Redaksıamyzǵa Nuraly Qalıev esimdi zeınetkerden Qazaqstan Respýblıkasynyń Bas Prokýrory Asanov Jaqyp Qajymanulynyń atyna jazylǵan hat kelip tústi. Sol hatty nazarlaryńyzǵa usynamyz!
Qurmetti Jaqyp Qajymanuly!
Men ózińizge ulym Nurtýǵan Muzamelovtyń taǵdyryna alańdap, arnaıy hat jazyp otyrmyn. Úıdiń úlkeni «Orda buzar otyz jastan asqanda» Aqmola oblysy Selınograd aýdany Talapker aýyldyq okrýginiń ákimi bolyp taǵaıyndaldy. Bul 2014 jyly edi. Ol bul qyzmetke óz bilimimen, tájirıbesimen ári osyǵan deıin atqarǵan isteriniń nátıjeliligimen jetti.
Bir jyl ótken soń, ıaǵnı 2015 jyly 6 naýryzda aýyldyq okrýg aýmaǵyna qaraıtyn jer telimderin tekserý kezinde Nurtýǵan Muzamelov 41 jer ýchaskesiniń jalǵa alý merzimin uzartý jónindegi qujat jalǵan bolýy múmkin ekenin bilip, tıisti oryndarǵa shaǵym túsiredi. Óziniń mamandyǵy zańger bolǵandyqtan, ol bul iste bir shıkilik baryn tez túsingeni shúbásiz. Kóp ótpeı osy is boıynsha Selınograd aýdany ishki ister bólimi qylmystyq is qozǵaıdy. Bir qaraǵanda, mundaı ister qalypty oqıǵalardyń biri sekildi kórinýi múmkin. Alaıda, 2017 jylǵy 29 mamyr kúni dál osy tulǵa kúdikti bop tanylyp, 2017 jylǵy 16 maýsym kúni onyń áreketi QR QK-niń 177 babynyń 4 bóligi «a, b» tarmaqtarymen jáne atalǵan kodekstiń 235 baby 3 bóligimen qylmystyq is jasady dep dárejelenip (alaıaqtyq jáne uıymdasqan qylmystyq topqa qatysý), qamaýǵa alyndy. Iaǵnı, N.N.Muzamelov uıymdasqan qylmystyq topqa qatysyp, sol toptyń múddesine Talapker aýyldyq okrýginiń jer ýchaskelerin jalǵa alýdy uzartý jóninde zańsyz túrde 45 ókim shyǵarǵan dep aıyptalyp otyr. Qalaı túsinsek bolady? Ózi osy is boıynsha tekserý júrgiztip, quqyq qorǵaý organdarynyń nazaryn elden buryn aýdaryp, eń bastysy eki jyl boıy osy qylmystyq isti ashýǵa bar kúsh-jigerin jumsaǵan adamnyń ózi kúdikti retinde qamalǵany aqylǵa syıa ma? Eger bul iske óziniń qandaı da bir qatysy bolsa, ol mundaı qadamǵa múldem barmas edi ǵoı...
Tergeýshilerdiń taqqan kinási 45 jer telimin berý týraly sheshimderde Nurtýǵan Muzamelovtiń qoly qoıylǵan bolyp shyqty. Biz amalsyzdan qoıylǵan qoldy sot saraptamasynan ótkizdik. Qazirgi tańda qoljazbany taný saraptamasy ótkizildi, 2017 jylǵy 28 maýsymdaǵy №1335 jáne 2017 jylǵy 21 shildedegi №1691 sot qorytyndysyna sáıkes barlyq zańsyz shyǵarylǵan ókimderge N.N.Muzamelovtyń qoly qoıylmaǵan, ıaǵnı N.N.Muzamelovtyń qolyn sáıkestendirip qoıýǵa tyrysqan basqa tulǵanyń qolymen oryndalǵany ekspertıza boıynsha anyqtaldy.
Joǵaryda tizbektelgen saraptama qorytyndysy negizinde tergeý organdary atalǵan tulǵaǵa qatysty qylmystyq isti toqtatýǵa mindetti edi, alaıda áli kúnge deıin ol oryndalǵan joq. Tergeý áli júrip jatyr.
