Qamshy.kz aqparat agenttiginiń tilshisi nazarlaryńyzǵa álemdik saıasatta boı kórsetip júrgen symbatty hanymdar tizimin usynady. 

Ivanka Tramp

AQSH prezıdenti Donald Tramptyń tuńǵyshy jáne Aq úıdiń keńesshisi Ivanka Tramp ákesiniń eń súıikti perzenti. Ol Tramptyń birinshi áıeli Ivanadan týǵan. Ivanka buryndary sánbıke bolýmen qatar, TV shoýlarda boı kórsetken. Qazirde óziniń kásibin dóńgeletip otyr. 36 jastaǵy Prezıdent qyzy 2009 jyly mıllıarder Djered Kýshnermen shańyraq kótergen.

«Saıasattan aýlaq bolǵym keledi» degen málimdemesine qaramastan, Ivanka amerıkalyq Prezıdentke saıası sheshimder qabyldaý kezinde óz pikirin bildirip otyratyndyǵyn jarıa etti.

Tramp qyzynyń qupıa baılanystary joqtyǵynan jáne oǵan tolyqtaı sene alatyndyǵynan,  kóptegen máseleler jóninde keńesedi. Alaıda, Ivanka men Donald Tramptyń pikiri únemi bir jerden shyǵa bermeıdi. Máselen, Fox and Friends basylymyna bergen suhbatynda Ivanka:

-Men saıasattan boıymdy aýlaq ustaýǵa tyrysamyn. Ákemniń saıası túısigi tańǵalarlyq. Ol basqalary bitire alatyndyǵyna kúmándanǵan isterdi tyndyrdy. Ol bılikke kelgen birinshi kúnnen bastap, meniń de oǵan aralasqanyma qýanamyn. Árıne, kóp jaǵdaıda ákemniń oıymen kelise bermeımin jáne ózimdi saıası qaıratker bolady dep te eseptemeımin,-degen Ivanka álemdik saıasatta boı kórsetip júrgen sulý áıelderdiń biri.

Melanıa Tramp

Suńǵaq boıly, symbatty  Amerıkanyń birinshi hanymy Melanıa Tramptyń bes tilde (ana tili – slován, aǵylshyn, fransýz, serb jáne nemis) erkin sóıleı alatyndyǵyn kópshiligi bile bermeıdi.

Melanıa on jyl shamasynda túrli tanymal sándik Vogue, Harper Bazaar, Ocean Drive, Avenue, InStyle jáne New York magazine basylymdardyń basty betterinen túspeı keldi. Árıne, bas kezde sán jýrnaldaryna jalańash túsken sýretteri men Tramptyń qasynda saılaý naýqanynda bolmaýy synalsa da, qazirgi kezde jurt ony birinshi hanym retinde qabyldady.

Melanıanyń ákesi avtokólik saýdasymen aınalysqan, al anasy sán dızaıneri. Qazirgi kezde birinshi hanymnyń bir uly jáne tórt ógeı balasy bar.

Saıasatta Melanıa men Ivankanyń kıim kıý úlgileri eki túrli taptyń beınesin aıqyndaıdy. Máselen, Melanıa Tramp kópshilikke shabyt bergisi kelip, óte qybat Dolce & Gabbana, Ralph Lauren jáne Balmain syndy qarapaıym halyqtyń qaltasy kótere bermeıtin brendterden kıinedi. Al Ivanka bolsa, orta tap ókilderi tańdaıtyn Zara syndy arzanyraq dúkenderdi qanaǵat tutady.

Brıjıt Makron

Fransıa Prezıdenti Emmanýel Makronnyń jary Brıjıt Makron birinshi hanym rólin tek beıresmı túrde ǵana atqaratyndyǵyn aıtty. Bul sheshim fransýzdardyń jańa Prezıdent Emmanýeldiń áıelin Fransıanyń alǵashqy resmı birinshi hanymy retinde taný týraly josparyna qarsylyǵy esepti bolǵan.

Onyń ústine Fransıa bıligi saıasatkerlerdiń otbasy múshelerin jemqorlyqqa qarsy qozǵalysqa qatystyrýǵa tyıym salý týraly sheshimin shyǵarǵaly qashan.

315 myńǵa jýyq Fransıa turǵyny Makron hanymnyń úkimetten jalaqy alýyna qarsylyqtaryn bildirgen petısıaǵa qol qoıdy. Al memleket óz kezeginde Brıjıt hanymnyń atqaratyn isterine qansha tólenetindigi jarıa etiletindigin habarlaǵan.

