Shardjadaǵy Sheraton qonaqúıinde qazaqstandyqtar jappaı ýlanǵan. Tańǵy as ishemiz dep, jaǵdaılary kúrt nasharlaǵan otandastarymyz elge qaıtyp úlgerdi. Olardyń deni balalar. Demalýǵa baryp, dertke shaldyǵyp qaıtqan azamattar bar shyǵyndaryn qaıtaryp alýǵa bekindi.  

Japa shekken azamattardyń biri Asylbek Muhambetkereev otbasymen Birikken Arab Ámirligine 8 mamyrda joldama arqyly barǵan. Kelesi kúni tańda otbasy múshelerimen tańǵy as ishedi. Er adamnyń aıtýynsha, olardyń ýlanýyna sol tańǵy asta jegen taǵamdary sebep bolǵan. Sol ýaqytta qonaq úıdiń ishinde 600-ge jýyq týrıs boldy. Olardyń jartysy – TMD azamattary.

Alǵashqy  belgiler 10 mamyrda tańǵy saǵat 4-ter shamasynda baıqalǵan. Alǵash bolyp reseılik otbasy dáriger shaqyrtady. Dárigerler otbasy múshelerin tekserip, qyzý qaıtaratyn dári ekken. Al Muhambetkereevtiń otbasy saǵat 10-da bazar aralaýǵa shyǵady, sol jerde ýlanýdyń belgileri baıqala bastaǵan. Qonaqúıge barǵanda adamdardyń kóbiniń jaǵdaıy nasharlaǵanyn baıqaıdy. Qazaqstannyń 40-50 otbasy, Reseı, Ýkraına, Belarýs elderiniń 200-ge jýyq otbasy jappaı ýlanǵan eken.

Ýlanýdan zardap shekken Ásel Jarasqalıqyzynyń aıtýynsha, dárigerler ýlanǵan keı naýqastarǵa salmonellez dıagnozyn qoıǵan. Ózi de sol aýrýǵa shaldyqqan kórinedi.

Demalýǵa baryp, aýyr dertke shaldyqqan otandastarymyz týrısik kompanıalar men saqtandyrý mekemelerinen saıahatqa ketken shyǵyndaryn óndirip alatynyn málimdedi.

«Bir jyl boıy osy demalysqa aqsha jınadyq. Onyń bárin qaıtaryp alamyz», - dep kúıindi astanalyq Asylbek Muhambetkereev.