Bul muzbalaqtyń aty-jóni  -  Maqsut Jumaev.  1977 jyly Batys Qazaqstan oblysynda dúnıege keldi.

2011 jyly tamyz aıynda bıiktigi 8000 metrden asatyn 14 shyńnyń bárin baǵyndyrǵan dúnıe júzindegi 27-shi álpınıs  atandy. 2007 jyly 30 sáýirde áriptesi Vasılıı Pıvsovpen birge jer sharyndaǵy eń bıik shyń Everestke sol qaptalynan shyqsa, 2018 jyly 18 mamyr kúni Everestiń ushar basyna ońtústik jaǵynan órmelep jetti. Everestke ońtústik qaptaldan shyǵý qıynnyń qıyny. Búginge deıin dúnıe júzi boıynsha Everest shyńyna soltústik jáne ońtústik betkeıden taban tiregen onshaqty álpınıs bar eken. Solardyń  qatarynda qazaq jigitiniń bolǵany – alash jurty úshin zor mártebe. Rekordqa kelsek, qazaq muzbalaqtarynan 14 «segizmyńdyqtyń» shyńyna taban tiregen ázirge jalǵyz Maqsut ekenin aıta keteıik. Bile bilgenge, Maqsuttyń kókpen talasqan árbir shyńǵa sátimen shyǵyp, aman-esen oralýynyń ózi úlken olja.

Árıne, tóbesinen jerge qarasań, kóziń buldyrap, basyń aınalatyn 8 myń metr túgili, bıiktigi 800 metr tóbege alqynbaı jetý qıyn. Maqsut bolsa, órlegen saıyn daýyly men borany uıtqı soǵatyn, muz qursanyp, qar jastanǵan on tórt «segizmyńdyqty» aýyzdyqtaý úshin talaı márte basyn báıgege tigip, san ret beınet keshti. Mysaly, Qaraqorymdaǵy 8611 metrlik Chogorı shyńyna úzeńgilesi Vasılıı Pıvsovpen birge bes ret shabýyldap, beseýinde mańdaıy tasqa tıgendeı keri qaıtty.

2003 jyly  tamyzda tabıǵattyń alaı-túleı minezi Maqsuttardy  Chogorıdiń alqym tusynan  — 8200 metrden keri qaıtýǵa májbúr etti. 

2005 jyly  tamyzda quramynda Jumaev bar qazaqstandyq tórt muzbalaq Chogorıdiń ushar bıigine qol sozym qalǵanda  bazalyq lagerde qural-jabdyqtary urlanyp, sonyń saldarynan 8550 m. mejeden at basyn tómenge burýǵa májbúr boldy.

2007 jyly tamyz-qyrkúıekte Jumaev-Pıvsov juby 8400 metrge sátti kóterilip, ári qaraı úsh kún boıy qalǵan 211 metrlik jalama shyńnan taban tireıtin tireý, qol qarmaıtyn ilgek  tappaı, ábden boldyryp, keri qaıtady.

2009  jyly shilde-tamyz aıynyń toǵysynda Jumaev-Pıvsov juby jáne reseılik Sergeı Bogomolov Chogorı shyńyna nebary 100 metr jetpeı qalyń qar qursaýyna tap bolyp, amalsyz keri shegindi.

 2010 jyly shilde-tamyz kezinde   kún raıynyń  buzylýyna oraı  Maqsut pen Vasılıı   taǵy da kózdegen maqsattaryna jete almady.

Aqyry, qaısar jigitter qatarynan bes ret jalynan ustatpaǵan  Chogorı shyńyna  2011 jyly tamyzda tý tikti. Bul Maqsuttar tartqan taýqimettiń bir parasy ǵana.

20 jasynda 3680 metrlik Úlken Almaty shyńyna shyǵyp, asqar taýǵa órmeleýdiń qyzyǵyna arbalǵan Maqsut Saǵyntaıuly 23 jasynda úshinshi razrádty álpınıs bolǵanyna qaramaı Ortalyq Shısha Pangma «segizmyńdyǵyna» ottegisiz órmelep jetti. Osy jeńisten keıin órimdeı muzbalaq Qazaqstan quramasyna bekidi.

Keıin TreeGene laboratorıasy Maqsut Jumaevtyń  genetıkalyq pasportyn jasaǵanda onyń tabıǵatyna eń jaqyn sport túri —  álpınızm ekenin taıǵa tańba basqandaı tańbalap beripti.

HHİ ǵasyrdaǵy qazaq sportshylarynyń arasynda  eń mártebeli, eń júrek jutqan sańlaqtyń biri osy Maqsut Jumaev desek, artyq aıtqandyq bolmas.

Qydyrbek Rysbek