2019 jyldyń 1 qańtarynda saǵat shamamen 4:25-terde Qaraǵandy polısıasyna «Drevnıı Rım» (Zavodskaıa kóshesi, 25/3) meıramhanasynyń aldyndaǵy jappaı tóbeles jaıly habar tústi. Aqparatty tekserý barysynda 1995 jylǵy Janseıit Rahymjan Baqytjanuly esimdi qazaq jigitiniń qaıtys bolǵany anyqtaldy. Ol – «ShubarkólKómir» AQ kúzetshisi.  

Áleýmettik jelide taralǵan aqparattarǵa súıensek, 1 qańtarǵa qaraǵan túni meıramhanada 9 adamnan quralǵan kompanıa demalǵan kórinedi. Olardyń altaýy er adam, úshi qyz balalar, solardyń arasynda Rahymjan Janseıit te boldy. Shamamen 03:00-de atalǵan top pen armán ultynyń ókilderi arasynda janjal týady. «Drevnıı Rım» meıramhanasy armán dıasporasyna tıesili. Artynsha janjal tóbeleske ulasyp, ǵımarattaǵy bar adam aralasyp ketedi, olardyń kóbi armán ultynan bolǵan. Qazaqtarǵa kómek retinde úsh kólik keledi. Kýágerlerdiń aıtýynsha, tóbeleske qoldaryna taıaq, metal shybyq ustaǵan 30-35 adam qatysqan. Tóbeles nátıjesinde armándar qatty jaraqattanbaǵan, al qazaqtardyń biri qaıtys bolyp, ekeýi pyshaqpen jaraqattaldy.

Búgin Qaraǵandy oblysy prokýratýrasynyń baspasóz qyzmeti málimdeme jasady. Vedomstvonyń deregine súıensek, Tártip saqtaý organdarymen Qylmystyq kodekstiń 99 baby (adam óltirý) jáne 293 baby (buzaqylyq) boıynsha qylmystyq ister qozǵaldy. 

Qazirgi sátte tergeý jumystarynyń nátıjesinde qaqtyǵysqa qatysqandardyń qatarynan 3 adam ustalyp, 1 qatysýshyǵa izdeý jarıalandy.

«Messendjerler men áleýmettik jeliler arqyly belsendi túrde atalmysh janjal týraly kúmándi aqparat taratylýda, dálirek aıtar bolsaq, eki adam qaıtys bolyp, janjal ultaralyq alaýyzdyq negizinde paıda boldy dep málimdelýde. Qaqtyǵys eki top arasynda paıda bolǵany jáne ol ultaralyq alaýyzdyq sıpatynda bolmaǵany týraly derekterge nazar aýdaramyz, sebebi eki topta da qazaq jáne basqa ult ókilderi bolǵan. Azamattardy úgitteýler men úndeýlerge berilmeı, tergeý organdary taratatyn anyq aqparatty qadaǵalaýlaryn ótinemiz. Zańnamany buzýdyń aldyn alý maqsatynda qasaqana ulttyq alaýyzdyq pen qastastyqty órshitýge baǵyttalǵan áreketter Qylmystyq kodekstiń 174 babymen qarastyrylǵan qylmystyq jaýapkershilikke tartylatyny týraly aqparattandyramyz.

Osyǵan baılanysty oblys prokýratýrasy azamattar men buqaralyq aqparat quraldarynyń ókilderin tek qana qylmystyq qýdalaý organdarynyń resmı málimetterine júginýge shaqyrady.

Quqyq qorǵaý organdary tergeý jumystarynyń tolyqtaı ashyqtyǵyn qamtamasyz etedi, tergeý barysy týraly barlyq aqparat BAQ-da jáne áleýmettik jelilerde jarıalanatyn bolady.

Tergeý barysy oblys prokýrorynyń erekshe baqylaýyna alyndy», - dep habarlady oblystyq prokýratýra.