Menen asqan baqytty jan joqtaı edi. Meniń ǵana ómirim qýanyshty sátterge tunyp tur. Aspandaǵy kún men úshin ǵana sáýlesin tógip turǵandaı. Tabıǵattyń sulýlyǵy tek maǵan arnalǵandaı. Ol adam tek men úshin jaralǵandaı.
Kóktóbeniń keshinde kele jatyrmyz adymdap. Diril qaqqan saýsaqtarymdy qatty qysty da, «Qobaljyma» dep únsiz ǵana jymıyp qoıdy. Uıań ekenimdi jaqsy biletin. Júzine tik qaraı almaıtyn edim. Sol úshin de baqytty boldym. Meniń janymdy, ishki syrymdy odan basqa eshkim túsine almaıtyndaı... Maǵan Allanyń jibergen syıy ǵoı bul dedim. Alla adamdy jaratarda oǵan jup retinde ekinshi jartysyn birge jaratady eken. Mine, meniń jubym – osy dedim. Baqytty ekenimdi dúıim jurtqa jaıǵym keletin. Men súıetin, meni súıetin janmen qol ustasyp birge kele jatqanymdy bar álemge kórsetkim keletin.
Telefonym shyr etti:
–Alo!, - dedim qobaljyǵan únmen.
–Qalaısyń, altynym? Búgin bossyń ba?
«Bos bolmasam da, sen úshin qalaı da ýaqyt tabamyn» dep aıtqym kelgeni...
–Iá, - dedim jaı ǵana.
–Onda daıyn bol, keshki saǵat 8-de alyp ketemin.
Júregimniń dúrsil qaqqany-aı. Ár kezdesýimizde alǵash ret kezdesip jatqandaı qatty qobaljıtynmyn. Qobaljyǵan sátterimde alaqanym sýlanyp ketetin ádetim bar. Onyń altyny bolǵanyma 2 aı ótti. Áli de sýlanyp tur qurǵyr alaqanym. Ol muny da jaqsy biletin. Alaıda mán bermegendeı, baıqamaǵandaı kúı tanytyp júrdi. Sol úshin oǵan sheksiz rıza edim.
Keshki saǵat 20:00. Ádemi kóılek, jupar ıissý, opa-dalap, dap-daıyn otyrǵan qyz... Telefonym taǵy da shyr ete tústi. Kelip tur eken. Qobaljyǵannan júregim alqynyp tur... «Joq, toqta, qazir shyǵa salsam, menimen kezdesýge asyq eken dep oılap qalady, ózge qyzdar sekildi biraz kúttireıin» dedim de 20 mınýttaı otyrdym terezege úńilip. Biraq, shyǵýǵa asyqpyn. Qudaıym-aý, shyǵa salsam nesi bar eken deseńshi? Qyz bala birinshi kezekte ar-namysyn oılaý kerek, eshqashan birinshi qadam jasamaý kerek, jigitke sezimin bildirmeý kerek degen ápke-jeńgelerimizdiń sózin ábden sińirip óstik qoı qulaqqa. Nem bar edi sony estip? 20 mınýtym 20 saǵattaı sozylyp ketti.
Mine, ýaqyt keldi degende ádettegi uıań qalpymmen esik aldyna shyqtym. Qolyna gúl shoqtaryn ustaǵan men úshin minsiz jigit meni tosyp tur. Suńǵaq boıly, sportpen aınalysatyndyqtan denesi de shymyr, túr-álpeti kelisken, dál meniń ıdealymdaǵy jigit. Onyń minsizdigin túr-álpeti ǵana aıshyqtap turǵan joq, naǵyz er-jigitke tán minezdiligine tánti bolatynym.Sabyrly, salmaqty, ustamdy, aqyldy, sanaly, eń bastysy ózgege degen syı-qurmeti men kishipeıildiligi sheksiz edi. Dál sondaı jigit meni kútip tur. Iá, meni... Sony sezinýdiń ózi bir ǵanıbet, bir ǵajap!
Ádettegideı qol ustasqan kúıi Almatynyń kóshelerin kezip kele jatyrmyz. Jaıaýlatyp birneshe shaqyrym júrgen ekenbiz. Almatynyń kósheleri, aǵashtary, taýlary bizge qyzyǵyp ta, qyzǵanyp ta qarap turǵandaı. Onyń janynda Almatyny jaıaý aralaýǵa daıynmyn. Eń bastysy janymda bolsa eken, qolymdy qysyp janymda júrse eken...
Sharshaǵanymdy úıge kelgende ǵana baıqadym. Aıaqtarymnan kúsh ketip, álsirep qalǵan ekenmin. Onyń janynda júrgende sharshaǵanymdy baıqamappyn, sol úshin de baqyttymyn.
Osy qalpynda 4 jyl zymyrap óte shyqty. Sol sezim, sol Almaty, sol kóshe, sol taldar, sol taý... Tek ózgergen ekeýmizdiń armanymyz, maqsatymyz. Sebebi arman-maqsatymyz bir arnaǵa oıysty, eki jarty bir bútin bolýǵa asyqpyz. Sony sezinýdiń ózi bir ǵanıbet, bir ǵajap!
Al dál qazir nege mazasyzbyn? Júregim nege tolqyp tur? Belgisiz bir úreı paıda bolypty. «Nege ózgelerine buıyrmaǵan baqyt maǵan buıyrdy?» degen oı mazalaıdy. Erekshe baqytty bolǵanym úshin boıymdy alǵash ret qorqynysh sezimi uıalady. Túsiniksiz sezim...
Bir ǵana tilegim bar, ózime málim...
G. J.
