Taıland soty Mısýokı Sıgetý esimdi japon mıllıarderimen sottasyp jatyr. Mıllıarder sottan óziniń balalaryn qaıtaryp berýdi talap etýde. Polısıa japondyqtyń 15 balasyn taýyp, qalǵan balalaryn izdestirýde. Keıbir adamdardyń pikirinshe, mıllıarder jigit óz urpaqtarynan armıa tizbekshi.
«Estimegen elde kóp» demekshi, Japonıanyń tanymal mıllıarderiniń erekshe oqıǵasy týraly Lenta.rý jazady.
Vassana esimdi áıel New Life atty kompanıamen kelisimshart jasasqan. Bul kompanıa tabıǵı jolmen balaly bola almaıtyn juptarǵa sýrrogat ana bolýǵa áıelderdi izdeıdi. Bul qyzmet úshin áıelderge 10 myń dollar qarajat tólenedi eken.
30 jastaǵy Vassana Bangkokta balasy jáne taǵy jeti adammen birge páter jaldap turatyn. Kompanıa usynǵan múmkindikti paıdalanbaqshy bolǵan áıel sýrrogat ana boýlǵa kelisedi. Ol óziniń klıentiniń kim ekenin, ıaǵnı kimge bala týýyp beretinin bilmegen, balasynyń ákesin bastapqyda tanymaǵan. «Eger osynshama aqsha usynsa, balaly bolýdy qatty qalaıtyn erli-zaıyptylar bolýy kerek» dep oılaǵan áıel qatty qateleskenin keıin bilgen.
2013 jyldyń jazynda Vassana bosanyp, eki aıdan keıin balasynyń ákesimen tanysqan. Uzyn shashty japondyq jigit eshteńe demesten, kúlimsirep qana qoıǵan.
"Óziniń zańgeri arqyly meni ata-ana quqyǵymnan aıyrý týraly kelisim júrgizdi",- deıdi áıel. Áıel kelisip barlyq qujattardy rásimdegen. Bir jyldan keıin Vassana óziniń klıentin teledıdardan kórgen. Jańalyqtardan Bangkok qalasynyń syrtyndaǵy úılerdiń birinde polısıa tekserý júrgizip, 2 jas-2 apta aralyǵyndaǵy toǵyz bala tabylǵan. Olardyń barlyǵy álgi japon jigitiniń balalary ekeni belgili bolǵan.
Bangkok Post basylymy kóp balaly japondyqtyń sheteldik tólqujatynyń kóshirmesin taýyp alǵan. Belgili bolǵandaı, kóp balaly áke 24 jastaǵy Mısýokı Sıgeta bolyp shyqqan. Málimetterge qaraǵanda onyń ákesi Japonıadaǵy eń baı adamdardyń biri eken.
Sıgeta 2012 jyldan bastap sýrrogat analarǵa degen qyzyǵýshylyǵyn bildirgen. Ol sýrrogat analarǵa 500 myń dollardan asa qarajat jumsaǵan. Sıgetanyń osy tásil arqyly qansha balanyń ákesi atanǵany belgisiz. DNQ nátıjeleri boıynsha ol 15 balanyń ákesi dep tanylǵan. Bangkogtaǵy turǵyn úılerdiń birinde onyń atyna jazylǵan 21 bala tabylǵan.
Sıgeta Bangkogta bala «shyǵarýmen» arnaıy jospar boıynsha aınalysqan. Onyń agentteri áıelderdi taýyp ákelip otyrǵan. Dárigerler olardyń densaýlyqtaryn qadaǵalaǵan. Bala týǵan soń onyń qujattaryn rásimdeýmen zańgerler aınalysqan. Taılandtaǵy Interpol búrosynyń dırektory buǵan deıin mundaıdy eshqashan kórmegenin, estimegenin aıtady. «Osynshama balany dúnıege ákelý oǵan ne úshin kerek ekenin túsinbeı-aq qoıdyq»,-deıdi olar. Bastapqyda polısıa másele balalar saýdasy men ekplýatasıasynda dep oılaǵan. Alaıda, New Life kompanıasyn negizdeýshi áıeldiń aıtýynsha, Sıgetanyń basty maqsaty «úlken otbasyn quryp, bolashaqta saılaýda jeńiske jetý» bolǵan. Mısýokı Sıgeta óziniń ómiriniń sońyna deıin jyl saıyn 10 – 15 balany dúnıege ákelýdi maqsat etip qoıǵan. Mıllıarder óz urpaqtarynyń bolashaqta ózin prezıdenttikke saılaý kezinde kómektesetinin oılaǵan, osyndaı tásilmen búkil álemdi bıleýdi qalaǵan.
Sıgetanyń ózi birneshe ondaǵan urpaq súıýdi qalaıtynyn moıyndamaı otyr. Onyń aıtýynsha, balalar oǵan ol ómirden ótken soń, dúnıe-múlkin, qazynasyn qaldyrý úshin kerek. Mıllıarderdiń zańgerleri Sıgetanyń balalarynyń barlyǵynda týý týraly kýáliktiń bar ekendigin, attarynda múlik bar ekenin, ıaǵnı báriniń zańdy turǵyda jasalyp jatqanyn aıtady.
Japonıalyq mıllıarder tórtinshi jyl Taıland bıligimen balalaryn qaıtarý úshin sottasyp jatyr.
