Almatyda velotaksı qyzmet ete bastady. Veloriksha jobasynyń uıymdastyrýshylary ázirshe 10 velotaksıdi qalanyń ortalyq bóliginde qyzmetke shyǵaryp otyr. Jyl sońyna deıin olardyń sanyn 50-ge jetkizip, qalaǵa túgeldeı qyzmet kórsetýdi josparlap otyr. Avtorlardyń aıtýynsha, qyzmet quny da qaltany qaqpaıdy jáne ádettegi taksı qyzmetinen qymbat bolmaıdy.

"Ótken jyly biz qaladaǵy velosıped jarystaryna qatysýshylardyń kóptigin baıqadyq, qarapaıym velosıpedshilerdiń de kóptigin bilemiz. Almatyǵa kelip jatqan týrıserdiń kóbeıýimen jáne ekologıany jaqsartý boıynsha qalalyq organdardyń kúshimen birge biz "Velorıkshı" jobasyn bastaýdy jón kórdik. Qalalyqtar kúndelikti ómirde velotaksıdi baǵalaıdy. Velorıkshıler qashyq jerlerge bara almasa da, 3-5 kvartal qashyqtyqty yńǵaıly dıvandarda otyryp 200 teńge bara alady", - dedi joba jetekshisi Sábıt Sádıev.

Onyń aıtýynsha, joba komersıalyq emes, áleýmettik mánge kóbirek ıe. Máselen, velorıkshılerdiń keıbir bóligi Almatynyń ásem jerlerine ǵana baratyn bolady, al júrgizýshiler gıd bolyp, týrıserge qala tarıhyndaǵy qyzyqty derekterdi aıtyp beredi. "Bizdiń joba kóbinde qalamyzdy yńǵaıly ári qyzyqty etýge negizdelgen", - deıdi Sádıev.

Ol velosıpedterdiń Koreıadan tapsyryspen ákelingenin aıtty. Olardyń segiz túrli jyldamdyqpen júretin múmkindigi bar, elektr jetegi qosylǵan, farasy, stop-belgileri, burylys jaryqshasy, dabyly jáne dıskili tejegishi bar. Jolaýshylar eki ornydyq dıvanda otyrady, keıde ony artqa qaraı jatqyzyp, júk tasymaldaýǵa bolady. Oryndyqtyń astynda qorǵanys tenti bar, al jańbyrly kúnderde sý ótkizbeıtin kıim beriledi. Taıaý ýaqytta velotaksıdiń aýdıojúıesi daıyn bolady, odan kóńilge jaǵymdy mýzyka oınap, sonymen qatar  Wi-Fi-roýter qosylady. Onyń jyldamdyǵy saǵatyna 20 shaqyrymǵa jetedi. Aıta keteıik, joba jetekshileri velotaksı júrgizýshileriniń jol qozǵalys erejesin saqtap júrgizýine asa nazar aýdaryp otyr.

Tengrinews.kz