Bul egizderdiń esimi – Nıkıta jáne Elızaveta. Aqsý qalasynyń 8 jastaǵy turǵyndary qazaq mektebinde oqıdy. Bir erekshiligi – turymtaıdaı balalar qazaq synybynda oqýdy ózderi qalaǵan. Egizderdiń qazaqsha oqımyz degen nıetteriniń taza bolǵany sonsha, qazaq tilin túsinbeıtin ata-anasy da qarsylyq kórsete almapty. Balalar jaıly estı sala birden Aqsý qalasyndaǵy mektepke habarlasyp, ózderimen tildestik. Qazaq tiline degen mahabbattary bıik balapandarǵa degen rızashylyǵymyzdan bólek, bılikte otyrǵan keı shendilerimizge sabaq bolsyn degen nıetti arqaladyq ta egizder jaıly jazýǵa asyqtyq.

Nıkıta jáne Lıza Petrýshınder Aqsý qalasy №2 jalpy bilim beretin mekteptiń 2-synybynda oqıdy. Buǵan deıin «Balapan» qazaq balabaqshasyna barǵan. Tek oryssha tildesetin otbasynan qazaqsha sóıleıtin balalardyń shyǵýy erekshe jaǵdaı emes pe? Onyń ústine qazaǵynan orysy basym Pavlodar oblysynda turatyny taǵy bar. Al eki-aq qazaq mektebi bar Aqsý qalasynyń turǵyndary Nıkıta men Lıza qazaqsha saırap tur.

Petrýshınder otbasynda Lıza men Nıkıtadan ózge eki bala bar, alaıda ekeýi de memlekettik tildi meńgermegen. Analary Olga Borısqyzy kásipker, al ákeleri Evgenıı Vladımıruly feroqorytpa zaýytynda pesh jóndeýshiler brıgadasynyń brıgadıri.

Olga Petrýshına Qamshy.kz aqparat agenttiginiń tilshisine balalardyń qalaı qazaqsha sóılep ketkeni jaıly aıtyp berdi.

-Ekeýi ózara qazaqsha sóılesedi. Tipti, qashannan bastap sóılep ketkenderin de baıqamaı qalyppyz. Bálkim, aýladaǵy dostary qazaq tildi bolǵandyqtan shyǵar. Áıteýir qazaq tilinde sóılesip otyrǵandaryn baıqap ákesi ekeýmiz egizderimizdi qazaq balabaqshasyna beremiz dep sheshtik. Ony bitirgen soń balalar qazaq mektebinde oqyǵylary keletinin aıtty. Qudaıǵa shúkir, sabaqtaryn jaqsy oqıdy, - deıdi anasy.

Balalarynyń qazaq mektebinde oqıtynyna rıza anasy kishigirim qıyndyqtarymen de bólisti. Aıtýynsha, balalarǵa úı tapsyrmasyna kómektesýde qınalady eken. Ondaıda synyp jetekshileri Gýzal Nurjanqyzynyń kómegine júginedi.

-Biz osy ýaqytqa deıin qazaqsha múlde sóılemegen edik. Balalarymyz qazaqsha oqımyz degende abdyrap qalǵanymyz ras. Sebebi ózimizge aýyr bolatyndaı kórindi. Úı tapsyrmalary bar degendeı. Biraq báriniń jolyn tabýǵa bolady. Maǵan úı tapsyrmalaryn oryndaýda ustazdary Gýzal Nurjanqyzy kómektesedi, - dedi Olga Borısqyzy.

Egizderi jaıly syr shertip otyrǵan anasynyń maqtaýdan aýzy bosar emes. Biraq biz estigimiz kelgen bir aýyz sózdi aıtpady. Sóıtip ózimiz suraqty tótesinen qoıa saldyq.

-Aıtyńyzshy, balalaryńyz úshin qazaqsha úırener me edińizder?

Olga Borısqyzy sál oılanyp:

-Endi bilmeımin. Ýaqyt óte kele úırenip ketermiz, - dep jaýap qatty.

«Balalaryńyzdan úlgi alyńyz» dep ishimizden tiledik te, «Qazaq ulty úshin aıanbaı eńbek etetin elimizdiń maqtanyshtary bolsyn!» dep daýystap tilek aıttyq. Deı turǵanmen ózderi túsinbese de, balalaryn qazaq tilinde oqytqan ata-ananyń batyldyǵyna tánti boldyq. Ata-anasynyń qazaq tilde sóılep ketýine áıteýir bir kúni balalarynyń septigi tıer degen úmittemiz.

Balalardyń ustazy Gýzal Nurjanovanyń aıtýynsha, Nıkıta men Lıza synyptaǵy úlgili, tártipti oqýshylardyń biri. Sabaqtaryn 4 pen 5-ke oqıdy. Ekeýi de matematıkany jaqsy kóredi, qazaq tilinen de úzdik. Gýzal apaı Nıkıta men Lıza oqıtyn synypty bıyl ǵana alǵan eken, sol sebepti tolyq tanyp úlgere almapty. Alaıda synyp jetekshi bolyp kelgen ýaqytta kózderi jáýdirep otyrǵan orys ultynyń balalaryn kórgende tańyrqap qalǵanyn jasyrmady.

"Synypqa kirip kelgende ekeýi birinshi partada otyrdy. «Qazaqsha sóıleı ala ma eken, sabaq ótý qıyn bolmaıdy ma» dep oıladym da, tanysyp kóreıin dedim. Qazaqshalary men oılaǵannan áldeqaıda jaqsy bolyp shyqty. Ne kerek, eriksiz rıza boldym. Qýandym", - dep esteligimen bólisti jas maman.

Lıza men Nıkıta synyptastarymen jaqsy aralasady. Ekeýi de sportqa jaqyn. Dzúdomen aınalysady. Sporttyń atalmysh túrinen jetistikterge de jetip úlgerdi. Ekeýi de 2017 jyly Novosıbırskide ótken jarysta 3-oryn, Bolgarıada 2-oryn aldy. Aýdandyq, qalalyq jarystardyń birde-birinde des bermeı keledi. Jazda Lıza Aqsý ákimimen sporttyq jarnamaǵa tústi. Nebári 8 jastaǵy balaqaılar Pavlodar oblysynyń maqtanyshtary.

Sáti túsip ekeýimen de tildestik.  «Qazaqsha sóılegen bizge unaıdy, qazaq tilin jaqsy kóremiz», - deıdi. «Ózderiń úırendińder me?» degenimizge «Iá» dep jaýap qatty. «Ata-analaryń men baýyrlaryńa da úıretesińder me?» degen suraǵymyzǵa «Árıne» dep til qatty. Egizder bolashaqta kim bolǵylary keletinin áli bilmeıdi, biraq qazaq ultyna qyzmet etemiz deıdi. «Dzúdodan qazaqtyń atyn shyǵarǵymyz keledi» dedi Nıkıta.

Pavlodar dese, oıymyzǵa birden  qoǵam belsendisi, til janashyry Rýza Beısenbaıtegi sap etedi. Orysqul bılikpen qazaq tiliniń mártebesi úshin aıanbaı kúresip júrgen Rýzanyń jolyn jalǵap, ornyn basatyn Nıkıta men Lızalar baryna qýanyshtymyz. Qarapaıym suraqqa qazaqsha túsinikti jaýap bere almaıtyn shendiler osy búldirshinderden úlgi alsa deımiz.  

Áleýmettik jeliniń arqasynda búginde Nıkıta men Lıza Pavlodar oblysynyń ǵana emes, búkil Qazaqstannyń maqtanyshyna aınalyp úlgerdi.