Osy jaǵdaıdan keıin ornaǵan tynyshtyqty buzǵan Brıjıt Makron ózin birinshi hanym retinde sanamaıtyndyǵyn jáne bul róldi tek beıresmı túrde ǵana atqaratyndyǵyn aıtty. Al burynǵy birinshi hanym, Fransý Ollandtyń áıeli Valerı Trıerveılerge 2013 jyly fransýz búdjetinen €400,000 qarjy jumsalǵan bolatyn.

Haıa bınt Al Hýsseın

Dýbaı sheıhi Muhammedtiń ekinshi áıeli Haıa bınt Ál Hýseın 1974 jyly 3 mamyrda Iordanıa koroli Hýsseınniń otbasynda dúnıege kelgen.  Haıa Angıadaǵy Dorsettegi Bryanston School-da jáne Oksford ýnıversıtetine qatysty qasıetti Hılda kolejin fılosofıa, saıasat jáne ekonoıka salalaryn úzdik támamdaǵan.

Hanshaıym Tikyet Um Ali atalatyn Iordanıadaǵy ashtyqpen kúresetin gýmanıtarlyq qordy qurdy. Sonymen qatar, ol arab álemi halyqtaryna  gýmanıtarlyq kómek kórsetetin Dubai's International Humanitarian City atty qordy da basqarady. 2007 jyly shildede ol BUU-ǵa tynyshtyq  elshisi bolyp taǵaıyndaldy.
Hanshaıym Haıamen baılanysty shýly oqıǵalar da az emes, oǵan qosa ol áıelderdiń múmkindikteri keń ekendigine senedi jáne olardyń BAÁ ekonomıka, qoǵam, sport, óner jáne saıasatynda aıtýly jetistikterge jetýi úshin qyzmet etýde.

Sheıha Moza Bınt Nasir

Katardyń burynǵy ámiri áıeliniń búrkenishin sheship qana qoımaı, saıasatqa aralasýyna da jol berdi.

Sheıha Moza Bınt Nasir – Katardyń burynǵy ámiri sheıh Hamad ben Halıfa-ál-Tanıdyń úsh áıeliniń ekinshisi. Ol álemdegi eń stıldi birinshi hanymdardyń biri ǵana emes, qoǵam qaıratkeri jáne saıasatker.

Ortalyq Shyǵys áıelderiniń sulýlyq sımvolyna aınalyp ketken Sheıha Moza Katar qaýymdastyǵynyń tóraǵasy.

Mozanyń ómirin ekrandyq týyndy etse, «Ǵalamat ǵasyr» syndy tele hıkaıa shyǵar edi, biraq sultan Súleımenniń ornynda Katar hanzadasy Hamad, al Húremniń ornynda bedeldi katarlyq kásipkerdiń qyzy Moza bolar edi.

Máselen, dál osy Mozanyń bes balasynyń ishindegi uly Tamım Katar sheıhi Hamadtyń ornyna bılikke keldi. Bul Mozanyń bedeline taǵy da qosylǵan artyqshylyq dese de bolady. Sebebi sheıh Hamadtyń úsh áıelinen jalpy alǵanda jıyrma bala-shaǵasy bar.

Oǵan qosa Moza «Forbes» jýrnalynyń baǵalaýynsha álemdegi eń yqpaldy 100 áıeldiń qataryna kiredi.

Alına Kabaeva

2008 jyldan beri BAQ betterinde «Reseı Prezıdenti Pýtınmen kóńil qosty mys» delingen sportshy, Alına Kabaeva álem nazaryn ózine aýdarǵan saıasattaǵy sulý kelinshekterdiń biri.

2004 jyly álem chempıony ataǵyn ıelenbes buryn Kabaeva  18 jasynda saıasatta tanylyp, daýys berý quqyǵyna ıelenip qana qoımaı, ózi de saılaýǵa túsken. Ol 1983 jyly Tashkentte sportsmender Lúbov jáne Marat Kabaevtar otbasynda dúnıege kelgen.

2005 jylǵa deıin Alına «Edınaıa Rossıa» partıasynyń quramynda bolsa, odan keıingi jyldary RF-ń Qoǵamdyq palatasynda meıirimdilik qorlarynyń damýy men sportshylardy saqtandyrý máselelerimen aınalysqan. Ol sportshylardy saqtandyrý jónindegi óziniń ustanymyn asqan jigerlilikpen qorǵap, Memlekettik dýmaǵa deıin kóterildi.

