Búgin Qazaqstannyń Memlekettik týynyń avtory Sháken Nıazbekovtiń týǵan kúni dep habaralaıdy Qamshy.kz aqparat agenttigi.
Sháken Ońalsynuly – Taraz jerinde 1938 jyldyń 12 qazanynda dúnıege kelgen. Sheshesi jaǵynan polkovnık, Keńester Odaǵynyń Batyry Baýyrjan Momyshulynyń týysy bolyp keledi. Babasy — dana Tóle bı. On jasqa kelgen kezde, bir jyl ishinde áke-sheshesi ólip, kenetten tuldyr jetim qalady.

Orta mektepti bitirgennen keıin Sháken Nıazbekov ataqty «Mýhınkaǵa» (Lenıngradtyń V. I. Mýhın atyndaǵy joǵary kórkem-ónerkásiptik ýchılıshesi) oqýǵa túsedi. Stýdent kezinde ol Ermıtaj, Isaak sobory jáne Petrodvoresti qalpyna ketirý jumystaryna qatysady. Sháken Nıazbekov óziniń eń basty ustazy retinde Ábilhan Qasteevti ataıdy.

Sońǵy otyz jyldan astam ýaqyt kóleminde sýretshi kóptegen konkýrstarǵa qatysyp, birneshe ret jeńimpaz atandy. 1961 jyl — «Globýs» teledıdarynyń dızaıny úshin Chehoslovakıada berilgen altyn medal, 1964 jyl — Lenıngradta ótken «Beıbitshilikti qoldaımyz!» atty plakattar konkýrsynda birinshi oryn, 1982 jyl — Almaty qalasyndaǵy Respýblıka alańyn kórkem bezendirýden ótken konkýrsta birinshi oryn alǵan.

«Qurmanǵazy», «Kóbik shashqan», «Isataı Taımanov», «Abaı», «Shoqan Ýálıhanov», «Muhtar Áýezov», «Syrym Datuly», «Jambyl», «Qazaqstannan kelgen soldat», «Ana» degen jumystar sýretshiniń jeke kórmelerindegi katalogtardan qomaqty oryn alady. Onyń jetistikterine, sondaı-aq, patrıot Baýyrjan Momyshulynyń zıratyna qoıylǵan qulpytas pen Almaty qalasynyń eltańbasyn da jatqyzýǵa bolady.

1992 jyly ol Qazaqstan, TMD, Túrkıa, Germanıa, Mońǵolıa elderinen 1200-ge tarta sýretshi qatysqan konkýrsta jeńip shyqty.
Ataqty sýretshi 2014 jyldyń 16 tamyzynda 75 jasynda dúnıe saldy.