Sonymen, Gena jeńildi. Dál tıgen soqqysynyń sany (234:202) boıynsha bizdiń jigit alda bolǵanymen, jeńis Kaneloǵa berildi. Ol túsinikti de. Óıtkeni, bul jekpe-jektiń nátıjesine rıngtegi judyraqtasýdan bólek ózge de sheshýshi faktorlar áser etkeni sózsiz. Olar:
Gena - qanshama myqty bolyp, jankúıeri kóp bolsa da, AQSH-ta kásipqoı boks álemi úshin bóten jan;
Kanelo – kásipqoı bokstaǵy eń yqpaldy promoýterlik kompanıa Golden boy promotions-tiń basty juldyzy, ıaǵnı negizgi tabys kózi;
Kásipqoı bokstyń otany – AQSH bolsa, ondaǵy negizgi jankúıer, ıaǵnı tabys kózi meksıkalyqtar ekeni belgili. Sol sebepti de negizgi boks keshteri meksıkalyqtardyń ulttyq merekeleri – 5-mamyrdaǵy Sınko de Maıo jáne 16-qyrkúıektegi Meksıkanyń táýelsizdik kúni meıramyna oraı uıymdastyrylady. Óıtkeni, mol tabys tabady. Sol sebepti de kásipqoı bokstaǵy kez-kelgen oqıǵany úlken bıznespen baılanystyrady. Al bul salanyń jazylmaǵan óz zańy men tártibi bar. Oǵan syrttan bótenderdi kóp jolata bermeıdi. Tek myqtylardyń myqtysy ǵana qarsylyqtarǵa qaramastan, kedergilerdi buzyp, sol álemge jol sala alady. Gena - solardyń biri. Ol óziniń taza talantynyń, eńbekqorlyǵynyń arqasynda kásipqoı boks álemine ózin moıyndatty. Mıllıardtaǵan dollar qarjy aınalyp júrgen salada óziniń de «talasy» bar ekenin dáleldedi.
GGG brendin qazir bul salaǵa qatysy bardyń bári biledi. Gena qazir óz talaptaryn qoıa alady. Kásipqoı boks álemi onymen eseptesedi. Biraq, bul máńgilik osylaı bolyp qala beredi degen sóz emes. Nebir myqty boksshylar jeńilip, basynan baq taıǵan soń tez umytylyp ketti. Genaǵa qatysty biz ondaıǵa jol bermeýge tıispiz. Iá, keshegi «jeńilisten» keıin keıbir keraýyzdardy eseptemegende qazaqstandyqtardyń barlyǵy qoldaý bildirip jatyr. «Gena – biz úshin báribir chempıon», «Gena – sen úzdiksiń» degen sózderdi aıtpaǵan otandasymyz kemde-kem shyǵar. Erteń ol elge oralǵan soń da jankúıerler qushaq jaıa qarsy alyp, tórine shyǵaryp, mınıstr-ákimder kabınetinde jeke qabyldap, keýdesine temir-tersegin taǵatyn shyǵar. Árıne, bul sportshy úshin úlken qoldaý bolary sózsiz. Degenmen, tek moraldyq qoldaý kórsetýmen shektelip qalatyn jaǵdaı emes bul.
Genaǵa naqty qoldaý kerek. Ol sporttyq ǵumyry aıaqtalǵan soń da kásipqoı boks álemindegi beldi, bedeldi tulǵa bolyp qalýy tıis. Onyń «GGG promotions» kompanıasy qazirgi Oskar de la Hoııanyń «Golden boy promotions», Bob Arýmnyń «Top Rank», Eddı Hırnniń «Matchroom sport» kompanıalary sıaqty kásipqoı boks salasynyń basty oıynshylarynyń birine aınalǵany durys. Qazir túrli promoýterlik kompanıalardyń bosaǵasynda júrgen Batyr Júkembaev, Danıar Eleýsinov, Qanat Islam, Jan Kosobýskıı, Ivan Dychko syndy ózge de myqty jigitterdi osy «GGG promotions» kompanıasyna jınap, solarǵa jaǵdaı jasasa. Sheberlikteri eshkimnen kem emes myqty boksshylarymyz sonda qulqynynyń qamyn ǵana oılaıtyn ózgelerge jem bolmaı, erteń-aq álem chempıony bolar edi. Jáne bolashaqta da talaı talanattardyń tanylýyna jol ashylar edi. Bul jumys júıeli túrde júrgizilse, álemdik kásipqoı boksta bizdiń jigitter eleýli kúshge aınalar edi. Jeńip turǵan jekpe-jekterinde jyǵyp berip, tapa-tal túste tonaý bolmas edi. Biraq, oǵan Genanyń bir óziniń shamasy jetpesi anyq. Oǵan eń bastysy qomaqty qarjy kerek. Bizdiń iri kásipkerler men kompanıalar basynda qarjylaı qoldaý kórsetip jiberse, aıaǵynan nyq turyp alǵan soń ózderi-aq sharýasyn dóńgelete berer edi.
«Samuryq-Qazyna» qory sporttyq nátıjesi de tómen, ımıjdik áseri de shamaly jobalarǵa jumsap jatqan qarajatynyń bir bóligin osyǵan baǵyttasa tek utar edik. Óıtkeni, GGG brendi Qazaqstanmen tikeleı baılanysty. Gena arqyly kásipqoı boks álemi Qazaqstandy tanydy jáne moıyndady. Ataqty promoýterlerdiń qazaq boksshylaryna qyzyǵýshylyq tanyta bastaýy da - Golovkınniń arqasy. Elimizdiń halyqaralyq ımıjin jaqsartýda ol qanshama qarjy jumsalǵan baǵdarlamalar men jobalardan da artyq qyzmet etti. Endeshe, «GGG promotions» kompanıasyna el bolyp qoldaý kórsetý Gennadıı Golovkınniń eren eńbegine kórsetilgen qurmet qana emes, Qazaqstandy sporttyq derjava retinde tanyta túsýge, álemdik bedelin arttyrýǵa jasalǵan naqty qadam bolmaq.
