Búgin 2018 jylǵy 17 mamyrda Astana ekonomıkalyq forýmy alańynda Eýrazıalyq ekonomıkalyq odaq pen oǵan múshe memleketter jáne Irannyń arasynda erkin saýda aımaǵyn qurýǵa ákeletin ýaqytsha kelisimge qol qoıyldy, dep habarlaıdy Qamshy.kz aqparat agenttigi. 

2016 jyldan beri júrgizilip kele jatqan kelissózderdiń qorytyndysy boıynsha, Eýrazıalyq ekonomıkalyq odaq pen oǵan múshe memleketter jáne Irannyń arasynda birqatar bekitilgen taýarlarǵa qatysty 3 jyl merzimge ózara saýdadaǵy ımporttyq kedendik bajdy tómendetý týraly ýaǵdalastyqqa qol jetkizildi.   

Iran qazaqstandyq ónimderdiń eksportyn ulǵaıtýdaǵy keleshegi zor naryq bolyp tabylady. Iranmen ózara taýar aınalymynyń oń serpini baıqalady, ol 2018 jylǵy 1 toqsanda 2017 jylǵy uqsas merzimmen salystyrǵanda, 170 mln. AQSH dollaryn quraı otyryp, 70%-ǵa ósti.

Bul Kelisim ırandyq naryq baǵytyna qol jetkizý talabyn jaqsartady. Kelisim sıyr jáne qoı eti, noqat, jasymyq, burshaq, arpa, júgeri, ósimdik maıy, makarondar, kondıterlik ónimder, bolat prokaty, relster, akýmýlátorlar, armatýra, qubyr jáne basqa da Qazaqstannyń eksporttyq múddedegi taýarlaryn Irannyń búginde basqa elderge usynyp otyrǵan sharttaryna qaraǵanda, edáýir jeńildikpen jetkizýge múmkindik beredi.   

Munyń syrtynda Kelisim Iranmen saýdanyń turaqty talaptary men erejelerin qalyptastyrady. Kelisim erejeleri saýdadaǵy sanıtarlyq jáne fıtosanıtarlyq sharalar men tehnıkalyq bógetterdi, saýda rásimderin jeńildetýge baǵyttalǵan taýarlardyń shyqqan elin anyqtaýdyń kedendik rásimderi men erejelerin qoldanýdy retteıdi jáne DSU men halyqaralyq quqyq normalaryna negizdelgen.

Odan ary Taraptar DSU erejelerine sáıkes erkin saýda aımaǵy týraly tolyq formatty kelisimge kóshýdiń maqsatqa sáıkestigin qarastyrady.

Qazaqstan Respýblıkasynyń atynan Kelisimge Qazaqstan Respýblıkasynyń Premer-Mınıstriniń birinshi orynbasary A.Mamın qol qoıdy.