Qazaqstan Prezıdenti brıfıń barysynda Vashıngtonǵa saparmen kelýge shaqyrǵany úshin Donald Trampqa rızashylyǵyn bildirdi, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Memleket basshysy kelissózderdiń nátıjelerine oń baǵa bere otyryp, Qazaqstan men AQSH-tyń ózara qarym-qatynastaryn odan ári nyǵaıtý máselelerine toqtaldy. 

– Meniń saparymnyń nátıjesinde Qazaqstan-Amerıka qatynastaryn keńeıtilgen strategıalyq áriptestik deńgeıine kóterý jóninde sheshim shyǵaratynymyzǵa senimdimin. Osyǵan oraı biz búgin Astana men Vashıngton arasyndaǵy ózara qarym-qatynastardyń jańa dáýirin bastaıtyn tıisti birlesken saıası málimdeme qabyldadyq, – dedi Qazaqstan Prezıdenti.

Nursultan Nazarbaev AQSH-tyń Ortalyq Azıa elderimen «5+1» formatyndaǵy yntymaqtastyǵyn nyǵaıtýǵa qyzyǵýshylyq tanytatynyn aıtty.    

Qazaqstan Prezıdenti halyqaralyq qaýipsizdikti nyǵaıtyp, qazirgi zamannyń syn-qaterleri men qaýipterin birlese eńserý isinde Astana men Vashıngtonnyń ózara tıimdi yntymaqtastyǵyn atap ótti.    

– Qazaqstan 2001 jyly AQSH-tyń terorızmge qarsy kúresin belsendi túrde jaqtady jáne qazir Aýǵanstanda júrgizilip jatqan úlken jumystarǵa qoldaý kórsetip otyr. Amerıka áskeriniń Aýǵanstanda bolýy tek AQSH-tyń ǵana emes, búkil álemniń isi, – dedi Nursultan Nazarbaev. 

Memleket basshysy Aýǵanstanǵa Qazaqstan tarapynan kórsetilip jatqan gýmanıtarlyq kómekti atap ótti.

Budan bólek, Qazaqstan Prezıdenti kelissózder barysynda Soltústik Koreıa tóńiregindegi ahýalǵa, sondaı-aq Vashıngton men Máskeý arasyndaǵy qatynastardyń kúrdelene túsýine baılanysty máseleler talqylanǵanyn aıtty.

– Biz Soltústik Koreıaǵa qatysty jahandyq máselelerdi talqyladyq. Qazaqstan álemdegi tórtinshi ıadrolyq arsenaldan bas tartyp, álemdegi eń úlken synaq polıgonyn japty. Iadrolyq qarýy bar elderge biz tańdaǵan joldy usynýǵa moraldyq quqyǵymyz bar. Iranmen de osylaı sóılestik. Soltústik Koreıanyń problemalaryn AQSH, Qytaı jáne Reseı elderiniń birlese sheshkeni mańyzdy, – dedi Qazaqstan Prezıdenti.

Nursultan Nazarbaev eki eldiń ekonomıkalyq yntymaqtastyǵynyń qazirgi máseleleri men olardy nyǵaıtý perspektıvalaryna da toqtaldy.

– Qazaqstanǵa AQSH-tyń iri munaı kompanıalarynan 50 mıllıard dollar ınvestısıa quıyldy. Búgin biz iri amerıkalyq bıznes ókilderimen dóńgelek ústelge qatysamyz. Onda 7,5 mıllıard dollardan asatyn somaǵa 20-dan astam kelisimshart jasalatyn bolady. Sondaı-aq, bizdiń elde AQSH azamattary úshin vızasyz rejim engizilgen. Soǵan sáıkes laıyqty jaýap bolady dep úmittenemiz, – dedi Memleket basshysy.

Sońynda Nursultan Nazarbaev Donald Tramptyń basshylyǵymen AQSH-tyń ekonomıkalyq damýǵa qol jetkizip otyrǵanyna joǵary baǵa berdi. 

