Keshe tús aýa Óskemenge kelip jettik. Áýejaıdan túse salǵandaǵy aýanyń ereksheligi birden bilinedi. Shyǵystyń bul shyraıly qalasyna tabanym tuńǵysh tıip tur. Tabıǵat ereksheligi birden basqasha ekeni bilinip tur. Tamaqtanyp alǵannan keıin Óskemen óńiriniń kórikti jerlerimen tanysýdy bastap kettik.
⠀
Alǵash barǵan jerimiz Shyǵys óńiriniń injý marjany sanalatyn Sibe kólderi boldy. Óskemen qalasynan 100 shaqyrymdaı qashyqtyqta ornalasqan Sibe kólderine keshqurym jettik. Bul ózi bes kólden turady eken. Ataýy qalmaqtyń "sebyn" sózinen shyqqan desedi. Iaǵnı, "sabyndy kól". Sondaǵylardyń aıtýynsha, sýy maıda, tánge jumsaq tıedi.
⠀
Biz tórtinshi kólge kelippiz. Aınalasyn tasty taý qorshaǵan, sondaı kórikti jer. Kóldiń aınalasyna demalys oryndary salynǵan, áli de salynyp jatyr. Demalýshylar da barshylyq. Tasty taýǵa shyǵyp, kóldi bıikten tamashaladyq. Joldan jylan kórip, záremiz bir ushty. Ózderi elemeıdi de. Demalýǵa sondaı qolaıly jer eken. Eger jazda Shyǵys jerine taban tireıtin bolsańyz, demalatyn oryndy alystan izdemeseńiz bolady. Sibe kólderin betke alyp, tartyp ketińiz. Mundaǵy tynyshtyq pen janǵa jaılylyqty basqa jerden sezingen emen...
Marfýǵa Shapıan
