2018 jyldyń 31 jeltoqsanynda álem Jańa 2019 jyldy qarsy alýǵa daıyndalyp jatqanda Reseıdegi Magnıtogorsk qalasynyń turǵyndary úshin bul qaraly kún boldy. Sońǵy derek boıynsha, 39 adam qaza tapqan. Resmı derekke sáıkes, tosyn oqıǵa gazdyń jarylý saldarynan boldy. Alaıda halyq arasynda «terakt oryn aldy» degen sybys taraldy. Qalada kúnine eki márte brıfıńter ótip jatyr, degenmen naqty aqparat áli belgisiz nemese aıtylmady.
2 qańtardyń keshinde Karl Marks kóshesinde ornalasqan úıdiń mańyndaǵy apat memorıalyna turǵyndar gúl men oıynshyqtar ákelip jatty. Kúnniń aıaz bolǵanyna qaramastan halyq qurbandardy únsizdikpen uzaq eske aldy. Aınala tolǵan órt sóndirýshiler. Aýadan kúldiń ıisi múńkip tur.
Jalpy 31 jeltoqsannan keshegi kúnge deıingi Magnıtogorskidegi jaǵdaı qalaı órbidi? Sholyp ótelik...
31 jeltoqsan: jarylys pen opyrylǵan úı
31 jeltoqsan tańǵa jýyq Iýlıa Orlova qatty soqqynyń daýysynan oıanady. Álgi soqqy birneshe sekýnd boıy úsh márte qaıtalanǵan. Iýlıa Karl Marks kóshesindegi №164 úıge kórshiles aýlada turady.
Al qalanyń ózge turǵyndaryn uıaly telefondarǵa toqtaýsyz kelgen habarlamalar oıatqan. Saǵat tańǵy 8:12-de reseılikterdiń uıalysyna tótenshe jaǵdaılar mınıstrliginen «Karl Marks kóshesinde ornalasqan úıdegi jarylys» jaıly habarlama kelip tústi. Keıin eriktilerden kezekti habarlamalar keldi. Onda eriktiler úıi qırap qalǵan turǵyndarǵa kómektesýlerin ótingen. 10 mınýttan soń radıo sóıleı bastady.
8:30-da kók tútinge boıalǵan tań atty. Kúl 200 metrge deıingi qar men kólikterdi, úılerdi basyp qaldy.
Resmı derekke sáıkes, podezde 111 adamnyń turatyny tirkelgen. Tótenshe jaǵdaıdan keıin 79 adamnyń taǵdyry belgisiz edi, al qalǵandary ne tiri, ne óli kúıinde tabylyp jatty.
Qırandy úıdiń aldy órt sóndirýshilerge toldy, aınaladan tek aıqaılaǵan, jylaǵan daýystar estildi.
Podezd turǵynynyń jýrnalıserge bergen suhbatyna súıensek, túnde qabyrǵalar men edenderdiń qıraı bastaǵan daýysynan oıanyp ketken. Terezesi yńǵaıly jerde ornalasqandyqtan, dúkenniń shatyryna shyǵyp, kórshilerine de shyǵýǵa kómektesken.
Kómek kórsetý úshin úlken pyshaq, metal suraǵan erkekterdiń daýysy anyq estildi. Ústińgi qabattardan jerge pyshaqtar ushty.
Saǵat 11-ge taıaý qaza tapqandardyń sany 3-ke jetti, zardap shekkender aýrýhanaǵa jetkizildi. Qıraǵan úıge jaqyn №14 mektepte ýaqytsha shtab quryldy. Magnıtogorsk turǵyndary zardap shekkenderge jyly kúrteshe, kórpe, azyq-túlik, sý, balalar taǵamyn tasyp jatty.
Prezıdent Pýtın apatty estigen boıda qalaǵa ushyp kelip, jedel otyrys ótkizdi. Qala gýbernatory Pýtınge «jaǵdaıdy tolyq sheshemiz» dep ýáde berdi.
1 qańtar: Evakýasıanyń daýysy men órtengen «Gazel»
Jańa jyl túni qutqarýshylar turǵyndardan otshashýdy paıdalanbaýdy surady. Alaıda buǵan keı adam qulaq aspady.
