Búgin Global Challenges Summit 2018 forýmynda Qazaqstan Prezıdenti Nursultan Nazarbaev memleketter arasyndaǵy kelispeýshilik syndy máselelerge toqtalyp ótti, dep habarlaıdy Qamshy.kz aqparat agenttigi.

«Astana ekonomıkalyq forýmyna qatysý jaqsy dástúrge aınalyp keledi. Osy oraıda osynda kelgen qonaqtarymyzǵa, jalpy bizdiń azamattarǵa alǵysymdy aıtamyn. 11-shi ret forým álemdik ekonomıkanyń ınvestısıalary men ınovasıalarynyń eń mańyzdy máselelerin talqylaý alańy bolyp otyr. Byltyrǵy forýmnan beri biz álemdegi orasan zor ózgeristerdiń kýási bolyp otyrmyz. Jańadan teketires, konfrontasıalar paıda bolýda, memleketter arasynda kelisimge kelý qıyndap bara jatyr. Ásirese, úlken memleketter arasynda. Ózara senbeýshilik, qarsylastyqtyń ustanymyn túsinýdi qalamaý jıi oryn alýda. Bul álem úshin óte kúrdeli kezeń», - dedi Memleket basshysy.

Buǵan qosa Elbasy qıyndyqtardy sheship, kelisimge kelý adamzat úshin mańyzdy ekenin atap ótti.  

«Osy qıyndyqtarǵa qatysty máselelerdi ádil jáne obektıvti túrde talqylaýdyń ár múmkindigi adamzat úshin óte mańyzdy. Sol sebepti bıylǵy forým jahandyq syn-tegeýrinderge tıimdi jaýap izdeýge baǵyttalǵan. Sáıkesinshe, forýmda osy salalardaǵy bilikti mamandar jınalyp otyr. Olardyń sózin tyńdaýǵa, usynystaryn paıdalanýǵa biz asyǵamyz», - dep atap ótti Prezıdent.

Aıta keteıik, búgin Astanada Qazaqstan prezıdenti Nursultan Nazarbaevtyń qatysýymen  Challenges Summit 2018 forýmynyń jalpy otyrysy ótip jatyr. Forým 17-19 mamyr kúnderi ótedi. Onda álemniń túrli elderinen 500-ge jýyq spıker qatysty.