Tek jumys bergeni úshin qýanyp, aýyldardan qalaǵa kelip, jalaqysyn ala almaı aldanyp qalatyndar qanshama. Eki-úsh aı jumysyn istetip alyp, aqshasyn berýge kelgende júz aıla taýyp, qurylysshylardy san ret sandaltatyndardyń jazasyn kim bermek?
Tek keıbir úlken mekemeler salyp jatqan qurylystarda ǵana bolmasa, ózge jumys berýshiler qurylysshylarmen eshqandaı kelisimshartqa otyrmaıdy da. Olardy zań júzinde jazaǵa tartý múmkin emes bolyp qalady. Al bireýdi sotqa bermek túgili, bir úzim nan tappaı júrgen qurylysshylar jumys berýshi tarapynan jasalǵan qandaı qorlyqqa bolsyn shydap baǵady.
Alysqa barmaı-aq, mysal keltirsek, tipti EKSPO nysandarynyń qurylysyna qatysqan qurylysshylar jarty jyldan asa jalaqysyn ala almaı júr. Bul týraly Azattyq saıty anyqtaǵan bolatyn.
Sáýir aıynan bastap jalaqysyn surap júrgen qurylysshylar «Estetıka Mramor» kompanıasynyń tabaldyryǵyn tozdyrdy. Olardyń jeti aı sandalýyna ketken shyǵynnyń ózi alar nápaqasyna teńelgen ýaqyt boldy. Al Astanada qalyp, kútip júre berýge shydamaǵandar aýyldaryna ketip qalǵaly qashan. Olardan jalaqy kútken otbasynyń hali qandaı jaǵdaıda ekendigin oılaýdyń ózi janyńdy aýyrtady.
18 jastaǵy Múslim Nurıtdın Astanaǵa Almaty oblysynyń Báıterek aýylynan kelgen. Onyń EKSPO qurylysyna qatysqandaǵy maqsaty otbasyn qystan shyǵarý úshin kómir satyp alý bolǵan. Ol ashynyp turyp bylaı dedi:
«Astanaǵa oınap-kúlý úshin emes, EKSPO-ny kórý úshin emes, jumys isteýge keldik, bári tirshilik úshin...»
Sońǵy on kún shamasynda jalaqy almaǵan qurylysshylar Sembol kompanıasy keńsesine kúnde keletin bolǵan. Olardyń biri, Qalimjan Sultanqulovtyń aıtýynsha, ár kelgen saıyn «Estetıka Mramor» kompanıasy ókilderi túrli syltaýlar aıtady:
«Joq, qashyp ketti. Kelisimshartta meniń ruqsatymsyz aqsha berilmesin degen adam, keledi de qaıta qashyp ketedi, ustaı almaı qalamyz. Ol Túrkıa azamaty, tek atyn ǵana bilemiz Shaban degen».
Tilshiler «Estetıka Mramor» kompanıasynyń basshylyǵymen habarlasa almady. Qurylysshy toptyń brıgadıri Bahadyr Tóleshovtyń aıtýynsha, «aqshany alǵan adam qashyp júr»:
«Bireýi Máskeýge qashyp ketken, al Qazaqstanda qalǵany: «meniń eshqandaı qatysym joq, sotqa berseń de, kimge barsań da óziń bil» deıdi».
Esesine Azattyq tilshisi kompanıasynyń esepshisimen tildesti. Esepshi óziniń betin búrkep, aty-jónin ataýdan bas tartty. Ol kompanıa basshysy Hasan Ózgenchtiń issaparmen Reseıge ketkendigin aıtady. Olar «Estetıka Mramordyń» jalaqy berýge qatysy joq jáne endi jaýapty Sembol kompanıasy ekendigin aıtady.
«Sembol bizge qarjy bólmeı otyr, sol sebepti biz jumysshylardyń jalaqysyn bere almaımyz. Eger olar tólese biz birden jalaqyny beremiz. Qansha aı ótti, maýsym aıynan bastap aqsha áli joq. Sembol tarapy EKSPO -da istelmeı qalǵan jumystar bar ekendigin aıtyp, sony syltaýlatyp otyr».
Sembol kompanıasynyń qarjy dırektory Haırıtdın atalmysh jaǵdaıǵa pikir bildirgisi kelgen joq.
Brıgadır Bahadyr Tóleshov kompanıanyń ne úshin bulaı istep otyrǵanyna tańdanýda, ol 33 mıllıon qarjyǵa qurylystyń salynyp, sonyń ishinen jumysshylar jalaqysy berilý kerektigin alǵa tartady.
Jumysshylar Sembol kompanıasyn osylaı qaldyrmaı, áli de keńseniń aldyna jınalýyn toqtatpaıtyndyqtaryn aıtady.
Bul Qazaqstanda qurylysshylardyń eńbegin, tókken terin tegin paıdalanyp, aqysyn jegen myń jaǵdaıdyń tek bireýi ǵana. Sondyqtan, mundaı jaǵdaıdy boldyrtpas úshin kez kelgen qurylys jumysyna kelispes buryn kelisimshart jasasý mindettelse eken.
