Tatarstan astanasy Qazan qalasynda Alash aqyny Maǵjan Jumabaıulynyń 125 jyldyǵyna arnalǵan halyqaralyq ǵylymı-praktıkalyq konferensıa ótti. Taǵylymdy sharany «HHİ ǵasyrdaǵy fılologıa jáne ónertaný» atty jastardyń İİ ǵylymı mektebi aıasynda Ǵ.Ibraǵımov atyndaǵy Til, ádebıet jáne óner ınstıtýty uıymdastyrdy. Tatarstan Ǵylym akademıasynyń saltanat zalynda ınstıtýt dırektory Kım Mınnýlın kirispe sózinde «Maǵjannyń jyrlary tatar halqyna, kúlli túrki qaýymyna qadirli, aqyn kitaptary Qazan qalasynda jaryq kórdi, ol tatar shaıyrlarymen tyǵyz shyǵarmashylyq baılanysta boldy»,- dedi. Jıyn basynda Qazaqstan Respýblıkasynyń Qazandaǵy generaldy konsýly E.Týkýmov quttyqtaýyn bildirip, eki halyqtyń dostyǵyn nyǵaıtatyn osyndaı rýhanı sharalardyń mańyzy zor ekenin aıtty. Qazaq, tatar, bashqurt, qaraqalpaq, ázirbaıjan ǵalymdary Maǵjannyń shyǵarmashylyǵyn taldap, taǵdyry men taǵylymdy murasy jaıly baıandama jasady. Maǵjannyń kitabyn tatar tiline aýdaryp, jeke jınaq retinde shyǵarǵan Tatarstannyń halyq aqyny Radıf Gatash, ázirbaıjan tiline tárjimalaǵan profesor, belgili túrkitanýshy Ramız Ásker tamasha ádebı salystyrýlar jasap, qazaq shaıyrynyń poezıasyn bıik baǵalady.
Konferensıada arnaıy shyǵarylǵan «Tatar-qazaq ádebı baılanystary jáne Maǵjan Jumabaıuly shyǵarmashylyǵy» atty kitaptyń tusaýkeseri boldy. Qazaq halqynyń úlken dosy, profesor Hatıp Mınnegýlov eki ádebıet arasyndaǵy baılanystyń tereńde jatqany jaıly oı bólisti. A.Baıtursynuly atyndaǵy Til bilimi ınstıtýtynyń bólim meńgerýshisi, fılologıa ǵylymdarynyń doktory, alashtanýshy Orynaı Jubaeva Maǵjannyń lıngvısıkalyq jáne pedagogıkalyq murasyna, L.N.Gýmılev atyndaǵy Eýrazıa ulttyq ýnıversıteti qazaq ádebıeti kafedrasynyń dosenti Qaıyrbek Kemeńger aqynnyń qazaq ádebıetindegi ornyna, tatar ádebıetimen baılanysyna toqtaldy. Óner zertteýshisi, dástúrli ánshi, Qazaqstannyń eńbek sińirgen ártisi Serik Ospan aqyn lırıkasy jaıly aıtyp, qazaq halqynyń yqylasyn «Súı, jan sáýlem», «Juldyzdy júzik, aıdy alqa ǵyp bereıin» syndy Maǵjan sózine jazylǵan ásem ándermen jetkizdi. A.Baıtursynuly atyndaǵy Til bilimi ınstıtýtynyń magıstranty Ádilet Ahmet kóńildegi sózin óziniń jalyndy jyrymen bildirdi. Muqaǵalı óleńderin tárjimalap, tatar tilinde jeke kitap etip shyǵarǵan Tatarstannyń halyq aqyny Robert Mınnýlın qazaq halqyna arnap áserli jyrlaryn oqydy. Sharaǵa Qazan qalasynda oqyp jatqan qazaqstandyq stýdentter men magıstranttar qatysty.
Alash aqynyn ardaqtaǵan, arýaǵyn qasterlegen, qazaq-tatar ádebı baılanysty, jalpy túrkilik rýhanı yntymaqtasty dáriptegen tatar baýyrlarǵa, ásirese Ǵ.Ibraǵımov atyndaǵy Til, ádebıet jáne óner ınstıtýtynyń dırektory Kım Mınnýlınge, Qazan federaldy ýnıversıtetiniń profesory, fılologıa ǵylymdarynyń doktory Leıla Mıngazovaǵa t.b. tilektes áriptesterge alǵys bildiremiz.
Q.Kemeńger
