Taıaýda áleýmettik jelilerde "70 jasynda turmysqa shyqty", "70-ke kelip uzatyldy" degen vıdeolar tarady. Osy jaǵdaı jurtty qyzyqtyrmaı qoımaǵany anyq, sebebi san túrli pikirler jazyldy. Osyǵan oraı, Tengrinews.kz tilshisi toı ıelerimen suhbattasty.
Jurtty qyzyqtyrý maqsatynda mundaı vıdeolardyń sıpattamasy asyra siltep jazylatyny bar, osy jaǵdaıda da shyndyqqa janaspaıtyn tustaryn aıta keteıik. Ájeniń jasy 70-te emes, 80-ge taıap qalǵan jáne uzatylyp jatqan joq, "Gaýhar toıyn" atap ótip jatyr eken.
Jambyl oblysy Moıynqum aýdany Kókterek aýylynda turatyn Ońlabaı (El ishinde Ońtaı ata) Múlkibaev ata bıyl 80-ge tolady, al qudaı qosqan jary Qojashqyzy Tıyshkúl apamyzmen otasqanyna alpys jyl bolǵan eken. Toǵyz ul bir qyzdy dúnıege alyp kelip, "uldy uıaǵa, qyzdy qıaǵa" qondyrǵan zeınetkerlerdiń balalary, nemereleri týystary osy ataýly mereıtoıdy saltanatpen ótkizýdi josparlapty.
Ońtaı atanyń aıtýynsha, toı sekildi qarapaıym ótkizýdi oılaǵan, alaıda kórshi aýylda turatyn qaıyn jurty, ıaǵnı Tıyshkúl apamyzdyń týystary toıǵa bir kún qalǵanda, "qyzdy uzatamyz" dep úılerine alyp ketken. Sonymen, Ońtaı ata qudasyn jigit joldas etip, aýdan ortalyǵynan lımýzın jaldap, qyzdy alyp ketýge barady. Tós tartý, ilýin berý (qalyń mal) taǵy basqa salt-dástúrdi oryndaǵannan keıin, Tıyshkúl apamyzdy syńsý aıtyp uzatady. Dál osy sáttiń vıdeosy Jelilerde tarap jatyr eken. Meıramhanaǵa barar jolda Bınazar babanyń basyna baryp táý etken. Saltanatty sharanyń ary qaraıǵy jalǵasy toıhanada ótken.
Al endi osy oqıǵa alpys jyl buryn qalaı boldy? Ońtaı ata Moıynqum aýdanyndaǵy Qumózek aýylynda dúnıege kelgen. Áskerdegi boryshyn ótep kelgen soń, aýylynda 17 jas shamasyndaǵy qyzdy kóredi. Bul Bınazar aýylynan aǵasynyń úıine kelgen Tıyshkúl apa bolatyn.
"Qalaıda osy Qojashtyń qyzyn alamyn" dep júrip, sonyń nátıjesinde úılendik. Toı tóbeniń basynda ótti. Ol zamanda solaı ótetin. Qaıynaǵama at mingizdim, biraq búgingideı úlken toı jasaý múmkin bolmady" - deıdi aqsaqal.
Ońtaı ata mal baǵyp, traktor júrgizip, esepshi (býhgalter) bolyp jumys istegen, kúrespen aınalysqan. 1999 jyly Kókterek aýylyna kóship barǵan. Zeınetke shyqqan soń, aýyl ımamy bolǵan. Jary da, ózi de qajylyqqa baryp kelgen. Bes balasy Almatyda turady eken, al qalǵan beseýi Jambyl oblysynda. Nemereleri Ǵabıdýlla men Jumadýlla Múlkibaevtar kúresten halyqaralyq jarysta Qazaqstannyń namysyn qorǵap júr.
Búginde Ońlabaı ata men Tıyshkúl apanyń 32 nemeresi, 11 shóberesi bar.
Qyrkúıek aıynyń ortasynda Ońtaı atanyń balalary at shaptyryp, kúresten jarys ótkizbekshi.
