Anashym

Áldımenen áldılep besigimdi,

Ádildikti júr edińiz jaqtap ylǵı.

Álemim de suryqsyz, mánsiz búgin,

Áldeqashan kún batty sizsiz jyljı.

// 

Dúrsili júregimniń estilmeıdi,

Dirildeıdi qos tizem, bassam qadam.

Dala kezgen jalǵyzbyn sizsiz, Ana,

Dúnıede bolsa da sansyz adam.

// 

Laǵyl monshaq syılap ta úlgermedim,

Lúpilinen júrektiń jınaqtalǵan.

Laqtaı qaldym mańyraǵan, enesinsiz.

Lalagúli syndymyn qırap qalǵan.

// 

Eski kúnder estelik syılap ketken,

Esimdi alyp keı kezde boı kórsetti.

Erteńine úmit pen arman artqan,

Endigi bul qyzyńyz, mine, er jetti.

// 

Taryldy-aý dúnıe osynaý keń,

Tamaǵyma keldi de óksik juttym.

Tiri adam tirlikti qylady teń,

Tirshilikte ne uttym, ne utyldym (?)...

 //

Has sulýym, Hanymym, Asyl Anam,

Halim jaıly oqyrsyz kók dápterden.

Hatty joldap turamyn endi sizge,

Habarsyz ketetuǵyn aq kepterden.

//

Alaqanyn anamnyń saǵynǵanda,

Alys sapar keledi shekkim keıde.

Aıyrylyp qalǵan jumaq kil(i)ti de,

«Ananyń tabanynda eken» deı me?

 //

Naǵyz baqyt anam bar kúnder eken,

Naýryz da Sizdi alǵan taǵy keldi.

Neshe jyl Sizdi izdep, kútsem-daǵy,

Nansam da, nanbasam da joqsyz endi...

/mamyr, 2014/

 ***

Syılaımyn kimge gúlimdi?!

Saǵynysh sarqyp saryala bolǵan kúz-jandy,

Keýdemdi kerip áldebir úmit, naz qaldy.

Saǵym bop ketken beınesi salyp syzatty,

Únsiz úzdigip saǵynysh meni jylatty.

 //

Beınesi beıne beıtaraptanyp beleske,

Tunyq bop turyp, aınalyp keter eleske.

Qolymmen qarmap, jarmasyp jatyp etekke,

Jetkizbeı qoıǵan ókpem bar meniń sol túske.

 //

Balalyǵym men shalalyǵymdy keshirgen,

Boqmuryn qyzdan «osyndaı» adam ósirgen.

Taban tozdyryp aınalyp jerdi shyqsam da,

Anashym, artyq adam tabylmas bir senen!

 //

Mereke keldi! Syılaımyn kimge gúlimdi?!

Úzdige shyqqan estıtin kim bar únimdi?!

Sýaryp saǵan syılar gúlimdi kóz jaspen,

Jalǵastyramyn ózińsiz ómir súrýdi...

 //

Aılardy qýyp jyldarym jyljyp barady,

Árbir shattyqtan áldebir saǵym qalady.

Ózińmen ótken óshpes kúnderim «oınaqtap»,

Janyma kelip saıabyrsıdy, «talady».

 //

Mende de bolǵan «analy ómir», qamsyz kún!

Baýyryna kirip, alańsyz uıyqtar sansyz tún!

Shúkir Allaǵa, syılaǵan sizdeı adamdy!

Bolǵansyz mende, bolasyz da, barsyz shyn!

 //

Syılashy, pende, barynda «altyn, qunsyzdy»!

Anany qadir tutpasa... syılar kim sizdi?

Baqytty bola bereıik árkez, ár sátte!

Tilegim meniń júrekten shyqqan tek izgi!

 //

Jaınańdar, qurby-qyzdary, mynaý qalamnyń!

Jaıqalyp ósken gúlderi bolyp dalamnyń!

Baqyt qusy da qonady tek biz bar jerge,

Bizdersiz, sózsiz sáni kirmeıdi ǵalamnyń!

/05.03.2012/

 ***

Asyl Ana

Shýaǵyn shashqan kúnimsiń, anam!

Jasyrǵan syrdy túnimsiń, anam!

Saǵynyshymnan úzdige shyqqan,

Úzilmeıtuǵyn  únimsiń, anam!

Kúnimsiń maǵan!

 //

Tulǵasy bıik, «irisiń», anam!

Qymbat jandardyń birisiń, anam!

Kózimnen ǵaıyp bolǵanyńmenen,

Men úshin árkez tirisiń, anam!

Pirimsiń anam!

 //

Qorǵanym bolǵan, panashym anam!

Aqylyn aıtar, danashym anam!

San jyldar sizdi umyttyra almas,

Qalaı óshirer sanasyn adam?!

Balasyn adam?!

 //

Altynnan asyl, qymbattym anam!

Aqyldym, kórkem, symbattym anam!

Túsime engen sátterde taǵy,

Úmitimennen ún qattym saǵan...

Ún qattyń maǵan...

 //

Sizdeı qamqor jan tabylmas maǵan,

Anasyn qalaı saǵynbas adam...?

Qaryzyńyzdy óteýim – paryz,

Bastaımyn, ana, jańylmas qadam...

Tańyńdy ash, ǵalam...

 //

Maýqymdy basyp, qushaqqa qysyp,

Qıalǵa ketsem, Sizben bir ushyp.

Mezgili jetip, qaıyńnyń jatyr,

Japyraqtary sor jerdi qushyp...

Aspanǵa ushyp...

 //

Jer basyp júrgen jahanda jalǵan,

Baqytty jannyń birimin kóptiń.

Buıyrǵan sizdeı anany maǵan,

Taǵdyrdy súıip, mańdaıyp óbtim...

Otyna kúıip, jasymdy tóktim,

Mańdaıyn óbtim...

/12-01-14/

***

Aýylǵa at basyn burmaımyn,
Asyǵa...
burynǵy sátterdeı...
Ushyryp áketken bul kóktem...
Anamdy 
aq qanat kepterdeı...
//
Anamnyń kójesi sekildi,
Kójeni áli bir tatpadym...
Bar adam tym jaqsy bolǵanmen,
Anamdaı jandy áli tappadym...
//
Analar bireý-aq, dara jan...
Tappaımyn, nesine izdeımin...
Jumaqta kezdessek eken ǵoı...
...dep sorly úmitti úzbeımin...
//
Kelgenmen kóktemim dalama,
Mende tek kúz mezgil únemi...
"Burtıma"... degendeı Anashym,
Kóktemniń tórinen kúledi...
//
Móltildep janarym jas tola,
Janymdy qushaqtap saǵynysh...
Mingesip alaıyn men saǵan,
Kóktemim, ótkenge alyp ush...

/24.02.2014/

 Maqpal Sembaı