Alına 2007 jyly kórkem gımnast sportshysynan Memlekettik dýma depýtatyna aınaldy. Al 2014 jyly ol óz betimen dýmadaǵy laýazymyn bosatty. Osy jyldyń kúzinde «Ulttyq Medıa Top» basshylary keńesiniń tóraǵasy atansa, 2016 jyldan bastap, «Sport-Ekspress» basshylar keńesiniń tóraǵasy bolyp otyr.

Mehrıban Alıeva

Ázerbaıjan Prezıdenti Ilham Alıevtyń áıeli Mehrıban Alıeva álemdegi eń sulý birinshi hanymdardyń biri. Prezıdent Ilham Alıevtyń ony «Ázerbaıjannyń birinshi vıse-prezıdenti» dep ataǵany kúlli álemdi dúrliktirgen edi.  

Mehrıban Alıeva 1964 jyly 26 tamyzda Bakýde ıntellıgentter otbasynda dúnıege kelgen. Onyń ákesi Arıf Pashaev bakýlyq Ulttyq avıasıa akademıasynyń rektory, al anasy Aıda Imankýlıeva tanymal fılolog. Mehrıban jastaıynan bilimge qushtar bolyp, mektepti altyn belgimen támamdaǵan. 2005 jyly ol fılosofıa ǵylymdary kandıdattyǵyn qorǵady.

53 jastaǵy sulý da symbatty Ázirbaıjannyń birinshi hanymy óz qyzynan da jas kórinetindigi jóninde BAQ betterinde jazylyp júr. Ózgeler onyń sulýlyǵy Batystyń qymbat hırýrgıalyq otalarynyń arqasynda saqtalǵan degen pikirde.

Mehrıban Alıeva mansap jolyn óziniń mamandyǵy boıynsha, Máskeý ǵylymı-zertteý kóz ınstıtýtynyń qyzmetshisi bolyp bastady. 2002 jyly Mehrıban Ázirbaıjan gımnastıka federasıasynyń prezıdenti retinde saılanyp, artynsha Gaıdar Alıev fondynyń prezıdenti atandy. 2005 jyly parlamentte «Jańa Ázirbaıjan» partıasynyń atynan  Mıllı Májilis depýtaty bolyp qyzmetke keldi.

Alıeva mansabynyń sharyqtaǵan shegi Ilham Alıevtyń ony Ázirbaıjannyń birinshi vıse-prezıdenti etip saılaýy boldy.

Darıǵa Nursultanqyzy Nazarbaeva 

Qazaqstan prezıdentiniń úlken qyzy Darıǵa Nazarbaeva qoǵam jáne memleket qaıratkeri. 54 jastaǵy Nazarbaevanyń bilimi joǵary jáne ol qazaq, orys, aǵylshyn, ıtalán jáne azdap nemis tilin de meńgergen.

Darıǵa hanymnyń mansap joly óte uzaq jáne kópshiligi jaýapty laýazymdar. Máselen, 2002-2006 jyldary - «Nur Otan» partıa tóraǵasynyń orynbasary bolyp taǵaıyndalsa, 2012 jylǵy parlamenttik saılaýdan keıin Májilis depýtaty bolyp saılandy. Áleýmettik-mádenı komıtetiniń Tóraıymy qyzmetin de atqardy.

Al 2015 jyldyń 11 qyrkúıeginen bastap, Qazaqstan Premer-mınıstriniń orynbasary boldy. 2016 jyly QR Parlament Senatynyń depýtaty bolyp taǵaıyndaldy. 2017 jyly Parlamenti Senatynyń depýtaty Darıǵa Nazarbaeva QR Syrtqy ister mınıstrligi qyzmetiniń máseleleri boıynsha Qoǵamdyq keńestiń jańa tóraıymy bolyp saılandy

Jeke ómirine keler bolsaq ol 1983 jyly ol Rahat Álıevke turmysqa shyqqan. 1985 jyly ol tuńǵysh uly Nurálı Álıevti ómirge ákeledi. 1990 jyly Aısultan Nazarbaevty bosanady. Al 2000 jyly Venera esimdi qyzdy bolady.

Darıǵa Nazarbaeva saıası qyzmetpen qosa, mýzykamen de aınalysqan.