Keshe ǵana ketken jyldyń enshisinde úlken qaza bar, úlken qylmystyq oqıǵa bul. Úsh adamnyń ómirin jalmaǵan jantúrshigerlik jol apatynda qaza tapqan aktrısa Sholpan Elgezekovany barsha jurt bolyp joqtap, onyń áriptesi Aızada hanymnyń saýyǵyp ketýin jamaǵat bolyp suraýda. Iá, óte qaıǵyly jaǵdaı. Degenmen bul oqıǵanyń taǵy bir qurbany bar, ol – taksı júrgizýshisi. İship alyp kólik basqarǵan qylmysker bir emes, úsh otbasyǵa jańa jyl merekesi qarsańynda orny tolmastaı qaıǵy alyp keldi. Amal neshik, ketken adamdy qaıtara almaımyz. Biraq...

Kóz jumǵan taksı júrgizýshisi bolǵan azamattyń kim ekenin halyq bilmeıdi. Barsha jurtqa belgili aqparat: jol apatynan úsh adamnyń zardap shegip, onyń ekeýiniń kóz jumǵany. Redaksıamyzǵa habarlasqan taksıst jigittiń dostary alańdap, «baýyrymyz suraýsyz ketpese eken...» deıdi.

«Sholpan ápkemizben birge qaza tapqan jol apatynyń taǵy bir qurbany – meniń dosym, baýyrym. Esimi – Baqytnur Qunapıauly, ózi 1985 jyly Qytaıdyń Úrimji qalasynda dúnıege kelgen. Ata-anasy, baýyrlary áli de sonda turyp jatyr, Dosymnyń Qazaqstanda eshqandaı týysy joq.

Ol 2002 jyly Qazaqstanǵa kelip, Uzynaǵashta oqydy. Joǵary oqý ornyn Qostanaı qalasynda aıaqtap, búginde Almaty oblysy Qaskeleń qalasyndaǵy «Aıajan» degen kolejde deneshynyqtyrý sabaǵynan muǵalim bolyp jumys istep júrgen edi. Nesıege kólik alyp, jumystan bos ýaqytynda qalada taksıst bolyp júretin. Ekeýimiz - grýppalas dostarmyz, birge turdyq, birge júrdik, baýyrymdaı bolyp ketken edi», - dedi biz  habarlasqan Qanat esimdi azamat.

Aıtýynsha, qaıǵyly oqıǵanyń sebepkeri dúngen ultynyń azamaty Ilás Ismarovıchtiń áıeli men týǵan-týystary habarlasqan, máıithanaǵa da kelgen, keshirim suraǵan. Baqytnurdyń Qazaqstanda týysy joq ekenin bilip, jerleýine, asyn ótkizýge kómek qolyn usynǵan. Alaıda, odan bas tartyp, dostary ony Uzynaǵashqa aparyp jerlegen.

«Dosymyzdyń jetisin, qyrqyn ózimiz ótkizemiz, oǵan eshqandaı kómektiń qajeti joq ekenin aıttym. Keıin olar da Uzynaǵashqa kelip, jerleý rásimine qatysyp ketti. Biraq, Baqytnurdyń bankten alǵan nesıesin, basqa da qaryzyn óteýimiz kerek. Bul jaqta týystary bolmaǵandyqtan, ony biz óz moınymyzǵa aldyq. Jol apatyna kináli dúngen azamaty osy máseleni óz jaýapkershiligine alyp, qaryzyn ótep berýdi sotta mindettese deımiz. 31 jeltoqsanda onyń soty bolyp, qazir eki aıǵa ýaqytsha qamaýǵa alyndy, ary qaraı soty jalǵasady eken.

Qazir Baqytnur baýyryzben bir jerden kelgen jerler aǵalary jáne Taldyqorǵannan kelgen naǵashy aǵasy basqa da jumystaryna kómektesip jatyr», - dedi bizge Qanat.

Belgili bolǵandaı, kóz jumǵan taksı júrgizýshisi Baqytnurdyń ákesi qaıtys bolyp ketken. Artynda eki aǵasy, bir ápkesi, bir qaryndasy jáne jasy 75-ke jýyqtaǵan anasy qaldy.  İnisi biraz jyl buryn jumys ornynda jumys apatynan qaza tapqan eken.

«Sońǵy kezderi Qytaıdan Qazaqstanǵa kelý qıyndap ketkeni belgili ǵoı. Sondyqtan baýyrlary men anasy onyń jerleýine kele almady, biraq tym quryǵanda qyrqyna kelip qatysýy úshin qolymyzdan kelgenniń bárin jasaımyz. Eń bastysy, bul elde eshbir týysy joq eken dep baýyrymyz suraýsyz ketpese eken...», - deıdi onyń dosy Qanat.