Petropavldaǵy saýda úıleriniń birinde qaıyrymdylyq jáshigi urlandy. Bul jaıt dúken ishindegi beınekameraǵa túsken.
Taspadaǵy jazba kórsetkendeı, urlyq tańerteń, saýda ortalyǵy endi ashylǵan kezde, oryn alǵan. Beıtanys áıel kireberistegi jáshiktiń qasynda árli-berli júredi, keıin birshama ýaqyt uıaly telefonmen sóılesip turady. Kúdikti áıel, adamdar taraǵan kezde, shyny qorapty sómkesine salyp, izin sýytady. Bir qyzyǵy, qasynan ótken ondaǵan adamnyń eshbiri bul áreketke nazar aýdarmaǵan.
Polıseıler pysyqaıdyń áli quryqtalmaǵanyn aıtady. Jáshikte aýyr syrqatqa shaldyqqan balalar úshin jınalǵan aqsha bolǵan. Shyny qorap dúkenge aqpannyń jıyrmasynda ornatylǵan. Qoldy bolǵan qarajat kólemi ázirge belgisiz.
"Urlyq faktisine baılanysty Qylmystyq kodeksiniń 188-babyna sáıkes is qozǵaldy. Qazir tártip saqshylary urlyq jasaǵan áıeldiń esimin anyqtap jatyr. Eger de kúdikti ustalyp, kinási dáleldense, 1000 aılyq eseptik kórsetkish mólsherinde aıyppul tóleýi nemese 3 jylǵa deıin bas bostandyǵynan aıyrylýy múmkin", - deıdi SQO İİD baspasóz qyzmetiniń ókili Dınara Saǵyndyqova.