Bul is boıynsha shyndyqty talap etý maqsatynda barlyq mán-jaıdy búge-shigesine deıin jazyp, kómek suramaǵan adamymyz kemde-kem. Aýyl ardagerleriniń atynan da ótinishter tústi, olar óz sózderinde aýylda bundaı ákimniń buryn-sońdy bolmaǵanyn, óziniń jas ekendigine qaramastan burynǵy ákimderdiń oılaýǵa da shamasy jetpegen tıimdi is-sharalar ótkizgenin, aldyna qoıǵan maqsatyn tıanaqty da aıqyn oryndaıtynyn, ózekti máseleniń árqaısysyna jan-tánimen kirisip, jedel sheshim qabyldaı alatyny týraly jazǵan. Aýyl halqy ulymnyń aq ekenine senedi ári basyna túsken bul qıyndyqty jeńip, aýylǵa qaıta oralsa eken dep tileıdi.
Tergeý barysynda N.Muzalemovtyń qoly qoıylǵan qujattardy tirkeýge N. esimdi tulǵa ákelip otyrǵan, qazirgi tańda ol kisi qaıtys bolǵan. Tergeý barysynda N.Muzalemovtyń qolyn qoıǵan naqty sol tulǵa ekenin taný saraptamasy taǵaıyndaldy. Eger ol kisi bul ómirde joq bolsa qaıtys bolǵan tulǵanyń qoljazbasyn tanýdy qalaı anyqtaýǵa bolady?
Dál osy sátte, birneshe shynaıy fakti bolsa da tergeý isi qandaı maqsatqa jetýdi kózdeýde degen suraq kókeıge ózinen ózi orala túsedi. Eger uıymdasqan qylmystyq toptyń kinási dáleldengen bolsa onda nege tek meniń ulymdy ǵana qamap otyr? Ózge músheler nege bostandyqta júr? Onyń qamaýǵa alý ýaqytyn únemi soza berýdiń ne qajeti bar? Álde tergeý naqty N.Muzalemovty qurbandyqqa shalýǵa bekinip otyr ma? Sebebi olarǵa aýyldyq ákim bolsa da, bildeı bir ákimdi quryqtadyq degen úlken jetistik bolyp tabyla ma? Meni mazalaıtyn suraqtar kóp.
Aıtpaqshy, aıyptaý tek sol uıymdasqan qylmystyq top jetekshisiniń aıtýy boıynsha ǵana qurylǵan. Sondaı-aq, on shaqty qylmystyq is jasap, sol qylmystyq áreketke jıyrmadan astam adamdy tartqan top jetekshisi bostandyqta júr. Sonda qylmystyq topty qurýshy adam «tergeýge kómektesemin» degen jeleýmen bárinen qutylyp, solardyń zańsyz áreketimen kúresken ulym aıypty bolmaq pa? Qylmystyq top qurǵany dáleldengen adamnyń kýálandyrýy boıynsha meniń ulymdy qamap otyrǵandary, onyń aıtýynan basqa birde bir dálel-dáıektiń joqtyǵy nege eskerilmeı otyr? Meniń ulym Nurtýǵan Nuralyulynyń kámelet jasyna tolmaǵan 3 balasy bar. Sol nemerelerim kórgen saıyn: «Ata, ákem qashan keledi?» dep suraǵanda, júregim ezilip ketedi. Olarǵa «jýyqta keledi» dep aıtýdan sharshadym.
Qadirli Jaqyp Qajymanuly!
Sizdi Elbasynyń senimdi serigi ári ádiletti jaqtaýshy, ary da, jany da taza adam dep bilemin! Árbir isińizge syrttaı súıinip júremin. Aýdandyq tıisti mekemelerden qaıyr bolmaǵan soń ózińizge júginip otyrmyn. Bir qaraǵanda bul bir kishkene is bolyp kóriner. Biraq atpal azamattyń, bir otbasynyń taǵdyry turǵanyn qaperge alarsyz degen úmittemin. Men elimizde ádildiktiń baryna sengim keledi.
Qurmetpen Nuraly QALIEV,
zeınetker.
