-20 myń shyǵaramyz. Osy jetedi, arnaıy daıyndyq bolmaıdy.

– Ákimdik joǵarǵy dárjede bezendirýdi talap etetin bolsa, ne isteısizder?

– Ondaı jaǵdaıda aqparat quraldaryna júginýge májbúr bolamyz. Maǵan qatysy joq meıramǵa shashylmaımyn. Terezege jarq-jurq janatyn dúnıelerdi ilip qoıamyn. Qonaqtar meniń meıramhanamdy tańdap, maǵan kelgen soń men ol kisilerdi syılaýym kerek. Alaıda ult azamaty retinde jańa jyldy 16 jeltoqsannan keıin bezendiremin. Tutynýshylarym úshin jańa jyldyq kóńil-kúı syılaýǵa barynsha tyrysatyn bolamyz.

– Al Táýelsizdik merekesine oraı ákimdikten usynystar bola ma?

– Eshqandaı usynys túspeıdi. Ákmidik tek jańa jylǵa qarsy mazalaı bastaıdy.

– Eger sizge aıyppul salsa, ony tóleýge daıynsyz ba?

– Ony kóre jatarmyz... Biraq alǵan betimnen qaıtpaımyn, jańa jylǵa daıyndyqty Táýelsizdik merekesinen keıin ǵana bastaımyn.

– Al meıramhanalyryńyz Táýelsizdikke qarsy qandaı da bir sharalar ótkize me? Ózińiz atalmysh merekeni qalaı atap ótesiz?

– Bizdiń meıramhana ıtalán jine japon as mázirin usynady, kóbine sýshı-pıssa jasaımyz. Al qazaqy dástúrge saı taǵamdardy jasaýdyń reti kele bermeıdi. Sebebi, bizdiń baǵytymyz basqa. Eger kelgen qonaqtarymyz qandaı da bir sharany toılaımyz dep jatsa, olarǵa yńǵaılap jasap beremiz. Al Táýelsizdik meıramy bir-birimizdi shyn júrekten quttyqtap, qýanyshymzǵa ortaqtasatyn kún retinde ótedi. Arnaıy atap ótemiz dep aıta almaımyn.

Rasynda, jańa jyl merekesine áli 3 aı ýaqyt bar. Alaıda bılik basyndaǵy sheneýnikterimiz daıyndyqty bastap ta ketipti. Kúni keshe Almaty ákimdigi depýtattardan jańa jylǵa oraı qalany bezendirýge 429 mıllıon 323 myń teńge bólýdi suraǵan. Al depýtattar basqarmadaǵylardyń atalmysh usynysyn maquldaı ketken.

Elimizdiń Táýelsizdik alǵanyna aldaǵy jyly 27 jyl tolady. Qazaqstandyqtar úshin eń qýanyshty kúnge shırek ǵasyr tolsa da, jańa jyl merekesiniń kóleńkesinde qalyp qoıa beretini jasyryn emes. 2-3 aı buryn mıllıondaǵan qarjy bólinip, qyzý daıyndyq bastalyp, 1 jeltoqsanda-aq ár qalanyń basty shyrshasy jaǵylady. Al tuǵyry bıik Táýelsizdik alǵan uly kún jańa jyldyń tasasynda qalady. Oǵan bas aýyrtyp jatqan eshkim joq, atalmysh kúnge ary ketse 10 kún qalǵanda kóshelerge plakattar ilinip, 17 jeltoqsanda-aq plakattardyń ornyn jańa jyldyq jyltyraqtar qaıta basady.

Joǵaryda atalyp ótkendeı meıramhana, túrli mekeme basshylyǵyna jańa jyldyq bezendiýrler talap etiledi. Qarsy kelgenderdi aıyppulmen qorqytady. Iá, ol da mereke... Jańa jyldy joǵarǵy dárejede atap ótý Sovet úkimeti zamanynan sanamyzǵa sińip qalǵan. Alaıda ata-babalarymyz talaı ǵasyr ańsaǵan, sol maqsatta jandaryn qıyp, qandaryn tóge qol jetkizgen, kelesi urpaqqa mıras etip qaldyrǵan Táýelsizdikten bıik turmaý kerek ekeni eskerilýi qajet!

Daıyndaǵan: Gúlim JAQAN