Jaqynda dóńgelek dúnıeniń sonaý ońtústik-shyǵys qıyrynda jatqan Vetnam jerinde ultymyzdyń tarıhy men búgingi jetistikterin, bıik mádenıeti men ǵylymyn nasıhattaıtyn aıryqsha máni bar rýhanı shańyraq boı kóterdi. Abaı atyndaǵy Qazaq Ulttyq pedagogıkalyq ýnıversıtetiniń rektory, akademık S.J.Pirálıev pen Hanoı Ulttyq pedagogıkalyq ýnıversıtetiniń rektory Ngýen Vet Thın myrzalardyń bastamasymen eki oqý orny arasyndaǵy mádenı jáne oqý-ádistemelik, ǵylymı baılanystar ornatý jónindegi kelisim-shartqa sáıkes Hanoı qalasynda Abaı atyndaǵy mádenı jáne ǵylymı ortalyq óz jumysyn bastady. Bul jaıly Qazaqstan Jazýshylar Odaǵynyń saıty habarlady Abaı ortalyǵynyń saltanatty ashylý rásiminde Hanoı Ulttyq pedagogıkalyq ýnıversıtetiniń rektory, profesor Mın myrza, Abaı atyndaǵy Qazaq Ulttyq pedagogıkalyq ýnıversıtetiniń birinshi prorektory, profesor M.E.Ermaǵanbetov myrza sóz sóılep, merekelik lentany qıdy. Sondaı-aq ortalyqty ashý saltanatyna fılologıa fakúltetiniń dekany, profesor B.Ábdiǵazıuly, profesorlar S.B.Begalıeva men T.Aıtqazınalar qatysty. Shańyraq kótergen jańa ortalyqtyń basty maqsaty – Vetnam jurtshylyǵyna uly Abaı esimi arqyly qazaq halqynyń rýhanı bolmysy, ádebıeti men mádenıeti, ǵylymy men bilimi jóninde keńinen maǵlumat berý. Aldaǵy ýaqytta eki el ǵalymdarynyń birlesken ǵylymı jobalaryn júzege asyrý, ýnıversıtetter arasynda oqytýshylar men stýdentter almasý, arnaıy toptarda vetnam stýdentterine qazaq jáne orys tilderin úıretetin kýrstar ashý, leksıalyq sabaqtar, túrli kórmeler uıymdastyrý da josparlanýda. Bul sharalardyń barlyǵy Abaı atyndaǵy Qazaq Ulttyq pedagogıkalyq ýnıversıtetiniń ǵalym-professorlarynyń kúshimen júzege aspaq. Vetnam topyraǵynda shańyraq kótergen bul otaý Abaı muralaryn nasıhattaý, tanystyrý maqsatynda ashylyp otyrǵan ekinshi ortalyq. Budan buryn kórshi Qytaı Halyq Respýblıkasynyń Qulja qalasyndaǵy İle pedagogıkalyq ýnıversıtetinde osyndaı Abaı ortalyǵy ashylǵan bolatyn. Abaı atyndaǵy Qazaq Ulttyq pedagogıkalyq ýnıversıtetiniń ujymy bolashaqta mundaı ortalyqtardy Túrkıa, Reseı, t.b. elderden de ashpaq nıette. BAQ.KZ