Jyldyń basy taǵy bir qazaly oqıǵamen bastaldy. Qazaqtyń aıaýly aqyn qyzy Janar Nurǵalı ómirden ozdy. Bul jaıynda aqyn Baıbota Qoshym-Noǵaı jáne Bekjan Áshirbaev Facebook paraqshalarynda jazba qaldyrdy. Qamshy.kz aqparat agenttigi marqumnyń týystaryna qaıǵyryp  kóńil aıtady.

"Ajalǵa qarsy tura almaıtyn qandaı áljýaz edik deseıshi, biz, adamdar... Qazaq óleńiniń aspanynan taǵy bir juldyz aǵyp túsipti! 
Men Janardy kórgen joqpyn. Múmkin kórgen de shyǵarmyn-aý, biraq arnaıy tanyspappyn. Alaıda baspasóz betinde jarıalanǵan óleńderiniń bárin de sonshalyqty rızashylyqpen oqýshy edim. Ol tabıǵı daryndy aqyn bolatyn!
Feısbýkten onyń aýrýhananyń jansaqtaý bóliminde es-tússiz jatqanyn oqyp, jas adam ǵoı, jazylyp shyǵatyn shyǵar dep úmittenip edim. Ajalǵa, shynynda da, shara joq eken!..
Qaryndasymyzdyń týǵan-týystaryna, jora-joldastaryna, ony biletin barlyq poezıa janashyrlaryna kóńil aıtamyn!
Janar Nurǵalıdyń shynaıy da kórkem kesteli jyrlary qazaq oqyrmandarynyń kóńilinde uzaq saqtalatyn bolady. 
Mine, teńizdiń dámin tamshydan biletin óleń oqyrmandary, Janardyń jyrlary...

Janar NURǴALI
(1974-2019)

JALǴYZBYN…

Joqty ańsap, bardy sezinbeı,
Armannyń quryp yndyny,
İzdeıdi ekem ózimdeı
Qıaly appaq jyndyny,
Moınymda tynbaı syńǵyry,
Jazmyshtyń temir shylbyry.

Dúnıe kezip ketsem be,
Oıdyryp tasqa tabandy —
Uǵa almaı óziń ketkende,
Kúnim de — aısyz qarańǵy.
Tirilte alam ba óleńmen
Jaramdy «sen, sen!..» dep ólgen?..

Sarǵaıyp sińip saǵymǵa,
Jalǵandyq ánin salǵyzdyń,
Men úshin meńireý janyńda,
Qalmasa meıir — qar, muzbyn.
Kóılegin kıgen san kúzdiń,
Kóleńkesi joq jalǵyzbyn…

«ALASARMA!» DEP...

«Alasarma!» dep, Aı tósin
Kezetin men dep jalǵyz ún!..
Joǵalyp ketse, qaıtesiń,
Jer betindegi jalǵyzyń?..

Uqqansyp Seni sózińnen,
Taqyldaǵanda júz kómeı,
İshinen meni kózińmen
Tura alarmysyń izdemeı?..

Keýdeńe kenet engende,
Bir kóktem mensiz «kúz» dersiń,
Tirimde turmaq ólgende
Eńirep júrip, izdersiń...

SENİ İZDEP JÚREM...

Qol alysaıyn armanmen,
Keýdemde meniń janshy úmit.
Eı, bala, kettiń, Aldar ma eń?
Júrekke túıir tamshy ilip...

Baqyt degenim, sengenim –
Óńim túgili, tús te emes.
Aqıqatym da, kórgenim –
Balalyq kúnim – kúshti eles.

Áldıler ásem ánimen
Óń menen tústiń arasy.
Seni izdep júrem bárinen,
Aýyldyń qara balasy...

***

Habarsyz ketsem, kesh, kúnim.
Atymdy kókte aıta ma Aı?
Esime tústiń keshkurym,
Túspes dep edim qaıtalaı.

Júregim bir sát umtylyp,
Sabyrǵa kezek bermedim.
Janyma araı jyr tunyp,
Kórgim kep, biraq kórmedim.

Sezimnen baıan tappaǵan,
Mazasyz ótti-aý shaq nebir.
Kiná artyp júrer jat maǵan,
Sabyr da, sabyr, sap, kóńil!

Jubanam monshaq taǵyp jyr,
Jazmysh tur qarap syzdana.
Bul júrek sýyp, janyp bir,
Ýaqyt emshi, muzdar-á..." - dep jazady aqyn Baıbota Qoshym-Noǵaı.

Al Bekjan Áshirbaev ony bylaı dep eske aldy:

"Baqul bol, Janar!

Qazaqtyń aıaýly aqyn qyzy Janar Nurǵalıevanyń jaryq dúnıede kórer qyzyǵy taýsylypty. Rabbymyz rýhyn shat, janyn jánnattyq qylsyn! Bul qaraly habar bárimizdiń qabyrǵamyzdy qaqyratyp ketti. Sum ajaldyń seni de jutatynyna sene alar emespiz... Amal neshik, artyń kenish, aldyń peıish bolsyn, kýrstas!

"Óldi aqyn... qoǵam qaldy ary jetim,

Jasymen jýǵansyndy bári betin,

Qazany jetkizdi el bir-birine,

Aıtqandaı aýa raıy málimetin..."