AQSH Prezıdenti ótkizilgen dıalogtyń mańyzdylyǵyn atap ótip, eki el arasyndaǵy yntymaqtastyqtyń strategıalyq mańyzyna toqtaldy.    

– Biz Sizdi Aqúıde qabyldaǵanymyzǵa qýanyshtymyz. Elderimizdiń ózara yqpaldastyǵyna qatysty mańyzdy dıalog ótkizý maqsatymen búgin bizge kelgenińiz úshin rahmet. Shırek ǵasyrdan astam ýaqyt boıy AQSH Qazaqstandy, myqty egemen ári táýelsiz eldi, Ortalyq Azıadaǵy baǵa jetpes dos jáne strategıalyq seriktes retinde qarastyryp keldi, – dedi Donald Tramp.          

AQSH Prezıdenti Qazaqstan men AQSH-tyń ıadrolyq qarýdy taratpaý jáne óńirlik qaýipsizdikti nyǵaıtý isindegi birlesken kúsh-jigerin atap ótti.

– AQSH pen Qazaqstan óńirde jáne odan tys jerlerde beıbitshilik pen qaýipsizdikti qoldaý úshin birlese jumys istedi. Biz Qazaqstandaǵy ıadrolyq qarýdy jáne onyń ınfraqurylymyn joıyp, balalarymyz úshin qaýipsiz ári salamatty bolashaqty birlese qamtamasyz ettik. Búgin Qazaqstan Prezıdenti ekeýimiz bizdiń qarym-qatynastarymyz halyqtarymyzdyń qaýipsizdigine, órkendeýi men ál-aýqatyna qalaı septigin tıgizetinine qatysty dıalog júrgizip otyrmyz. Koreı túbegin denýklearızasıalaý úshin kúsh biriktirý isinde Qazaqstan baǵa jetpes seriktes bolyp sanalady. Biz Soltústik Koreıadaǵy rejimniń búkil álemge ıadrolyq apatpen ses kórsetýin boldyrmaýǵa bel býyp otyrmyz, – dedi AQSH Prezıdenti.

Donald Tramp Aýǵanstan máselesin sheshýge atsalysqany úshin Qazaqstan Prezıdentine alǵys aıtty.

– ILIM-men jáne «Talıbandarmen» soǵys júrgizip jatqan bizdiń qarýly kúshterge Qazaqstan logıstıka jáne jol ashý turǵysynan qoldaý kórsete beretini jóninde Prezıdenttiń ózi aıtqanyn asa joǵary baǵalaımyn, – dedi Aqúıdiń basshysy.

Sondaı-aq, Donald Tramp kórshilerin qurmetteıtin jáne óz taǵdyryn baqylaýda ustaıtyn Qazaqstan sıaqty eldermen AQSH yntymaqtastyqty nyǵaıta beretinin aıtty. 

– Qazaqstan 2050 jylǵa qaraı jahandyq ekonomıkanyń alǵashqy otyzdyǵyna kirýdi josparlap otyrǵanyn Prezıdenttiń ózi aıtyp bergenine rızamyn. Ol Qazaqstandaǵy iskerlik ahýaldy jaqsartý úshin de jumys istep jatyr. Bul jaǵdaı Amerıka kompanıalary úshin jańa múmkindikter týǵyzyp, jańa jumys oryndaryn ashady, – dedi AQSH Prezıdenti.

Sońynda Donald Tramp Qazaqstandy damytý men órkendetý isindegi Nursultan Nazarbaevtyń rólin taǵy da atap ótti.

– Men Sizdiń keremet basshylyǵyńyzdyń arqasynda Qazaqstan halqy qol jetkizgen zor jetistikti kórý múmkindigin asyǵa kútemin. Biz Qazaqstanda jaqsy, egemendi jáne órkendeýge baǵyttalǵan bolashaq bolǵanyn qalaımyz. Dál osyny álemniń barlyq beıbitsúıgish halyqtaryna da tileımiz, – dedi Donald Tramp.