1 qańtarda qutqarýshylar toby jumysty toqtatýǵa májbúr boldy, qabyrǵalardyń taǵy qulap jatqany týraly aqparat tarady. Qırandy úıdiń arasynda japa shekkenderdi izdep ıtter júr. Birde ıtterdiń biri turǵan ornynda qatyp qalady. Ittiń adamdy ısin sezgenin ıesi birden túsindi.
Sóıtip qutqarýshylar úıindiniń arasynan 11 aılyq Vaná Fokınany alyp shyqty. Fokınder qıraǵan podezdegi páterde turatyn. Órt kezinde anasy 3 jasar balasyn alyp úlgergen, al qarańǵydan 11 aılyq sábıdi izdep tabý múmkin bolmady. Al kúıeýi Evgenıı Fokın apat ýaqytynda jumysta bolypty. Kelesi kúni kúni boıy qutqarýshylarǵa kómektesýmen júrdi.
Sábıdi birden aýrýhanaǵa jetkizdi, áli de jaǵdaıy aýyr.
1 qańtarda túnniń ortasynda qalalyq basty shyrsha ornalasqan Magnıtogorsk ákimshiligi mańynan atystyń ári órttiń daýysy estilgen. Kýágerler VKontakte jelisindegi pablıkterde polısıanyń órtengen «Gazeldi» apara jatqan sátin kórgenderin jarysa jazyp jatty. Kóbi muny terakt dep baǵalady.
Jergilikti jerde resmı derek naqty aıtylmaǵandyqtan turǵyndar arasynda túrli sybys tarady. Bári derlik terakt ekenine senimdi.
1 qańtardyń keshinde apat bolǵan úıge kórshi kóshedegi úıden adamdardyń evakýasıalanyp jatqany jaıly aqparat tarady. Habarlamanyń asty myńdaǵan pikirge toldy. Kóbi qutylyp ketken terrorıster Lenın kóshesindegi úıge tyǵylǵan dep boljady.
2 qańtarda jýrnalıser álgi úıge bardy. Alaıda №84 úıdiń turǵyndary eshqandaı evakýasıanyń, shýdyń bolmaǵanyn aıtty. Anyqtalǵandaı, bári tek sybys qana.
2 qańtar kúni 31 adamnyń qaıtys bolǵany anyqtaldy. Alaıda bul sıfr kún sanap artatyndaı edi. Oqıǵa ornynda 100-ge jýyq qutqarýshy jumys istedi.
2 qańtar: aza tutý
Jergilikti bılik 2 qańtardy aza tutý kúni dep jarıalady.
Páter ıeleri gýbernatordan baspana berýin talap etti. Tipti adamdar podezi bar úıde turýdan qorqyp qalǵan. Ózge turǵyndar úılerindegi qaýipsizdikke alańdaýly.
Keıbiri podezderiniń qırap bara jatqanyn aıtyp shaǵymdandy.
Kópqabatty úıde turatyndar jer úıdegi týysqandaryna ýaqytsha kóshti.
3 qańtar: 39 qaza
Úı úıindisiniń astynan jalpy sany 39 adamnyń máıiti tabyldy. 4 qańtar qalada alǵashqy jerleý rásimi bastalýy tıis.
2-sinen 3-ine qaraǵan túni Andreı Sınebrúhov pen Olga Batalovanyń denesi tabyldy. Eki balasy úıde qonbaǵandyqtan tiri qalǵan. Týysy Tatánanyń aıtýynsha, Andreı 31-i túngi aýysymǵa shyǵýy tıis edi, al Olga 1-i shyǵýy tıis. Arsenıa men Ksenıa Jańa jyldy ata-analarymen qarsy ala almaıtyn bolǵandyqtan naǵashy ata-ájesiniń úıinde bolǵan.
Tatána máıithanadan inisi men kelininiń denesin tanydy. Andreıdiń beti tolyq kúıip qalǵan, al Olgany qolyndaǵy bileziginen tanydy. Jýrnalıserdiń ózge suraqtaryna Tatána jaýap bere almady, sebebi ol jylaı berdi...
