Feısbýk áleýmettik jelisinde Almatyda kúni keshe oryn alǵan oqıǵanyń vıdeosy tarady. Nómiri 23 avtobýstyń júrgizýshisi múmkindigi shekteýli balasy bar áıeldi avtobýsqa kirgizbeı qoıǵan. Ýmmý Hadıja Abdýsamat degen feısbýk qoldanýshysynyń túsirgen bul vıdeo halyqtyń ashý-yzasyn týdyrdy. Qurban aıt kezinde adamgershilik tanytyp, meıirimdi bolýǵa umtylýdyń ornyna qatygezdik tanytqan avtobýs júrgizýshiniń tıisti jazalanýyn suraýda. Ýmmý Hadıja Abdýsamattyń baılanys nómirin taýyp, sol kúngi oqıǵany egjeı-tegjeıli aıtyp berýin suradyq.
-Ózińizdi tanystyryp ótseńiz. Ýmmý Hadıja Abdýsamat degen sizdiń shyn esimińiz be?
– Aty-jónim - Lázzat Qozybaeva. «Hadıja», «Abdýsamat» degen balalarymnyń esimderi. «Ýmmý» degen «ana», «anamyn» degen maǵyna bildiredi. Hadıja men Abdýsamattyń anasymyn ıaǵnı. Jalpy, ózimniń úsh balam bar. Almaty oblysy Qarasaı aýdany Abaı aýylynda turamyz.
-Sol kúngi oqıǵany eske alyńyzshy. Qaıda baǵyt alǵan edińiz?
– Bul 20-tamyz kúngi oqıǵa. Saǵat 11-ler shamasy bolatyn. Ortalyq meshitti kómek kórsetemiz dep shaqyrǵan bolatyn. Ózimniń balalarymdy, kórshi áıeldiń balalaryn ertip alǵan edim. Janymda múmkindigi shekteýli kórshi áıel boldy. Barlyq bazarynan Ortalyq meshitke baratyn qoǵamdyq kólikke otyrmaqshy edim. 11 avtobýsty kórmegen men 23 avtobýsqa kirmekshi boldym. Aıaldamaǵa kelip toqtaǵan avtobýstyń esigi ashyq boldy. İshi tolǵan adam. Meniń múmkindigi shekteýli balamnan basqa barlyq balalar kirip úlgergen bolatyn. Endigi kezekte kórshi áıel kirmekshi edi. Kenetten avtobýstyń esigi jabyla qaldy. Múmkindigi shekteýli áıeldiń aıaǵy qysylyp qaldy.
-Eskertpesten esikti jabýyna ne túrtki boldy? Kondýktor kómekke keldi me? Kórshi áıeldiń aty-jóni kim? Ol kisi qazir qandaı jaǵdaıda?
– Balalardyń arasynda mektep jasyna jetpegen balalar da bar. Olarǵa aqsha tólenbeıdi ǵoı. Mektepke baratyn balalar úshin qunnyń jartysyn tóleımiz. Osyny alǵa tartqan bolýy kerek. Áıteýir qoǵamdyq kólikke onyń kózinshe jaǵdaıy nashar bizdiń kirýimizge qarsylyq tanytty. Kórshimniń esimi Toqshabaeva Uljalǵas. Jaǵdaıy qalypty. Uljalǵastyń aıaǵy qysylyp qalǵanda qatty qoryqtym. Kómek surap, aıǵaıǵa bastym. Kondýktor kórinbedi.
-Eleńdegen bireý tabyldy ma? Avtobýstyń ishi lyq toly dedińiz.
– Bári túk bolmaǵandaı otyra berdi, ókinishimizge qaraı. Men bolsam, arbada otyrǵan balammen shyr-pyr boldym. Júrgizýshi eskertpesten esikti jaba salǵanyna, áıeldiń aıaǵyna zaqym keltire jazdaǵanyna keshirim suramaq túgili meniń balammen ishke kirýime tyıym saldy.
– Sol kezde uıaly telefonnyń kómegine júgindińiz ǵoı?
– Amal joq, vıdeony qostym. Qol-aıaǵym dirildep, boıymdy shok bıledi. Sondyqtan da durystap túsire almadym. Negizi, adam sıaqty keshirim surasa, arbaǵa taǵylǵan balamdy jurttyń kózinshe óziniń yńǵaısyz sezinýine jol bermese, men bul vıdeony túsirmes edim. Ǵalamtorǵa salmas edim. Osyndaı qadamǵa barýyma ózi májbúr etti. Áıtpese, bes ýaqyt namazymdy qaza qylmaıtyn adammyn. Bireýdiń ala jibin attamaıtyn qazaqpyn. Avtobýs júrgizýshiniń qatygezdigi, dórekiligi júregim aýyrtty, kóńilime qaıaý túsirdi.
– Ary qaraı oqıǵa qalaı órbidi?
– Kenetten kondýktor paıda boldy. «Vıdeo túsirmeseńiz. Bul avtobýsqa eshkim otyrmaıdy. Nómiri 11 avtobýsqa ne úshin otyrmadyńyz?», - dedi ol. Aıaldamaǵa kelip toqtaǵan, onymen qosa adamǵa lyq toly, «otyryńdar» dep artqy esigi ashylǵan qoǵamdyq kólikke bizdiń otyrýymyzǵa bular nege sonsha qarsy boldy dep qaıran boldym. Avtobýs júrgizýshisi jumsarýdyń ornyna bet baqtyrmady. «Maǵan ne isteı alasyńdar? Kerek bolsa ákimıatqa, Nazarbaevyńa aıt. Seniń balańdy múgedek qylǵan men be?» - dep ursysa jóneldi.
-Ortalyq meshitke jete aldyńyzdar ma?
– Iá, aqyry sol 23-ke otyrdyq.
-Polısıaǵa shaǵymdandyńyz ba?
– Ortalyq meshitke baryp kelgen soń balalardy úıge qaldyryp, Barlyq bazaryndaǵy polısıa bólimshesine bardyq. Aryzymyzdy qabyldamady. Olar bul jaǵdaı boıynsha is qozǵaı almaıtynyn aıtty. Qajet bolsa júrgizýshimen sóılesetinderin, júrgizýshiniń keshirim suraıtynyn jetkizdi. Maǵan onyń uıalysyn berdi. Biraq avtobýs júrgizýshisi qońyraý shalmady, keshirim suramady. Men ne úshin oǵan ózim zvondaımyn!?
– Avtobýstyń nómirin aıtyńyzshy
– 23 avtobýs. Nómiri – 491MLA05
Baıaǵyda úndi kınosyn kórip otyrǵanda urys-tóbeles, aıǵaı-shý oryn alyp jatqanda arasha túsip, kómek kórsetpeıtin, nemquraılyq tanytatyn úndilerdi kórip tań qalatynmyn. "Qalaısha qur qarap turady?", "Nege jedel járdemge zvondamaıdy?", "Nege kómektespeıdi" degen zańdy suraq týyndaıtyn. Myna vıdeony kórip otyryp, ókinishten barmaǵymdy tistedim. Aıyrmashylyǵymyz joq eken.
Qamshy.kz aqparat agenttigi Lázzat Qozybaevanyń basynan ótken jaǵdaıyn jalpy jurtqa jarıa ete otyryp, ádilettiliktiń ornaǵanyn qalaıdy. Eskertý ketetin jaıt, avtobýs júrgizýshisine habarlasyp, ekinshi taraptyń da oı-kózqarasyn beretin bolamyz.
