Baýyrjan Baıbek Almatyda birqatar negizsiz shyǵyndardan arylýdy usyndy. Qala ákimi óziniń sózinde Almaty ákimdigi «Nur Otan» partıasy fraksıasynyń múshelerimen birge áleýmettik máni bar sheshimderdi qabyldar kezde búdjet shyǵynyn turaqty tekserip, ońtaılandyrý júrgiziletinin aıtty.

«Ýnıversıadany eske alaıyqshy, ońtaılandyrý arqasynda operasıalyq shyǵyndardyń ózinen ǵana 18 mlrd. teńgeni únemdedik. Ótken jyly qalanyń kóshelerin, saıabaqtary men skverlerin rekonstrýksıalaǵanda qarjynyń 40 paıyzyn únemdedik. Ótken aptada qalany damytý jónindegi jobalardy qaraǵan kezde Esentaı ózeniniń jaǵalaýyn rekonstrýksıalaý jobasy ońtaılandyryldy. Bul jobany aldymen halyqpen birge talqylap, tolyqtyryp, sodan keıin ǵana júzege asyrý qajet. Biz qazirdiń ózinde 3,5 mlrd. teńgeni únemdedik. Jalpy, birqatar negizsiz shyǵyndardan arylǵan jón. Mysaly, Jeńilatletıka manejiniń qurylysy. Ony taǵy bir ret muqıat qarap shyqsaq, edáýir únemge qol jetkizemiz dep oılaımyn», - dep atap ótti Almaty ákimi.

Únemdelgen qarjylar burynǵydaı qala turǵyndarynyń ótinishteri negizinde áleýmettik maqsattarǵa jumsalady. Olar - jańa jumys oryndaryn qurý, áleýmettik jaǵynan az qamtylǵandarǵa, onyń ishinde kóp balaly analarǵa jáne basqalarǵa kómek kórsetý spektrin ulǵaıtý.

«Búgingi kúni Almaty búdjeti áleýmettik baǵytqa negizdelgen, halyqty áleýmettik jaǵynan qamtýǵa bólinetin qarjy jyl saıyn ósýde. Búdjettiń 50%-y nemese 200 mlrd. teńgeden astam qarjy densaýlyq saqtaýǵa, bilim berýge, áleýmettik jaǵdaıy tómen jandardy qoldaýǵa, komýnaldyq shyǵyndardy sýbsıdıalaýǵa, túrli járdem tólemderine jáne basqalarǵa jumsalady. Partıanyń qalalyq fılıaly, «Nur Otan» fraksıasy máslıhatta túrli áleýmettik máselelerdi kóteredi. Barlyq usynystar jergilikti atqarýshy organdarda oń sheshimin taýyp, qalada oıdaǵydaı júzege asýda. Mysaly, partıa fraksıasy usynysynyń arqasynda 2016 jyldan bastap bala baqsha tólemi 27 den 15 myńǵa tómendedi. Osy maqsatqa búdjetten jyl saıyn 3 mlrd. teńgeden astam qarjy bólinip, 60 myń otbasyny qamtıdy», - dep atap ótti Baýyrjan Baıbek.

Qalada sońǵy 4 jyl ishinde memlekettik tapsyrys esebinen jeke baqshalarda oryn sany 3 ese artyp, 4,7 den 15,5 myńǵa ósti. Jalpy, bala baqshalardyń oryndaryn sýbsıdıalaýǵa jyl saıyn 18 mlrd. teńgeden astam qarjy bólinedi. Bul sıfr 3 jyl ishinde 2 ese ósti. Bulardan ózge, kópbalaly otbasylardyń 11 synypqa deıingi balalary tegin tamaqtanady jáne mektep formasymen qamtamasyz etiledi. Mundaı qajettilikterge jyl saıyn qala 800 mln. teńgeden astam qarjy bólýde. Turmysy tómen otbasylardyń 4 myńnan astam balalarynyń tegin demalysy úshin jyl saıyn búdjetten 230 mln. teńge qarastyrylǵan.

Aıta keterligi, sońǵy 4 jyl ishinde partıa usynysy boıynsha kópbalaly otbasylardyń músheleri, mektep, kolej oqýshylary JOO stýdentteri men zeınetkerler jolaqynyń jeńildetilgen 50 paıyzyn ǵana tóleıdi, buǵan jyl saıyn 5 mlrd teńgeden astam qarjy jumsalady. Jeńildikpen 350 myńnan astam adam qamtylǵan.

Partıa bastamasy boıynsha túrli ótemaqylar beriledi. Mysaly, 2,3 myń otbasynyń, onyń ishinde kópbalaly analardyń komýnaldyq shyǵyndary óndirildi. Osy kategorıadaǵylardyń úılerine eseptegish komýnaldyq qondyrǵylardy ornatý shyǵyny ótelýde. Búgingi kúni 1000-nan astam otbasyǵa 50 mln. teńgeden astam qarjylaı kómek kórsetildi.