Qyrǵyzstan prezıdenti Almazbek Atambaev memlekettik syılyqty tapsyrý rásiminde Qyrǵyzstanǵa "qazaqstandyq bılik tańyp otyrǵan" jetekshiler jaıly pikir aıtqan. Buǵan qatysty QR SİM málimdeme jasady. Qamshy.kz aqparat agenttigi de QR Prezıdenti Almazbek Atambaevtyń sózine qatysty óz narazylyǵyn bildiredi.
«Qyrǵyz qazaq bir týǵan» degen sóz bar. Qazaqstan men Qyrǵyzstan ejelden baýyrlas ári kórshiles el. Kórshisine qamqor bolyp úırengen qazaq halqy Qyrǵyzstanǵa talaı kómek kórsetti. «Oń qolyń bergendi, sol qolyń bilmesin» degen de sóz bar. Alaıda bul tusta únsiz qalý múmkin emes. Sebebi as bergenge taspen atý adamshylyqqa jat.
Osydan bir jyl buryn-aq Qazaqstan Qyrǵyzstanǵa tehnıkalyq kómek retinde 100 mln. dollar berdi. Bul qarjy baqylaý-ótkizý beketterindegi jaǵdaıdy jaqsartý jáne EAEO talaptaryna saı zerthana ornalastyrý úshin bólingen.
Munymen kórshi Qyrǵyz eline kórsetilgen kómek bitpek emes. Buǵan deıin «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy óteýsiz áskerı-tehnıkalyq kómek kórsetý týraly kelisimdi ratıfıkasıalaý týraly» zań jobasy qabyldanǵan. Osy rette óteýsiz áskerı-tehnıkalyq kómekti basa atap ótken abzal. Bul kelisimdi ratıfıkasıalaý arqyly eki memlekettiń áskerı-tehnıkalyq yntymaqtastyǵyn damytýǵa, sondaı-aq óńirlik jáne ujymdyq qaýipsizdikti odan ári nyǵaıtý kózdeldi.
Baýyrymyz dep júrgen Qyrǵyz halqyna Qazaqstan tarapynan tek dostyq, yntymaqtastyq, áriptestik qarym-qatynasty kózdeıtinin bile tura jáne ony is júzinde kórip mundaı málimdeme jasaǵany Qazaqstan úshin túsiniksiz.
Qazaqstanǵa qatysty aýyr sózderdi aıtpas buryn Atambaev ótkenge kóz júgirtip ótse ıgi edi. Qyrǵyzstan bastan qandaı qıyn kúnderdi ótkizse de kórshi ári baýyrlas el retinde Qazaqstan Qyrǵyzstanǵa kómek kórsetýge daıyn edi. Qazir de solaı. Ony QR SİM-niń búgingi málimdemesinen anyq ańǵarýǵa bolady.
2010 jyly Qyrǵyzstanda jaǵdaı turaqsyz bolyp, saıası jaǵdaı shıelenise túskende, ekonomıkasyna syzat túskende eń birinshi bolyp Qazaqstan qol ushyn bergen edi. Qazaqstan bıligi sol ýaqytta da aıanyp qalmaı, Qyrǵyzstanǵa gýmanıtarlyq kómek jiberdi.
Qyrǵyz baýyrlarymyzdyń Qazaqstanda emin-erkin jumys istep, nápaqasyn taýyp júrgeni bólek áńgime. Óz elinde joq jumysty Qazaqstannan taýyp júrgenin Atambaev umyt qaldyrǵan sekildi. Qansha qyrǵyz jastary Qazaqstanda bilim alyp jatyr. Qyrǵyz stýdentter jatyn oryn, shákirt aqy sekildi kómekterden de kende qalyp jatqan joq.
Ekijaqty yntymaqtastyqty odan ári damytý, onyń ishinde tehnıkalyq kómek kórsetý, temirjol tarıfterin sáıkestendirý, azamattarǵa qoıylatyn kóshi-qon talaptaryn jeńildetý týraly bastamalardy kóterip, eki el arasyndaǵy dostyq qarym-qatynasty odan ári nyǵaıtýdy ǵana kózdegen Qazaqstanǵa qatysty Atambaevtyń mundaı sózderi Qyrǵyzstan Prezıdentiniń saılaý aldyndaǵy arandatýshylyq mándi sóz dep túsinýge bolady. Sebebi Qazaqstannan tek jaqsylyq kóre otyra syrtynan shyndyqqa janaspaıtyn sózderdi aıtýyn basqalaı qalaı túsinýge bolady?!
