15 qyrkúıekte Astana qalasynyń sý jańa ákimi Baqyt Sultanov Almaty oblysynyń aýyl sharýashylyǵy jármeńkesine qatysyp, bir paket alma satyp alǵan edi. Bul jańalyqty estigender "ákim de biz sekildi adam eken ǵoı", - dep tańyrqap, "súıinshi" surap, jarysa jazdy. Iá, ákim de biz sıaqty qarapaıym adam, alaıda biz sıaqty kún saıyn aıaq-kıimniń ókshesin, júıke jasýshalaryn tozdyryp júrgen adam emes. Olar arzan baǵadaǵy azyq-túlikti izdep, bazar jaǵalamaıdy, ul-qyzyn qaıda oqytamyn, nesıe men páter aqyny qalaı tóleımin dep te bas qatyrmaıdy, jumys kúnderi qarjyny únemdeý úshin avtobýstyń artynan júgirip, lyq toly adamdarmen qysylyp turmaıdy degendeı. Bul tizimdi tańdy-tańǵa uryp jalǵastyra berýge bolady.

Astana ákimi alma satyp alǵan kezde ne oılady eken? Almatynyń týmasy týǵan jerdiń aportyn shynymen de saǵynyp qaldy ma álde ózin kórsetýdiń, pıardyń bir túri me?! Já, bastysy bul emes. Biz ákimder avtobýsqa minse, velosıped aıdasa, alma satyp alsa, qalany gúldendirip jibergendeı japa-tarmaǵaı jarysa jazyp, qýanatynymyz qaı sasqanymyz? Keı ákimderdiń halyqty óz qyzmetshisindeı kórip, muń-muqtajyna qulaq aspaýyna, óziniń ákesinen muragerlikke qalǵan qalasynda turatyndaı taltańdap júrýine biz kinálimiz dep esepteımin. Sebebi olardyń túımedeı is-áreketin túıedeı etip kórsetemiz. Olar soǵan mastanyp alyp, ózderin halyqtan erekshemin dep oılaıdy. Sóıtip qara halyqtyń kúndelikti jasap júrgen is-áreketin ózderine pıar retinde paıdalanady. Bireýi velosıped aıdaıdy, endi biri avtobýsqa minedi. Halyqqa ózgeris asa qajet ýaqytta bizdiń ákim-qaralar bir paket alma satyp alýdan ary asa almaı otyr. Sultanovtyń bir paket alma satyp alýdan basqa qandaı jospary bar ekenin ázirge bilmedik. Alaıda halyq eks-mınıstrdiń qandaı bilikti ákim ekenin Astananyń aýa-raıy qubylǵan kezde biletin bolamyz. 

Sý jańa ákimge Serikqazy Kókenaı óziniń feısbýk paraqshasyna Sultanovqa 7 tilek hám keńes beripti. Atalmysh keńesterdiń tizimin Qamshy.kz aqparat agenttigi oqyrmannyń da, Sultanovtyń da nazaryna usynýdy jón kórdi. 

"Qurmetti Astana ákimi! Ózińizdi jármeńkeden alma satyp alý sıaqty arzan pıarmen kórsetpeı, qarapaıym bolǵyńyz kelse, mynalardy isteseńiz bolady:
1. Jaǵdaıdyń barlyǵy jasalǵan Úkimet múshelerine arnalǵan úıde emes, qarapaıym halyq turatyn arzan úıge kóshińiz, sonda turyńyz, kórińiz.
2. Jumysqa avtobýspen kelińiz.
3. Aılyǵyńyzdy astanalyqtardyń ortasha jalaqysyndaı etip belgileńiz.
4. Balalar nemese nemerelerińizdi qarapaıym balabaqsha, mektep nemese ýnıversıtetke berińiz.
5. Patrıot retinde elimizde tigilgen kıimderdi kıip, elimizde óndirilgen zattardy paıdalanyp, qazaqstandyq tamaqty ishińiz.
6. Qalany ózińiz jaıaý aralap, halyqpen kezdesip, muń-muqtajyn tyńdańyz.
7. Áleýmettik jelilerdegi akkaýnttaryńyzdy qolǵa alyp, vırtýaldy keńistikte ashyq bolyńyz.
Eger osylardy oryndaı almasańyz, alma satyp alý sıaqty arzan pıar jasap, súıkimińizdi ketirmegenińiz durys!", dep jazady Serikqazy Kókenaı.