El Prezıdenti Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda jańa jahandyq aqıqat jaǵdaıyndaǵy básekege qabilettilik jaıly aıta kele, Qazaqstan álemge munaı resýrstary jáne iri halyqaralyq bastamalarymen ǵana emes, mádenı jetistikterimen de tanylýy kerektigin atap ótti. Osy mańyzdy jumysta akademıalyq qoǵamdastyq pen ýnıversıtetterdiń atqarar róli erekshe.
Jańa jyldyń alǵashqy kúnderinde ál-Farabı atyndaǵy Qazaq ulttyq ýnıversıtetiniń delegasıasy Italıanyń áıgili mádenı jáne týrısik ortalyǵy Venesıada ornalasqan Ka’Foskarı ýnıversıtetinde boldy. Oqý ornynyń kóp ǵasyrlyq tarıhy men baı dástúri bar jáne Eýropa men álemniń úzdik ýnıversıtetteriniń biri bolyp sanalady.
Seriktes ýnıversıtetter eki jyl boıy ǵylymı yntymaqtastyq pen stýdent almasý jumystaryn belsendi júrgizdi – qazirgi tańda baǵdarlama boıynsha QazUÝ-dyń 10 stýdenti Ka-Foskarı ýnıversıtetinde bilim alyp jatsa, óz kezeginde Qazaqstan jaǵy ıtalıalyq joǵary oqý ornynyń stýdentterin qabyldaýda.
Damyp kele jatqan jemisti yntymaqtastyqtyń nátıjesi retinde resmı sapar barysynda Ka-Foskarı ýnıversıtetindegi Qazaqstan ortalyǵynyń jumysy bastaldy.
Resmı kezdesýde QazUÝ rektory Ǵalym Mutanov pen Ka-Foskarı ýnıversıtetiniń rektory Mıshele Býglıesı eki jaqty yntymaqtastyqty odan ári keńeıtý, qazaqstandyq ortalyqtyń damýy men jumysyn alǵa jyljytý jónindegi suraqtardy talqylady. Atalmysh ortalyqtyń qyzmeti mamandardy birge daıarlaý aıasynda akademıalyq almasýdy qoldaýǵa, birlesken ǵylymı-bilim berý jobalaryn damytý jáne júzege asyrýǵa, qazaqstandyq jáne ıtalıalyq avtorlardyń kitaptary men monografıalaryn aýdarýǵa jáne t.b. baǵyttalǵan.
Qazaqstan stýdentteriniń Italıa tili men mádenıetine degen qyzyǵýshylyǵyn nazarǵa ala otyryp, QazUÝ bazasynda Italıa tili men mádenıeti ortalyǵyn qurý jóninde usynys aıtyldy. Seriktes JOO-larda ortalyqtardyń ashylýy yntymaqtastyqty jańa sapaly deńgeıge kóteredi, al olardyń qyzmeti Qazaqstan men Italıa arasyndaǵy dostyq kópirine aınalatyn bolady.
Sondaı-aq sapar barysynda ǵylymı-bilim berý jetistikteri men Qazaqstannyń mádenı murasyn tanytýǵa baǵyttalǵan aıtýly oqıǵa oryn aldy. Ál-Farabı atyndaǵy QazUÝ QR Ulttyq akademıalyq kitaphanasy jáne Ka-Foskarı ýnıversıtetimen birlese «Qazaqstanmen tanysý: Jańa Jibek jolyn qarsy alý» atty halyqaralyq konferensıany uıymdastyryp ótkizdi.
Shara Italıadaǵy Qazaqstan Respýblıkasynyń Elshiligi men Qazaqstandaǵy Italıa Elshiliginiń qoldaýymen ótti. QR-daǵy Italıa Elshisi Stefano Ravanán konferensıada sóılegen sózinde Qazaqstannyń keńinen tanylýy úshin mundaı kezdesýlerdiń mańyzdylyǵyn, sonymen qatar ekonomıka salasynda ǵana emes, bilim berý men ǵylymda da ekijaqty qarym-qatynastardy keńeıtý qajettigin tilge tıek etti. Ka-Foskarı ýnıversıtetiniń Azıa jáne Afrıka departamentiniń dırektory Aldo Ferrarı QazUÝ rektorymen ótken kezdesý jáne konferensıa eki JOO qarym-qatynasyn jańa damý satysyna kótergenine nazar aýdardy.
«Bolashaqqa baǵdar: rýhanı jańǵyrý» baǵdarlamalyq maqalasyn júzege asyrýǵa belsene kirisken ál-Farabı atyndaǵy QazUÝ birqatar ǵylymı-bilim berý jáne mádenı jobalardy bastap, júzege asyrýda.
Osylaısha, ýnıversıtet hımıa jáne hımıalyq tehnologıalar boıynsha Rostok (Germanıa) jáne Karachı (Pákistan) qalalarynda birlesken zerthanalar ashty, Sýkýba ýnıversıtetimen birge Kampýstaǵy kampýs jobasy boıynsha jumys atqarylýda, QazUÝ Pekın shet tilder ýnıversıtetinen Qazaqstan mádenı ortalyǵyn, al Shanhaı shet tilder ýnıversıtetinen qazaq tili men ádebıeti kafedrasyn ashty, Ystambul jáne Iordanıa ýnıversıtetterinde Ál-Farabı ortalyǵy qurylǵan, sondaı-aq Nıderlandyda Ál-Farabı ortalyǵyn qurý maqsatynda jumys júrgizilýde.
