Qazaqstan Jazýshylar Odaǵy basqarmasynyń tóraǵasy, aqyn Ulyqbek Esdáýlet 7 maýsym kúni alashtyń rýhanı astanasy – Semeı qalasynyń zıaly qaýym ókilderimen, shyǵarmashylyq jastarmen kezdesti.
Belgili qalamger Medeý Sárseke, Jazýshylar Odaǵynyń Shyǵys Qazaqstan oblystyq fılıalynyń jetekshisi, aqyn Álibek Qańtarbaev, qoǵam qaıratkeri Túsiphan Túsipbekov qatysqan kezdesýde U.Esdáýlet shahardaǵy zıaly qaýymǵa Odaqtyń qolǵa alyp jatqan jumystaryn, aldaǵy josparlaryn tanystyrdy. Búginde Odaqtaǵy 800-den astam jazýshynyń 500-i zeınetker ekendigin, sondyqtan uıymǵa talantty jastardy múshelikke alý jaǵyna kóńil bólinip jatqandyǵyn aıta kelip, semeılik jas aqyn Mereı Qartovqa Jazýshylar Odaǵynyń múshelik bıletin tabys etti.
Jazýshylar Odaǵynyń Semeı qalalyq fılıalyn kóp jyldar kórnekti abaıtanýshy Tóken Ibragımov basqarǵany belgili. Jıynda osy fılıaldy jandandyrý, oǵan jańa basshy taǵaıyndaý jaıynda da sóz qozǵalyp, qazaqtyń talantty aqyny Tynyshtyqbek Ábdikákimov, dramatýrg Aıbek Sapyshev fılıal jetekshiligine jas aqyn Mereı Qartovtyń kandıdatýrasyn usyndy. Basqarma tóraǵasy Ulyqbek Esdáýlet elimizdiń birneshe oblystarynda Odaq fılıaldarynyń basshylary óz tilekterimen aýystyrylyp jatqanyna toqtalyp, Semeı qalalyq fılıalynyń jetekshisine qatysty usynysty qoldaıtyndyǵyn jetkizdi.
Basqosýda sóz alǵan fılologıa ǵylymdarynyń doktory Arap Espenbetov: «Semeıde Jazýshylar Odaǵynyń fılıaly bolýy kerek degenge durys qaraımyn. Dástúrli jer ǵoı bul. Sabaqtastyq úzile qoımas. Qalada talantty jastar az emes. Olardyń kitaptaryn shyǵaryp, Jazýshylar Odaǵyna múshelikke ótýlerine qolǵabys jasaǵanymyz jón. Qazirgi jaǵdaı neni kórsetedi? «Men jazýshymyn» degennen eshteńe shyqpaıdy. Qazir uıymdastyrýshy kerek. Jazýshyǵa jaǵdaı jasaıtyn adam kerek. Menedjer kerek» deı kele, Semeıde qolǵa alynyp jatqan «Abaı álemi» atty kitaptar serıasynyń bir kitabyna talantty jastardyń dúnıeleri toptastyryp berilse degen usynysyn alǵa tartty.
Shyǵys Qazaqstanǵa jumys saparymen kelgen Qazaqstan Jazýshylar Odaǵy basqarmasynyń tóraǵasy Ulyqbek Esdáýletti 8 maýsymda Semeı qalasynyń ákimi Ermak Sálimov arnaıy qabyldady. Kezdesýde U.Esdáýlet Odaqtyń Semeıdegi fılıalynyń jańa basshysy Mereı Qartovty ákimge tanystyrdy. E.Sálimov fılıalǵa qoldan kelgen kómegin aıamaıtynyn tilge tıek etti. Kezdesý barysynda osyndaǵy Abaı mýzeıiniń dırektory Bolat Júnisbekov fılıalǵa mýzeı ishinen konferensıa zaly bar jaıly da qolaıly oryn berýge ázir ekendigin, al Shákárim ýnıversıtetiniń basshylyǵy fılıaldy qajetti jabdyqtarmen jabdyqtaýǵa járdemdesetinin aıtty.
Reti kelgende aıta keteıik, 7 maýsymda Semeıdegi Shákárim atyndaǵy ýnıversıtette Ulyqbek Esdáýlettiń «Aqqý syr, qaýyrsyn naz, qanatty óleń» atty jastarmen kezdesý keshi ótip, kesh aıasynda oqý orynyń rektory Meıir Eskendirovtiń uıǵarymymen bıyl mektep bitirgen úsh talantty jasqa aqyn atyndaǵy bilim granty saltanatty túrde tapsyryldy.
A.Ábil
