Álemdegi iri áleýmettik jelilerdiń biri Facebook qazaq tilin meńgergen, Qazaqstan jáne Ortalyq Azıa óńiriniń dástúri men mádenıetin tereń biletin maman izdep jatyr, dep habarlaıdy Qamshy.kz aqparat agenttigi «QazAqparat» málimetine súıenip. 

Kompanıa óziniń Facebook-tegi resmı paraqshasynda jarıalaǵan habarlamada úzdik úmitkerdiń Qazaqstan naryǵyn zertteýmen aınalysatyn komandamen birge jumys isteıtini habarlanǵan. Jumys orny Irlandıanyń Dýblın qalasyndaǵy keńsesinde ornalasqan. Úmitker Qazaqstandaǵy qoldanýshylardan kelgen saýaldarǵa jaýap berip, qazaq tilindegi kontenttiń habarlamalaryn tekserýmen aınalysady, qoldanýshylarǵa qoldaý kórsetip, akkaýntqa qatysty týyndaǵan máselelermen aınalysady.

Úmitker jyldam ári sapaly jumys istep, Qazaqstanda bolyp jatqan sońǵy oqıǵalardan habardar bolyp otyrýy tıis. Sondaı-aq, onyń bakalavr men magıstr oqý dárejesi nemese saraptamalyq jobalar salasynda jumys ótili bolýy tıis. Úmitkerden aǵylshyn jáne qazaq tilderin erkin meńgerýi talap etiledi. Excel jáne SQL baǵdarlamalarymen jumys isteı alýy - úlken artyqshylyq bolmaq.