Qazaq balalaryn álippeden aıyrǵan Bilim mınıstrligi endi taǵy bir pánge aýyz saldy. Jańa oqý jylynan bastap elimizdiń mektepterinde  Qazaqstan geografıasy oqytylmaıdy. Onyń ornyna jalpy geografıa páni basatyn bolady. Osylaısha  oqýlyqtar arasynan Qazaqstan  geografıasy degen pán joǵalmaq.  Al muǵalimder bolsa, oqýshylar óz eliniń jer-sý ataýlaryn bilmeı óse me dep qaýiptenedi. Bilim jáne ǵylym mınıstrliginiń kózdegeni ne? Mınıstrlik mamandardyń jaǵdaıyn nege oılamaıdy? Bul jaıynda Qamshy.kz aqparat agenttigi Eýrazıa birinshi arnasyna silteme jasap habarlaıdy.

Shırek ǵasyrdan beri oqytylyp kelgen Qazaqstan geografıasy jańa oqý jylynan bastap, oqý baǵdarlamasynan alynady. Jańartylǵan baǵdarlamaǵa saı jeke oqytylyp kelgen pán jalpy geografıanyń quramyna enipti. Elimizdiń geograftary osylaı dep dabyl qaǵýda. Osy ýaqytqa deıin  Qazaqstannyń  fızıkalyq, ekonomıkalyq geografıasy degen ataýmen  8-9 synyptar oqytylyp kelgen pánge jańa mınıstrdiń ne sebepti shúılikkenin ustazdar qaýymy túsine almaı dal.

«Qazir TMD elderiniń geografıasyna kóbirek kóńil bólingen sońǵy baǵdarlamada. Sodan keıin 8-de qazaqstannyń topyraǵy bir saǵat, 9 synypta 5-6 saǵat segizdiń programmasyn bergen. Ary qaraı 9-10-10-12 jylǵa bizdiń eki jylda tolyq oqytyp otyrǵan baǵdarlamamyzdy shashyratyp jibergen» - deıdi geografıa pániniń muǵalimi, profesor uljalǵas Esnazarova.

Bul máselege alańdaǵan ustazdar qaýymy Bilim mınstrine hat joldaǵan.  Elimizdiń bas muǵaliminen kelgen jaýapqa qanaǵattanbaǵan mamandar, Prezıdent ákimshiliginen arasha surapty. Biraq eki birdeı  jaýapty kórgen pedagoktardyń tóbe shashy tik turǵan.  
 
«Bilim mınstriniń bir jaýaby ekinshisinen soraqy bolyp tur. Mınıstrge jazǵan hatymyzǵa mundaı pán esh ýaqytta oqytylmaǵan degen jaýap alsaq. Burynǵy jaýaptarynan alys ketpegen. Endigi bir soraqysy, biz aıtqamyz ǵoı, 8-9 klasta Qazaqstannyń geografıasy ornynda qalsyn dep.  Bular búıtken Qazaqstannyń geografıasyn oqytýǵa saǵat joq degen jaýap keldi» - deıdi geografıa pániniń muǵalimi, profesor uljalǵas Esnazarova.

Al joǵarǵy oqý oryndarynyń ustazdary onsyz da elimizdiń geografıasyn mańdytyp bilmeıtin jastar bul pándi ǵylymı turǵydan qalaı oqıdy dep alańdaýda. Sondyqtan eń birinshi óz eliniń tabıǵı erekshelikterin oqytýǵa basymdyq berý kerek dep esepteıdi

«Ózimizdiń ýnıversıtette Qazaqstannyń fızıkalyq geografıasyn, ekonomıkalyq geografıasyn oqytamyz. Biraq mektepten bilmegen bala ony qalaı ǵylymı turǵydan damytamyz. Qalaı ol mekteptiń muǵalimi bolady. Eger óz eliniń geografıasyn bilmese. Qazaq tilin, Qazaqstannyń tarıhyn, Qazaqstannyń geografıasyn bilmegen adam sanaly, jaqsy egemen eldiń azamaty bola almaıdy dep esepteımin» - deıdi geografıa ǵylymdarynyń kandıdaty, dosent Gúlzıra Orazymbetova.

Ustazdardyń janaıqaıy halyq qalaýlylaryna deıin jetip, depýtattar Bilim mınıstri men Úkimet basshysyna depýtattyq saýal joldaǵan.  Vedomstva basshylyǵynan  «pánniń aty ózgergenimen, zaty qaldy, kerisinshe zaman talabyna saı jańartyp, tolyqtyrdyq» degen jaýap alǵan. Biraq qazaq degen sózdi qımaǵanyna qynjylyp otyr. 

«İshin-mazmunyn jańartsyn, maǵynasyn ózgertsin, biraq ataýyn nege saqtap qalýǵa bolmaıdy. Oǵan saı kitap ta barlyq dúnıe de bar ǵoı. Al endi qazir ataýy ózgertilgen jerde jańa kitap shyǵady. Bárin qoıǵan kúnniń ózinde 8-9-10 synyptarǵa tıptik jospary áli bekitilgen joq, sol jerge nege jazýǵa bolmaıdy desek, oǵan da qıynsynady» - deıdi QR Parlamenti májilisiniń depýtaty Baqytgúl Hamenova.

Jalpy álemniń barlyq memleketteri  eń birinshi kezekte óz eliniń geografıasyn oqytady eken. Reseı, Ózbekstan, Qyrǵyzstan tipti  jer kólemi bir aýdannyń kólemine teń keletin Izraıldiń ózi óz geografıasyna eki jyl oqytady.   Geograftar qyrkúıek aıyna deıin mınıstr raıynan qaıtady dep úmittenedi.