Almatyda Denıs Tenniń ólimi boıynsha sot otyrysy jalǵasýda. Búgin sotta sportshynyń anasy Oksana Ten túsinik berdi. Ol Denıs Tenniń ólimi tapsyryspen oryndalǵan degen pikir aıtýda, dep habarlaıdy Qamshy.kz aqparat agenttigi QazAqparatqa tilshisi sot zalynan.
Denıs Tenniń aıtýynsha, sol kúni ony "T9 grýpp" JSHS dırektory Madına Amanova "Gedonıst" restoranyna shaqyrǵan.
"Restorannyń dırektory Rýslan Haırýllaev Denıspen 1-3-synypta birge oqyǵan. Denıs onymen jaqsy aralaspaıtyn. 13:45-te Haırýllaev ony túski asqa shaqyrǵan. 13.48-de Denıs oǵan kelisedi. Al 18 shildede búgin kúdikti bolyp otyrǵan úsheýi Almatyda jınalady. Olar 18 shilde kúni keshki 21-de qalanyń ortasynan páter jaldaǵan. Aqshalary joq olar qymbat aýdannan qalaı páter jaldaǵan?! Barlyq áreket 19-y kúni túski ekide bastalady. Túski 14:14-te olar Naýryzbaı kóshesimen Gogolǵa burylǵan.
14:15-te kúdikti Tolybaeva qońyraý shalady. Tolybaeva únemi telefonda bolǵan. 14:18-te Denıs restorannan shyqty. 14:30-da qylmyskerler sol oqıǵa ornynda bolǵan. Osy ýaqytqa deıin Qudaıbergenov qolǵabymen júrgizýshi jaqtyń aınasyn sheship alǵan. Denıs mashınaǵa Qurmanǵazy kóshesimen kele jatady. Qulaǵynda qulaqqap, mýzyka tyńdap bara jatady. Tolybaeva onyń kólik ıesi ekenin qaıdan bildi? Ol sybaılastaryna habarlap úlgeredi. Denıs mashınaǵa kelgende Qudaıbergenovty kórgen. Sol sátte Qudaıbergenov onyń qolyna ekinshi aınany ustatady. Qandaı ury kólik ıesine ózi urlaǵan zatyn ustatýshy edi? Sodan soń Denıske Qudaıbergenov birdeńe aıtyp, Denıs ashýlanyp ketken. Oǵan ne aıtqanyn bilmeımin. Qudaıbergenov sport alańyna qaraı qasha jóneledi. Onyń artynan Qıasov júgiredi. Denıs sol jerde qansyrap qulaǵansha aıaǵynan tik turǵan. Ony bir kýáger kórgen. Ol biraq tóbelesten qoryqqanynan mashınadan shyqpaǵan» - deıdi Oksana Ten.
Onyń aıtýynsha, avtourylar áýel bastan aına urlaýdy maqsat tutpaǵan. Men kelgende aınalar Denıs qulaǵan jerden sol jaqta jatty.
"Denıstiń sómkesinde aınadan da qymbat zattar boldy. Nege ony almaǵan? Olar ne úshin jasady muny? Aqsha úshin ekeni ras. Biz tapa-tal túste adam óltire salatyn el emespiz. Kúndiz pyshaq ustap, adam óltirý bola bermeıdi. Men osy nusqaǵa kóp adamnyń sengenin qalamaımyn. Denıs Qazaqstanyn tek qana jaqsy jaǵynan kórsetkisi keletin, elin maqtaıtyn, jaqsy kóretin, bárin qonaqqa shaqyratyn. Bizge kelgen qonaqtar «Qazaqstan qandaı ádemi, tamaqtaryń qandaı dámdi», - dep aıtyp ketetin. Ustalǵandarǵa aıtarym, sizder Qazaqstanǵa qarsy aýyr qylmys jasadyńyzdar. Bul qara kúıeden Qazaqstan jaqyn arada tazarmaıdy. Qazaqty súıgen balany molaǵa súıredińizder ", - dedi Oksana Ten.
Onyń aıtýynsha, Denıstiń ómirlik ustanymdary bireýge unamaǵan nemese onyń ómirindegi sáttilik bireýlerge kedergi bolǵan.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqıat tekserýdi tapsyrdy.
Keıin QR İİM kúdiktilerdiń ustalǵanyn jarıa etti. Aıta keteıik, keshe Denıs Tenniń ólimi boıynsha basty sot talqylaýy bastaldy.
