Semeı qalasynyń balalar úıiniń tárbıelenýshileri Fransıada ótken «Parı-Sen-Jermen» jáne «Sent-Eten» fýtbol klýbtarynyń arasynda bolǵan jarys oınyna qatysyp qaıtty.
14-qyrkúıek kúni Qazaqstannyń jas fýtbolshy balalary Fransıadaǵy áıgili «Park de prens» stadıonynda bolǵan «Parı-Sen-Jermen» jáne «Sent-Eten» arasyndaǵy teketires oıynnyń kórermeni boldy. Oıyn balalardyń jadynda esten ketpes áser men sezim qaldyrdy. Olar ózin naǵyz fýtbolıst sezinip, ótken oıynda komandalarǵa qoldaý kórsetip shynaıy fýtbol atmosferasyn sezindi.
Eýropanyń eń myqty klýbtaryna joldama - balalar úıiniń tárbıelenýshileri arasynda ótken «Armanyńa jaqynda» atty fýtbol chempıonatynyń qatysýshylarynynyń basty syıy. Aıta ketsek bul chempıonatty "Sesnabank" AQ , "Nur Otan" partıasy men Qazaqstannyń Fýtbol Federasısynyń qoldaýymen "BAURZHAN" qory uıymdastyryp otyr. Osyndaı chempıonattyń arqasynda Semeı balalar úıiniń tárbıelenýshileri ózderiniń armandaryn oryndap, naǵyz fýtbol juldyzdarymen tanysý múmkindigine ıe boldy.
Sondaı-aq, sapar barysynda "Armanyńa jaqynda" jeńimpazdary Fransıadaǵy Qazaqstan elshisi Jan Ǵalıevpen de kezdesti. Balalar sapardan alǵan áserlerimen jáne ózderiniń sporttaǵy jetistikterimen bólise otyryp, alǵystaryn bildirdi.
Uıymdastyrýshylardyń aıtýy boıynsha, qatarynan alty jyl ótkizilip kele jatqan bul chempıonat balalardyń fýtbolǵa degen qyzyǵýshylyǵyn arttyryp, olardyń boıyndaǵy darynyn ary qaraı damytyp, bolashaqta jańa jetistikterge qulshyndyrady.
Bul sapardyń mańyzy jaıynda joba uıymdastyrýshysy Aınur Sálimbaeva da aıtyp ótti:
- Sapardyń basty maqsaty – qamqorsyz qalǵan balalarǵa ary qaraı sportpen aınalysýǵa degen senim men ynta berý. Balalardyń álemge aty áıgili kásibı fýtbolshylardyń oınyna qatysýy jas jetkinshekterdiń armandary oryndalatyndyǵynyń taǵy bir dáleli. Balalar úıinde daryndy balalar óte kóp. Al bizdiń mindetimiz olarǵa járdemdesip, bolashaqta baǵyt-baǵdar tabýyna kómektesý. Men bul balalardyń arasynan Qazaqstannyń maqtanyshy men basqalarǵa úlgi bolatyndaı sportshy shyǵatynyna senimdimin.
Eske sala ketsek, osy jyldyń maýsym aıynda Almaty qalasynda balalar úıiniń tárbıelenýshileri arasynda «Armanyńa jaqynda» atty fýtboldan Qazaqstan chempıonaty ótken bolatyn. Jarysqa barlyǵy 9 top qatysyp, Fransıada bolatyn «Parı-Sen-Jermen» klýbynyń oınyna joldama úshin baq synasqan bolatyn.
